നെയ്യാറ്റിന്കര: നെയ്യാറ്റിന്കര ഉപതിരഞ്ഞെടുപ്പില് സിപിഎം ജയിച്ചാല് സംസ്ഥാനത്ത് ഒഞ്ചിയം ആവര്ത്തിക്കുമെന്ന് കേന്ദ്ര പ്രതിരോധമന്ത്രി എ.കെ.ആന്റണി. സിപിഎം ചെയ്ത തെറ്റ് ശരിയാണെന്ന് ന്യായീകരിക്കുന്നതാകും ആ വിജയം. സ്റ്റാലിന്റെ ശൈലി ആരാധിക്കുന്ന നേതാക്കള് കേരളത്തില് ഇപ്പോഴുമുണ്ട്. അവരെ തിരുത്താന് നല്ലവരായ സിപിഎം പ്രവര്ത്തകര് നെയ്യാറ്റിന്കര തിരഞ്ഞെടുപ്പിനെ വിനിയോഗിക്കണമെന്നും ആന്റണി പറഞ്ഞു. നെയ്യാറ്റിന്കര മണ്ഡലത്തിലെ പൊഴിയൂരില് യുഡിഎഫ് സ്ഥാനാര്ഥി ആര്.സെല്വരാജിന്റെ തിരഞ്ഞെടുപ്പ് പ്രചാരണപരിപാടിയില് സംസാരിക്കുകയായിരുന്നു ആന്റണി.
കൊലപാതക, അക്രമരാഷ്ട്രീയം അവസാനിപ്പിക്കാന് സിപിഎം തയാറാകണം. ഇതിന് സിപിഎം തയാറായില്ലെങ്കില് ജനങ്ങള് തിരിച്ചടിനല്കും. പ്രതിയോഗികളെ എന്നെന്നേക്കുമായി അവസാനിപ്പിക്കുന്ന ആക്രമ രാഷ്ട്രീയത്തെ ജനങ്ങള് അംഗീകരിക്കില്ല. സിപിഎമ്മിന്റെ വിശ്വാസ്യത തകര്ക്കാന് മാത്രമേ കൊലപാതക രാഷ്ട്രീയത്തിലൂടെ കഴിഞ്ഞിട്ടുള്ളൂ. തെറ്റുതിരുത്താന് സിപിഎം തയാറാകണം. അല്ലെങ്കില് ജനങ്ങള് പാഠം പഠിപ്പിക്കുമെന്നും അദ്ദേഹം പറഞ്ഞു.