Image

ആശ്വാസ ഗാനങ്ങളുമായി ട്രിനിറ്റി ഇൻറർനാഷണൽ മീഡിയ

മാത്യുക്കുട്ടി ഈശോ Published on 24 May, 2020
ആശ്വാസ ഗാനങ്ങളുമായി ട്രിനിറ്റി ഇൻറർനാഷണൽ മീഡിയ
ന്യൂയോർക്ക്:   കോവിഡ് 19 വൈറസ് ബാധയിൽ മാനസികവും ശാരീരികവും ആത്മീയവുമായി ദുരിതമനുഭവിക്കുന്ന ലോകമെമ്പാടുമുള്ള ജനങ്ങൾക്ക് ആശ്വാസത്തിൻ്റെയും പരിശുദ്ധാത്മ നിറവിൻ്റെയും സാന്ത്വനവും സന്ദേശവും നൽകുന്ന ക്രിസ്തീയ ഗാനങ്ങളുമായി ട്രിനിറ്റി ഇൻറർനാഷണൽ മീഡിയ.  ഈ നൂറ്റാണ്ടിലെ മഹാവ്യാധിയാൽ ഭയചകിതരായിരിക്കുന്ന മനുഷ്യ സമൂഹത്തെ  പ്രപഞ്ച സ്രഷ്ടാവായ പരിശുദ്ധ ദൈവത്തിൻ്റെ കരങ്ങളിൽ സമർപ്പിച്ച് ചിട്ടപ്പെടുത്തിയിരിക്കുന്ന ഗാനം മനസ്സിന് കുളിർമ്മയും കാതുകൾക്ക് ഇമ്പവും നൽകുന്നതാണ്.

വർഷങ്ങളായി അമേരിക്കയിൽ ടെന്നസ്സി സംസ്ഥാനത്ത് സ്ഥിരതാമസമാക്കിയ അലക്സ് തോമസ് രചിച്ച്  സെനു തോമസ് ഈണം പകർന്ന "പരമോന്നതാ നിൻ തൃക്കൈകളിൽ പൂർണ്ണ സമർപ്പണമേകിടുന്നു" എന്ന മനോഹര ഗാനം ആലപിച്ചിരിക്കുന്നത്   പ്രശസ്ത ഗായകൻ കെസ്റ്റർ.

നൂറിലധികം ക്രിസ്തീയ ഭക്തി ഗാനങ്ങൾ രചിച്ചിട്ടുള്ള അലക്സ് തോമസിൻ്റെ എഴുപതോളം ഗാനങ്ങൾ ആൽബങ്ങളായി പുറത്തിറങ്ങിയിട്ടുണ്ട്. അലക്സ് രചിച്ച ഏതാനും ഗാനങ്ങൾ വിവിധ കൺവൻഷൻ ഗാനങ്ങളിൽ ഉൾപ്പെടുത്തിയിട്ടുണ്ട്. കൊട്ടാരക്കര സ്കൂളിൽ മ്യൂസിക് അദ്ധ്യാപകനായ സെനു തോമസ് മാർത്തോമ്മാ സഭയുടെ സംഗീത വിഭാഗമായ ഡിപ്പാർട്ട്മെൻ്റ് ഓഫ്  സേക്രട്ട് മൂസിക്കിലൂടെയും മറ്റ് പല ആൽബങ്ങളിലൂടെയും അയ്യായിരത്തിലധികം ഗാനങ്ങൾക്ക് ഈണം പകർന്നിട്ടുണ്ട്. "റിഥം ഓഫ്  പ്രെയ്സ്"  (Rhythm of Praise) എന്ന ഇംഗ്ലീഷ് ആൽബത്തിലും "തൃക്കരം" എന്ന മലയാളം മൂസിക് ആൽബത്തിലും ഇരുവരും ചേർന്ന് ഗാനരചനയും സംഗീത സംവിധാനവും നടത്തിയിട്ടുണ്ട്.

തോമസ് ചെറിയാൻ്റെ (തമ്പി) നേതൃത്വത്തിൽ ന്യൂയോർക്ക് ആസ്ഥാനമായി പ്രവർത്തിക്കുന്ന ട്രിനിറ്റി ഇൻറർനാഷണൽ മീഡിയയാണ് ഈ ഗാനം ജനങ്ങളിലേക്ക് എത്തിക്കുന്നത്.  സുവിശേഷ പ്രവർത്തനങ്ങൾക്കും പ്രാർത്ഥനകൾക്കും ജീവകാരുണ്യ പ്രവർത്തനങ്ങൾക്കും മുൻ തൂക്കം നല്കി ന്യൂയോർക്കിലും കേരളത്തിലെ എല്ലാ ജില്ലകളിലുമായി പ്രവർത്തിക്കുന്ന ട്രിനിറ്റി ഇൻ്റർനാഷണൽ കോവിഡ്-19 വൈറസ് ബാധയിൽ ലോകമെമ്പാടും മാനസിക സമ്മർദ്ദത്തിൽ കഴിയുന്നവരുടെ മാനസിക പിരിമുറുക്കം കുറയ്ക്കുന്നതിനും ധൈര്യം പകരുന്നതിനുമാണ് ഈ ഗാന ശ്രംഘല സമർപ്പിക്കുന്നതെന്ന് ഡയറക്ടർ തമ്പി പറഞ്ഞു. ട്രിനിറ്റി മീഡിയായുടെ യൂട്യൂബ് ചാനലിലൂടെ ഈ മനോഹര ഗാനങ്ങൾ ഉടൻ തന്നെ ഏവർക്കും ആസ്വദിക്കാവുന്നതാണെന്ന് തമ്പി ന്യൂയോർക്കിൽ പ്രസ്താവിച്ചു.

സംഗീതവും സംഗീതോപകരണങ്ങളും പഠിപ്പിക്കുന്നതിനായി വിദഗ്ദ്ധരായ അദ്ധ്യാപകരുടെ സഹായത്തോടെ സ്കൂൾ ഓഫ് ആർട്ട്സ് എന്ന സ്ഥാപനവും തമ്പിയുടെ നേതൃത്വത്തിൽ കുറെ വർഷങ്ങളായി ന്യൂയോർക്ക് ആസ്ഥാനമായി പ്രവർത്തിച്ചു വരുന്നു. കൊറോണ വൈറസ് വ്യാപനത്തിൻ്റെ പശ്ചാത്തലത്തിൽ  വിദ്യാർത്ഥികൾക്ക്  നേരിട്ട് ക്ലാസ്സുകൾ നടത്താൻ സാധിക്കാതെ വരുന്നതിനാൽ ഉടൻ തന്നെ ഓൺലൈൻ ക്ലാസ്സുകൾ ആരംഭിക്കുന്നതിനുള്ള ക്രമീകരണങ്ങൾ ചെയ്തു വരുന്നതായി തമ്പി അറിയിച്ചു.
 
കൂടുതൽ വിവരങ്ങൾക്ക് അലക്സ് തോമസ്  (731-661-9817), തമ്പി (917-224-8665), ജോർജ്ജ് പി. സ്കറിയ - കേരള (+91 94476 99816) എന്നിവരുമായി ബന്ധപ്പെടുക.
 
Join WhatsApp News
sathyanveshi 2020-05-24 12:31:08
ഇപ്പോൾ ഉള്ള ആശ്വാസം ഞങ്ങൾക്ക് ധാരാളം ആണ് . വെളിയിൽ നിന്നെടുക്കുമ്പോൾ പറയാം
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക