മലയാളത്തിന്റെ നടനവിസ്മയത്തിന് പിറന്നാള് ആശംസകളുമായി മുഖ്യമന്ത്രി പിണറായി വിജയന്. അഭിനയകലയില് സര്ഗധന്യത തെളിയിച്ച അസാമാന്യ പ്രതിഭയാണ് മലയാളത്തിന്റെ മോഹന്ലാല്. നൂറുകണക്കിനു കഥാപാത്രങ്ങളിലൂടെ പ്രേക്ഷകമനസ്സുകളില് അനശ്വരമായ സ്ഥാനമാണ് അദ്ദേഹം നേടിയിട്ടുള്ളത്. വൈവിധ്യം നിറഞ്ഞതും ജീവസ്സുറ്റതുമാണ് ആ കഥാപാത്രങ്ങള്. ഏതുതരം കഥാപാത്രമായാലും അതില് ലാലിന്റേതായ സംഭാവനയുണ്ടാകും.
ഭാവംകൊണ്ടും രൂപംകൊണ്ടും ശബ്ദംകൊണ്ടും പ്രേക്ഷകമനസ്സില് ആ കഥാപാത്രം നിറഞ്ഞുനില്ക്കുകയും ചെയ്യും. ഈ അസാധാരണത്വമാണ് മോഹന്ലാലിനെ മലയാളത്തിന്റെ പ്രിയ നടനാക്കുന്നത്. ആപത്ഘട്ടങ്ങളില് സഹജീവികളെ സഹായിക്കാനും ലാല് താല്പ്പര്യം കാണിക്കാറുണ്ട്.
മുഖ്യമന്ത്രിയുടെ ദുരിതാശ്വാസനിധിയിലേക്ക് 50 ലക്ഷം രൂപയാണ് അദ്ദേഹം സംഭാവന നല്കിയത്. പ്രളയകാലത്തും ഇതേ നിലയില് സഹായമെത്തിക്കാന് അദ്ദേഹം തയ്യാറായി. നടനകലയില് കൂടുതല് ഉയരങ്ങള് താണ്ടാന് അദ്ദേഹത്തിന് സാധിക്കട്ടെ. ഈ ഷഷ്ടിപൂര്ത്തി ഘട്ടത്തില് എല്ലാവിധ ആയുരാരോഗ്യ സൗഖ്യവും നേരുന്നു -മുഖ്യമന്ത്രി ഫേസ്ബുക്കില് കുറിച്ചു.