കരുത്തുറ്റ ഒരു സാമ്പത്തികാവസ്ഥയാണ് പ്രസിഡന്റ് ഡോണള്ഡ് ട്രംപിന് എക്കാലവും പിടിച്ചു നില്ക്കാന് സഹായിച്ചിട്ടുള്ളത്. തന്റെ മുന്ഗാമിയെ പോലെ പോപ്പുലര് ആകാന് 2016 ലെ തിരഞ്ഞെടുപ്പിലോ തുടര്ന്നുള്ള വാചകക്കസര്ത്തുകളിലൂടെയോ ട്രംപിന് കഴിഞ്ഞിട്ടില്ല. ഒരു മികച്ച വാഗ്മി, ഒരു വിഭാഗം ജനങ്ങളുടെ അചഞ്ചലമായ പിന്തുണ എന്നിവ മുന്ഗാമിയുടെ സാമ്പത്തിക രംഗത്തെ കോട്ടങ്ങള് മറച്ചു വയ്ക്കുവാന് സഹായിച്ചു. ട്രംപിന്റെ കാര്യം നേരെ വിപരീതമാണ്. വാഗ്ധോരണികള് പലരെയും പിണക്കുകയും ശത്രുക്കളാക്കുകയും ചെയ്യുന്നു.
തിരഞ്ഞെടുപ്പ് പ്രചാരണത്തില് നല്കിയ വാഗ്ദാനങ്ങള് ഓരോന്നായി നടപ്പാക്കുവാന് ട്രംപ് പ്രത്യേക ശ്രദ്ധ. പല തരത്തിലുള്ള എതിര്പ്പുകള് കാരണം പലതും നടപ്പാക്കുവാന് കഴിഞ്ഞില്ല. ചിലതൊക്കെ നടപ്പാക്കുകയും ചെയ്തു. ബ്ലൂ കോളര് വര്ക്കേഴ്സിന് വലിയ വാഗ്ദാനങ്ങള് നല്കിയാണ് ട്രംപ് അവരുടെ വിശ്വാസം നേടിയെടുത്തത്. പതുക്കെ പതുക്കെ വിദേശത്തേയ്ക്കു പൊയ്ക്കൊണ്ടിരുന്ന നിര്മ്മാണ തൊഴിലുകള് അമേരിക്കയില് തന്നെ പിടിച്ചു നിര്ത്താന് കഴിഞ്ഞു. തൊഴിലില്ലായ്മ നിരക്ക് ചരിത്രത്തിലെ ഏറ്റവും കുറഞ്ഞതായി. നാലു വര്ഷത്തെ പ്രകടനം രണ്ടാമതൊരു ഊഴത്തിന്റെ സ്വപ്നത്തിന് കരുത്തേറിയ ചിറകുകള് നല്കി. ആത്മപ്രശംസയും അമിതമായ ആത്മവിശ്വാസവും വാക്കുകളില് വര്ധിച്ചു.
അപ്പോഴാണ് കോവിഡ്-19 മഹാമാരി പടര്ന്നു പിടിക്കുവാനും പതിനായിരങ്ങളുടെ ജീവന് അപഹരിക്കുവാനും ആരംഭിച്ചത്. സ്ഥിതിഗതികളുടെ ഗൗരവം മനസ്സിലാക്കാന് കഴിയാതെ പോയതിന് വലിയ വില തുടര്ന്നും നല്കേണ്ടിയിരിക്കുകയാണ്. ഏതാനും മാസങ്ങള്ക്ക് മുന്പ് കരുത്തുറ്റ ഒരു സമ്പദ്വ്യവസ്ഥയുടെ പിന്ബലത്തില് ട്രംപ് തന്റെ രണ്ടാമൂഴത്തിന്റെ പ്രചരണം ആരംഭിക്കുവാന് പദ്ധതി ഇട്ടിരുന്നതാണ്. ഇക്കഴിഞ്ഞ ഏപ്രിലില് 20 മില്യന് തൊഴില് നഷ്ടമായി. തൊഴില്ലായ്മ 14.7% ആയി. ഇത് ഗ്രേറ്റ് ഡിപ്രഷനുശേഷമുള്ള ഏറ്റവും ഉയര്ന്ന നിരക്കാണ്.
ഇത്രവേഗം ഇത്ര ഭീമമായി സാമ്പത്തികാവസ്ഥ തകരുന്നത് അമേരിക്കയുടെ ചരിത്രത്തില് ഇതാദ്യമാണ്. ട്രംപിനെ കാര്യമായി സഹായിക്കേണ്ട ചില സംസ്ഥാനങ്ങളാണ് തകര്ച്ചയിലായിരിക്കുന്നത്. ഇപ്പോള് പ്രസിഡന്റിന് ഒരു കാര്യം കൂടി ഈ വോട്ടര്മാരെ പറഞ്ഞ് മനസ്സിലാക്കേണ്ടതുണ്ട്. തൊഴിലില്ലായ്മ ഇത്രയും വര്ധിച്ചതു മഹാമാരി മൂലമാണ്. തന്റെ പൊതുജനാരോഗ്യ നടപടികളിലെ പാളിച്ച മൂലമല്ല മഹാമാരി നശിപ്പിച്ചത് വീണ്ടും കെട്ടിപ്പടുക്കുവാന് തനിക്ക് ഒരു അവസരം കൂടി നല്കണമെന്നും ട്രംപ് അഭ്യര്ത്ഥിക്കുന്നു.
എനിക്ക് ചെയ്യാന് കഴിയുന്നതാണിത്. ഞാന് തിരിച്ചു കൊണ്ടു വരും. എല്ലാവര്ക്കും ഇതറിയാം. ഇതില് ആശ്ചര്യകരമായി ഒന്നും ഇല്ല. സംഭവിച്ച നഷ്ടത്തിന് ഞാനാണ് ഉത്തരവാദിയെന്ന് ഡെമോക്രാറ്റുകള് പോലും പറയില്ല. ട്രംപ് അവകാശപ്പെട്ടു.എന്നാല് തൊഴിലവസരങ്ങള് പുനഃസൃഷ്ടിക്കുന്നത് അത്ര എളുപ്പമല്ലെന്ന് സാമ്പത്തിക വിദഗ്ദ്ധര് പറയുന്നു. 1933 ല് തൊഴിലില്ലായ്മ 25% വരെ എത്തിയിരുന്നു. ഇപ്പോള് ഏപ്രിലിലെ കണക്കുകള് മാറി ഈ നിലയില് തൊഴിലില്ലായ്മ എത്തിയിട്ടുണ്ടാകാം. തങ്ങള്ക്ക് ഇപ്പോഴും തൊഴിലുണ്ട് എന്ന് കരുതുന്ന പലര്ക്കും ഇതിനകം തൊഴില് നഷ്ടപ്പെട്ടിട്ടുണ്ടാകാം എന്ന് സാമ്പത്തിക വിദഗ്ദ്ധര് പറയുന്നു. 1930 ല് സംഭവിച്ചതിനെക്കാള് വളരെ വേഗത്തിലാണ് ഇപ്പോള് തൊഴില് നഷ്ടപ്പെടുന്നത്. ഈ വേഗത യഥാര്ത്ഥത്തില് അമേരിക്കക്കാരെ ആശ്ചര്യപ്പെടുത്തുന്നതാണ്. ഇതിന് മാറ്റം ഉണ്ടാകുമെന്ന് വിശ്വസനീയമായ ഒരു ഉറപ്പ് ട്രംപില് നിന്നും വോട്ടര്മാര് പ്രതീക്ഷിക്കുന്നു.
വൈറ്റ് ഹൗസിന് ഈ തകര്ച്ച സാമ്പത്തിക നയങ്ങളുടെ പരിണിത ഫലം മൂലമല്ല മറിച്ച് അസാധാരണമായ ഗോളാന്തര മഹാമാരി മൂലമാണെന്ന് അടിവരയിട്ട് പറയാന് കഴിയും. റിപ്പബ്ലിക്കന് നയതന്ത്രജ്ഞനും മിറ്റ് റോംനിയുടെ 2012 ലെ പ്രസിഡന്റ് തിരഞ്ഞെടുപ്പ് പ്രചരണ വിഭാഗം മുതിര്ന്ന ഉപദേശകനുമായിരുന്ന കെവിന് മാഡ്ഡന് പറഞ്ഞു.
ചരിത്രം മുന്നറിയിപ്പു നല്കുന്നത് ട്രംപിന് മുന്നില് വലിയ പ്രതിസന്ധികള് ഉണ്ടാവും എന്നാണ്. ഗ്രേറ്റ് ഡിപ്രഷന്റെ കാലത്ത് പ്രസിഡന്റായിരുന്ന ഹെര്ബര്ട്ട് ഹൂവര് രണ്ടാമൂഴത്തിന് ശ്രമിച്ചപ്പോള് 1932 ലെ തിരഞ്ഞെടുപ്പില് വലിയ പരാജയം ഏറ്റുവാങ്ങി. ജോര്ജ് എച്ച് ഡബ്ല്യു ബുഷ്, ജി കാര്ട്ടര് എന്നിവരും പരാജയപ്പെട്ടൂ. ബറാക്ക് ഒബാമ മാത്രമാണ് രക്ഷപ്പെട്ടത്.