കൊറോണ പാഠങ്ങൾ :മീരാ കൃഷ്ണൻകുട്ടി ,ചെന്നൈ

വനിതയിൽ സ്ഥിരമായി എഴുതിക്കൊണ്ടിരുന്ന പ്രസിദ്ധ പത്രപ്രവർത്തകയാണ് മീരാ കൃഷ്ണൻകുട്ടി .ഇന്റർനെറ്റും ആധുനിക സൗകര്യങ്ങളുമില്ലാതിരുന്ന കാലത്ത് ചെന്നൈയിൽ നിന്നുമുള്ള മീരാ കൃഷ്ണൻകുട്ടിയുടെ റിപ്പോർട്ടുകൾ കേരളമാകെ ആകാംഷയോടെ കാത്തിരിക്കുമായിരുന്നു.വിവിധ രംഗങ്ങളിലെ അതിപ്രശസ്തരുമായുള്ള മീരയുടെ അഭിമുഖങ്ങൾ അത്യാകർഷകമായിരുന്നു.ഇ - മലയാളിയിൽ തുടർന്നും മീരയുടെ എഴുത്തുകൾ പ്രതീക്ഷിക്കുക.

അരുതുകൾ താഴിട്ടു പൂട്ടി മുറുക്കിയ,

അതിരുകൾ തീർപ്പാക്കി

തടയിട്ടൊരുക്കിയ ,

ഭയമിരുൾ മേഘങ്ങൾ പഴുതുകൾ പോക്കിയ,

അകമാകുമിന്നിനി , മനിതനൊരാശ്രയം!

അന്നേരമകമേ തെളിയുന്ന ചിത്രങ്ങൾ ,

പാഠങ്ങൾ , പലപ്പോഴും പൊരുളുകളും ,

എത്ര ശരിയെന്നറിയുന്നു നാമിന്നു ,

ഇക്കോറോണ ഭരിക്കും ദിനങ്ങളിൽ ..!

അറിയുന്നു, അധികാരമോഹം പാഴെന്നതും ,

അധികമാം ഭാരമായത് ചമയുമെന്നതും .

അഹമെന്ന ഭാവം , അതു വെറുമൊരന്ധത ,

അവനവനെത്തന്നെ

വീഴ്ത്തുന്ന വ്യർത്ഥത ..

മതമേതുമല്ല ,മറിച്ചോ ,

മാനവ മാനസ ചേർച്ചയത്രെ ബലമാകുന്നു

പണവും പ്രതാപവും തോൽക്കുന്നിടത്തും

ജയിക്കുന്നു , പരമമാം ഒരുമമാത്രം .

മർത്യനു മാത്രമല്ലീലോകമെന്നതും

ശക്തമായ് വ്യക്തമായ് ഓർക്കവേണം .

കൃത്യമായുള്ള

പാഠച്ചിത്രമെന്ന പോൽ ,

ചേതനതന്നിലതും പതിപ്പിക്കണം.

പുഴുവോ പുൽച്ചാടിയോ ശലഭമോ പറവയോ

നാൽക്കാലിതന്നെയോ ഏതുമാട്ടെ ,

പുഴകളും മലകളും കാടുകളുമെല്ലാം

അവരുടെ സ്വത്തു മാണെന്നതോർക്കണം നാം !

പച്ചപരിഷ്കാര പാഴ്‍പൂച്ചു വേണ്ടിനി ,

വേണ്ടത് പ്രത്യാശ ശോഭ മാത്രം .....

ഇന്നു പഠിക്കുമനുഭവപാഠങ്ങൾ,

എന്നു മോർക്കേണ്ടതാണെ -

ന്നതും കാര്യം

മാറുമീ കാലം ..... ദുരിതകാലം .

മാറണം, നമ്മളും ത്വരിതവേഗം.

നല്ല നാളുകൾക്കായ് കാത്തിരിക്കാമിനി

നന്മതൻ കൈത്തിരി നാളവുമായ് ...

കൊറോണ പാഠങ്ങൾ :മീരാ കൃഷ്ണൻകുട്ടി ,ചെന്നൈ

PATHRANGAL

US WEBSITES

EMalayalee Available in MediaAppUSA