കൊറോണ വൈറസ് പാന്ഡെമിക്കിനിടയില് രാജ്യത്തുടനീളമുള്ള രോഗികളെ പരിചരിക്കുന്ന എന്എച്ച്എസിനായി 1,000 ഡോളര് സമാഹരിക്കാനാണ് യോര്ക്ക്ഷെയറിലെ കീഗ്ലിയില് നിന്നുള്ള 99 കാരന് ആദ്യം ഉദ്ദേശിച്ചിറങ്ങിത്തിരിച്ചത്. ഏപ്രില് അവസാനത്തോടെ നൂറാം വയസ്സിലേക്കെത്തുന്നതിനു മുമ്പായി 100 തവണ തന്റെ ഗാര്ഡന് നടന്നു തീര്ക്കുമെന്ന ഉദ്യമം ആണ് ശാരീരികമായി നടക്കുവാന് ഏറെ പ്രയാസപ്പെടുന്ന അദ്ദേഹം എടുത്ത വെല്ലുവിളി.വെല്ലുവിളി ഇന്ന് പൂര്ത്തിയാക്കിയപ്പോള് NHS നായി സമാഹരിച്ചത് 17 മില്യണ് പൗണ്ടും.
അദ്ദേഹത്തിന്റെ ഹിപ് സര്ജറി ചെയ്യുകയും, ഏറ്റവും നല്ല പരിചരണവും നല്കുകയും ചെയ്ത NHS നോടുള്ള കടപ്പാട് പ്രത്യേകിച്ച് ഈ ആപല്ക്കരമായ സമയത്തും രാജ്യത്തിനായി അവര് കഠിനാദ്ധ്വാനം ചെയ്യുമ്പോള് ഒരു നന്ദി അര്പ്പിക്കുവാനും എളിയ കൈത്താങ്ങാകുവാനുമായി ആരംഭിച്ച ഒരു ചെറിയ കാരുണ്യ പ്രവര്ത്തിയാണ് ഇപ്പോള് 17 മില്യണ് പൗണ്ട് താണ്ടി എത്തിനില്ക്കുന്നത്.
രണ്ടാം ലോക മഹായുദ്ധത്തില് ഇന്ത്യയിലും ബര്മ്മയിലും സേവനം ചെയ്തിട്ടുള്ള വ്യക്തിയാണ് ക്യാപ്റ്റന് ടോം.
ബ്രിട്ടീഷ് ആര്മി റിട്ട. ക്യാപ്റ്റന് തന്റെ പ്രാരംഭ ലക്ഷ്യത്തിന്റെആയിരക്കണക്കിന് ഇരട്ടിയിലധികം സമാഹരിച്ചു കഴിഞ്ഞു. 800,000 ല് അധികം പേരില് നിന്നും അദ്ദേഹത്തിന് സംഭാവനകള് ലഭിച്ചു. കോവിഡ് -19 കാലഘട്ടത്തില് എന്എച്ച്എസിനായി പണം സ്വരൂപിക്കാനുള്ള അദ്ദേഹത്തിന്റെ ശ്രമങ്ങള് വിദൂരത്തുള്ള ആളുകളെ വരെ ഏറെ പ്രചോദിപ്പിച്ചു, റിയോ ഫെര്ഡിനാന്റ്, ഡെബോറ മീഡന് എന്നിവരുള്പ്പെടെയുള്ള ഉന്നത വ്യക്തികളില് നിന്നുള്ള പിന്തുണാ സന്ദേശങ്ങള് അദ്ദേഹത്തിനും ലക്ഷ്യത്തിലേക്കുള്ള കുതിപ്പിനും പ്രോത്സാഹനമേകി.
കൂടാതെ, സര്ക്കാരിന്റെ ദൈനംദിന പത്രസമ്മേളനത്തില് ആരോഗ്യ സെക്രട്ടറി മാറ്റ് ഹാന്കോക്ക് പ്രസംഗത്തിന്റെ പ്രാരംഭ ഘട്ടത്തില് ഏറെ പ്രശംസാ വാക്കുകളാണ് അദ്ദേഹത്തിനായി നല്കിയത്.'ക്യാപ്റ്റന് ടോം മൂറിന് ഇന്ന് ഒരു പ്രത്യേക കൃതജ്ഞത അര്പ്പിക്കാന് ഞാന് ആഗ്രഹിക്കുന്നു, ''ഹാന്കോക്ക് പറഞ്ഞു.'ക്യാപ്റ്റന് ടോം, നിങ്ങള് എല്ലാവര്ക്കും ഒരു പ്രചോദനമാണ്, ഞങ്ങള് നിങ്ങള്ക്ക് നന്ദി പറയുന്നു.'
രാജ്യത്തുടനീളമുള്ള കെയര് വര്ക്കര്മാര്ക്കുള്ള നന്ദി സൂചകമായി വ്യാഴാഴ്ച, രാജ്യം നാലാമത്തെ പ്രതിവാര ക്ലാപ് ഫോര് ഔര് കെയേഴ്സ് പരിപാടിയില് ക്യാപ്റ്റന് മൂര് പങ്കെടുക്കും.
ക്യാപ്റ്റന് മൂറിന്റെ അസാധാരണമായ ധനസമാഹരണ ശ്രമങ്ങളുടെ വെളിച്ചത്തില്, 'ക്ലാപ് ഫോര് ടോം' എന്ന ഹാഷ്ടാഗ് ട്വിറ്ററില് ട്രെന്ഡുചെയ്യാന് തുടങ്ങി, ആളുകള് അവരുടെ കരഘോഷം വെറ്ററന്സിനും വേണ്ടിയും അര്പ്പിക്കാന് ആഗ്രഹിക്കുന്നുവെന്ന് പ്രസ്താവിച്ചു.
'എനിക്ക് മറ്റാരെയും കുറിച്ച് അറിയില്ല, പക്ഷെ ഇന്ന് രാത്രി ഞാന് ടോമിനായി കൈയടിക്കുന്നു!' ഒരാള് ട്വീറ്റ് ചെയ്തു.
ഏപ്രില് അവസാനത്തോടെ തന്റെ നൂറാം വയസ്സിലേക്കു കടക്കുന്നതിന് മുമ്പായി വെറ്ററന് ക്യാപ്റ്റന് ടോം നൂറാം ലാപ്പ് പൂര്ത്തിയാക്കുമെന്ന മുന്നോട്ടു വെച്ച സ്വന്തം വെല്ലുവിളിയാണ് ഇന്ന് പൂര്ത്തിയായത്.
ഒരു വാക്കിംഗ് ഫ്രെയിമിന്റെ സഹായത്തോടെ, ബെഡ്ഫോര്ഡ്ഷയറിലെ മാര്സ്റ്റണ് മൊറേറ്റെയ്നിലെ തന്റെ പൂന്തോട്ടത്തില് 25 മീറ്റര് (82 അടി) ലൂപ്പിന്റെ 100 ലാപ്സ് ഏപ്രില് 30 ന് ജന്മദിനത്തിന് മുമ്പായി 10 ലാപ്പ് ഭാഗങ്ങളായി അദ്ദേഹം പൂര്ത്തിയാക്കി.
അതേസമയം അദ്ദേഹത്തിന് ഒരു നൈറ്റ് ഹുഡ് ലഭിക്കണമെന്ന നിവേദനത്തില് ഇതുവരെ 300,000 ല് അധികം ആളുകള് ഒപ്പിട്ടു.
പ്രധാനമന്ത്രി ബോറിസ് ജോണ്സണ് 'അദ്ദേഹത്തിന് ബഹുമതി നല്കുവാനുള്ള വഴികള് നോക്കുമെന്ന്' ഡൗണിംഗ് സ്ട്രീറ്റ് പറഞ്ഞു. ''അത്തരമൊരു ബഹുമതി ലഭിക്കുന്നത് ആശ്ചര്യകരമാണ്, പക്ഷേ അത്തരത്തിലുള്ള ഒന്നും ഞാന് പ്രതീക്ഷിക്കുന്നില്ല,'' ക്യാപ്റ്റന് ടോം പറഞ്ഞു.
'ക്യാപ്റ്റന് ടോം തന്റെ വീരോചിതമായ പരിശ്രമത്തിലൂടെ രാജ്യത്തിന്റെ ഹൃദയം കവര്ന്നതായും അവിശ്വസനീയമായ തുക സ്വരൂപിച്ചതായും' ജോണ്സണ് വക്താവ് പറഞ്ഞു.
ക്യാപ്റ്റന് ടോം ചെയ്തത് അസാധാരണമാണെന്ന് ചാന്സലര് റിഷി സുനക് പറഞ്ഞു. ''ബ്രിട്ടീഷ് ചൈതന്യം മുമ്പത്തെപ്പോലെതന്നെ ശക്തമാണെന്ന് അദ്ദേഹം തെളിയിച്ചു''.
യു കെ യില് വ്യാഴാഴ്ച റിപ്പോര്ട്ട് ചെയ്തത് 861പേരുടെ മരണം.
യു കെ യില് കഴിഞ്ഞ 24 മണിക്കൂറിനിടയില് 861പേര് കൊറോണ രോഗം ബാധിച്ചു മരിച്ചതായാണ് റിപ്പോര്ട്ട്. ഇതോടെ യുകെ യില് ആകെയുള്ള മരണസംഖ്യ 13729 ആയി ഉയര്ന്നു. 103093 കോവിഡ് പോസിറ്റിവ്
കേസുകളാണ് രാജ്യത്ത് ഇതുവരെ സ്ഥിരീകരിക്കപ്പെട്ടിട്ടുള്ളത്.
27 എന്എച്ച്എസ് മുന്നിര ആരോഗ്യ പ്രവര്ത്തകര് കൊറോണ വൈറസ് ബാധിച്ച് മരിച്ചുവെന്ന് ആരോഗ്യ സെക്രട്ടറി മാറ്റ് ഹാന്കോക്ക് പറഞ്ഞു. ന്യൂനപക്ഷ വംശീയ പശ്ചാത്തലത്തിലുള്ള ആളുകളില് കൊറോണ വൈറസ് ബാധയേറ്റു ആനുപാതികമല്ലാത്ത തോതില് മരണ നിരക്ക് ഉയരുവാന് ഇടയായതിലും,ആക്ഷേപങ്ങള് തുടരുന്നതിനിടയിലും സര്ക്കാര് ഇക്കാര്യത്തില് അവലോകനം ചെയ്യുമെന്ന് ഡൌണിംഗ് സ്ട്രീറ്റ് സ്ഥിരീകരിച്ചു.
കൊറോണ വൈറസ് പരിശോധനയ്ക്കുള്ള ദേശീയ ശേഷി പ്രതിദിനം 35,000 ആയി ഉയര്ന്നു, എന്നാല് ''ഡിമാന്ഡിന്റെ അഭാവം'' കാരണം 16,000 ല് താഴെ മാത്രമാണ് യഥാര്ത്ഥത്തില് ദിവസേന നടത്തപ്പെടുന്നതെന്ന് ഡൗണിംഗ് സ്ട്രീറ്റ് പറഞ്ഞു.ബ്രെക്സിറ്റ് സംക്രമണ കാലയളവ് നീട്ടുന്ന ആവശ്യം ഡൌണിംഗ് സ്ട്രീറ്റ് നമ്പര് 10 നിരസിച്ചു. അനിശ്ചിതത്വം നീണ്ടുനില്ക്കുമെന്ന് അദ്ദേഹം പറഞ്ഞു
യു കെ യില് ലോക്കഡൗണ് മെയ് 7 വരെ നീട്ടി.
യുകെയില് ലോക്കഡൗണ് കുറഞ്ഞത് മൂന്നാഴ്ചക്കെങ്കിലും നീട്ടിയതായി ഡൊമിനിക് റാബ് പ്രഖ്യാപിച്ചു. ഇന്ന് ഉച്ചതിരിഞ്ഞ് ഡൗണിംഗ് സ്ട്രീറ്റ് പത്രസമ്മേളനത്തില് ഡൊമിനിക് റാബ് ബ്രിട്ടീഷ് പൊതുജനങ്ങളോട് ക്ഷമയോടെയിരിക്കണമെന്നും, കുറഞ്ഞത് മൂന്ന് ആഴ്ചയെങ്കിലും ലോക്ക്ഡൗണില് തുടരേണ്ടതുണ്ടെന്നും പറഞ്ഞു.
ബോറിസ് ജോണ്സണ് ചെക്കറില് വിശ്രമം തുടരുമ്പോള് ഡെപ്യൂട്ടി സ്ഥാനം വഹിക്കുന്ന വിദേശകാര്യ സെക്രട്ടറി,ലോക്ക്ടൗണ് നടപടികള് എടുത്തുകളയുന്നത് കൂടുതല് മരണം വിതക്കുമെന്നും രണ്ടാമത്തെ പീക്കിനു കാരണമാകുമെന്നും പറഞ്ഞു.
''നമ്മള് വളരെയധികം മുന്നോട്ടു എത്തിക്കഴിഞ്ഞു,വളരെയധികം പ്രിയപ്പെട്ടവരെ നഷ്ടപ്പെട്ടു,''നമ്മള് യാത്ര ചെയ്യുന്ന തുരങ്കത്തിന്റെ അറ്റത്ത് തീര്ച്ചയായും വെളിച്ചമുണ്ട്.' അദ്ദേഹം പറഞ്ഞു. 'ലൈനുകള് പാലിച്ചു മുന്നേറാം. ദൈനംദിന മരണനിരക്കിന്റെ നിരന്തരമായ ഇടിവ്, ആവശ്യത്തിന് ഉയര്ന്ന പിപിഇ, കൃത്യതയാര്ന്ന ത്വരിത പരിശോധന, ശരിയായ പരിചരണം, വൈറസിന്റെ രണ്ടാമത്തെ പീക്കിനു സാദ്ധ്യതയില്ല എന്ന ആത്മവിശ്വാസം എന്നിവ ഇതില് ഉള്പ്പെടുന്നു. ഇത് 'അതി സങ്കീര്ണ്ണമായതും അപകടകരവുമായതുമായ ഒരു സ്ഥിതി വിശേഷമാണ്. ഏവരും ഒറ്റക്കെട്ടായി വ്യവസ്ഥകള് പാലിക്കണം.'
'ഒരു വാക്സിന് കണ്ടെത്തുക എന്നതാണ് ലോക്ക്ഡൌണില് നിന്ന് രക്ഷപ്പെടാനുള്ള ശരിയായ മാര്ഗ്ഗമെന്നതിനാല് മാധ്യമപ്രവര്ത്തകര് ''എക്സിറ്റ് തന്ത്രത്തെക്കുറിച്ച്'' തുടരെ ചോദിക്കുന്നത് അവസാനിപ്പിക്കണമെന്ന്' രോഗികളുടെ സുരക്ഷാ മന്ത്രികൂടിയായ എംപി നാദിന് ഡോറിസ് പറഞ്ഞു. അത് ശരിവെക്കുന്ന നയമാണ് സര്ക്കാരിന്റെ ശാസ്ത്ര ഉപദേഷ്ടാവും നല്കിയത്.
അപ്പച്ചന് കണ്ണഞ്ചിറ