ലോകമെങ്ങുമുള്ള ക്രൈസ്തവര് ഇന്ന് ദുഖവെള്ളി ആചരിക്കുകയാണ്. ദുഖവെള്ളി ദിനത്തില് യേശുക്രിസ്തുവിന്റെ നീതിയെയും ധൈര്യത്തെയും പ്രധാനമന്ത്രി നരേന്ദ്ര മോദി അനുസ്മരിച്ചു. ''മറ്റുള്ളരെ സേവിക്കുന്നതിനു വേണ്ടി ക്രിസ്തു തന്റെ ജീവിതം മാറ്റിവെച്ചു. ക്രിസ്തുവിന്റെ നീതിയും ധൈര്യവും അദ്ദേഹത്തിന്റെ നീതിബോധമാണ്. സത്യത്തോടുള്ള ക്രിസ്തുവിന്റെ സമര്പ്പണത്തെ നാം ഓര്മിക്കണം...'' - മോദി ട്വിറ്ററില് കുറിച്ചതിങ്ങനെ. അതേസമയം, കൊറോണവൈറസ് ഭീതിയില് ഈ വര്ഷം ലോകമെങ്ങും ആഘോഷങ്ങള് ചടങ്ങുകളില് മാത്രം ഒതുക്കാനാണ് മതനേതാക്കളുടെ തീരുമാനം.
അപ്പോള് ഭൂമി കുലുങ്ങി, സൂര്യന് ഇരുണ്ടു. ദേവാലയത്തിലെ തിരശ്ശീല രണ്ടായി കീറി. ശവകുടീരങ്ങള് തുറക്കപ്പെട്ടു. ''പിതാവേ, അങ്ങേ കൈകളില് എന്റെ ആത്മാവിനെ ഞാന് സമര്പ്പിക്കുന്നു...'' എന്നു നിലവിളിച്ചുകൊണ്ട് ഈശോ മരിച്ചു. ലോക ചരിത്രത്തിലെ ഏറ്റവും വലിയ ത്യാഗം അങ്ങനെ പൂര്ത്തിയായി. മറ്റുള്ളവര്ക്കു വേണ്ടി പീഡകള് സഹിച്ച് യേശു കുരിശുമരണം പ്രാപിച്ചു. ഈ സഹന മരണത്തിലൂടെ ഈശോ മനുഷ്യര്ക്ക് നല്കിയ പുതുജീവിതത്തിന്റെ ഓര്മയാചരണമാണ് ദുഖവെള്ളി.
ഇംഗ്ലീഷില് ഈ ദിനം 'ഗുഡ് ഫ്രൈഡേ' അതായത് 'നല്ല വെള്ളി' എന്നാണ് അറിയപ്പെടുന്നത്. ഒരര്ത്ഥത്തില് ദുഖവെള്ളി സന്തോഷത്തിന്റെ ദിവസം തന്നെയാണ്. കുരിശുമരണത്തിലൂടെ യേശുദേവന് മാനവരാശിയെ പാപങ്ങളില് നിന്ന് രക്ഷിക്കുകയായിരുന്നു. ആ വലിയ നന്മയ്ക്കു വേണ്ടിയായിരുന്നു യേശുവിന്റെ കുരിശുമരണം എന്നതിനാലാണ് ഗുഡ് ഫ്രൈഡേ എന്ന പേര് വന്നത്. പാപത്തിനു മേല് നന്മ വിജയിച്ച ദിവസം. എന്നാല് ഏതു പേരില് വിളിച്ചാലും ദൈവപുത്രന് വിണ്ണില് നിന്ന് മണ്ണിലിറങ്ങി സാധാരണക്കാരനായി ജീവിച്ച്, തന്റേതല്ലാത്ത പാപങ്ങള്ക്ക് മരണം വരിച്ചതിന്റെ ഓര്മ്മപുതുക്കലാണ് ദുഖവെള്ളി. മനുഷ്യകുലത്തിന്റെ പാപങ്ങള് സ്വയം ഏറ്റെടുത്താണ് യേശു മുള്ക്കിരീടം ചൂടിയത്.
പീലാത്തോസിന്റെ ഭവനം മുതല് ഗാഗുല്ത്താമല വരെ ഭാരമേറിയ കുരിശു വഹിച്ചതും എല്ലാം മനുഷ്യകുലത്തിനു വേണ്ടിയായിരുന്നു. ഈശോയുടെ ഈ യാത്ര അവിടുത്തെ സഹനത്തിന്റെ ഏറ്റം വലിയ ഉദാഹരണമായിരുന്നു. നിരപരാധിയായിട്ടും യേശു കുരിശുമരണത്തിന് വിധിക്കപ്പെട്ടു. പീഡകള് സഹിച്ചു. പരിഹാസങ്ങള് ഏറ്റുവാങ്ങി. ഒടുവില് മരണത്തെവരിച്ചു. ക്രിസ്തുവിന്റെ കുരിശുമരണവും പുനരുത്ഥാനവുമാണ് ക്രൈസ്തവ വിശ്വാസത്തിന്റെ അടിസ്ഥാനം തന്നെ. അതുകൊണ്ടു തന്നെ ക്രിസ്തീയ ജീവിതത്തില് ഏറ്റവും വിശുദ്ധമായി ആചരിക്കേണ്ട ദിവസവും ദുഖ വെള്ളിയാണ്. ഉപവാസത്തിലൂടെയും പ്രാര്ഥനയിലൂടെയും വിശുദ്ധ ഗ്രന്ഥ പാരായണത്തിലൂടെയും ദുഖവെള്ളിയാഴ്ച ദിവസം നാം പുര്ണമായി ദൈവത്തിനു സമര്പ്പിക്കേണ്ടതുണ്ട്.
പക്ഷേ, കണ്ണീരണിഞ്ഞു നില്ക്കുകയാണ് ഈ വിശുദ്ധ വാരം. ഒറ്റുകൊടുക്കലിന്റെയും അന്ത്യത്താഴത്തിന്റെയും രാവ് പിന്നിട്ട് ദുഖവെള്ളിയിലെത്തുമ്പോള് കൊറോണയുടെ പ്രഹനമേറ്റ് സഹനമരണങ്ങള്ക്കറുതിയില്ലാതാവുന്നു. പക്ഷേ, മൂന്നാം നാള് ദൈവപുത്രന് പുനരുദ്ധാനം ചെയ്തതുപോലെ ലോക ജനത ഈ രോഗപീഡകളില് നിന്ന് ഉയിര്ത്തെഴുന്നേല്ക്കുമെന്നുതന്നെയാണ് പ്രതീക്ഷ.
കല്ലറയില് നിന്നു കല്ലു ഉരുട്ടിക്കളഞ്ഞതായി കണ്ടു. അകത്തു കടന്നാറെ കര്ത്താവായ യേശുവിന്റെ ശരീരം കണ്ടില്ല (ലൂക്കോസ് 24: 23).
ക്രിസ്തു നമ്മുടെ പാപങ്ങള്ക്കു വേണ്ടി തിരുവെഴുത്തുകളിന് പ്രകാരം മരിച്ചു അടക്കപ്പെട്ടു. തിരുവെഴുത്തുകളിന് പ്രകാരം മൂന്നാംനാള് ഉയിര്ത്തെഴുന്നേറ്റു. കേഫാവിന്നും പിന്നെ പന്തിരുവര്ക്കും പ്രത്യക്ഷനായി എന്നിങ്ങനെ ഞാന് ഗ്രഹിച്ചതു തന്നേ നിങ്ങള്ക്കു ആദ്യമായി ഏല്പിച്ചുതന്നുവല്ലോ. അനന്തരം അവന് അഞ്ഞൂറ്റില് അധികം സഹോദരന്മാര്ക്കു ഒരുമിച്ചു പ്രത്യക്ഷനായി; അവര് മിക്കപേരും ഇന്നുവരെ ജീവനോടിരിക്കുന്നു; ചിലരോ നിദ്രപ്രാപിച്ചിരിക്കുന്നു. അനന്തരം അവന് യാക്കോബിന്നും പിന്നെ അപ്പൊസ്തലന്മാര്ക്കു എല്ലാവര്ക്കും പ്രത്യക്ഷനായി. എല്ലാവര്ക്കും ഒടുവില് അകാലപ്രജപോലെയുള്ള എനിക്കും പ്രത്യക്ഷനായി...(കൊരിന്ത്യര് 15: 3-8).
തന്റെ കുരിശുമരണവും ഉയര്ത്തെഴുന്നേല്പ്പും യേശു നേരത്തെ പ്രവചിച്ചിരുന്നു. ഉയര്ത്തെഴുന്നേറ്റ ക്രിസ്തുവിനെക്കണ്ട് ശിഷ്യന്മാര് പോലും ഭയന്നു. ആണിപ്പഴുതില് കൈവിരലിട്ട് ശേഷം മാത്രമാണ് ശിഷ്യനായ തോമസ് യേശുവിന്റെ ഉയര്ത്തെഴുന്നേല്പ്പിനെ ഏറ്റുപറഞ്ഞത്. മനുഷ്യനായി ജനിച്ച ദൈവപുത്രന് ലോകം കണ്ടതില് വച്ചേറ്റവും ക്രൂരമായി വധിക്കപ്പെട്ടു. പക്ഷേ, മരണത്തെ ജയിച്ചവനായി തിരിച്ചെത്തി. മരണത്തെപ്പോലും കീഴടക്കിയ ദൈവപുത്രന് വിശ്വാസിക്ക് ഇളകാത്ത അഭയസങ്കേതമാണ്.
പുനരുദ്ധാനമെന്നത് പ്രത്യാശയാണ്. പ്രത്യാശയുടെ സന്ദേശവുമായാണ് ഈസ്റ്റര് നമ്മുടെ ഹൃദയത്തിലെയ്ക്ക് കടന്നുവരുന്നത്. മൂന്ന് പ്രാവശ്യം തള്ളിപ്പറഞ്ഞവനെയും ചേര്ത്ത് നിര്ത്തി വിശുദ്ധനാക്കിയ ദൈവപുത്രന്, മരണത്തെ ജയിച്ചതിന്റെ ഓര്മയാണ് ഈസ്റ്റര് ഞായര്. ദുഖവെള്ളിയ്ക്കും കുരിശുമരണത്തിനും ശേഷം ഒരു ഉയര്ത്തെഴുന്നേല്പ്പ് കാലത്തിന്റെ നീതിയാണ്. ഏത് പീഡന സഹനത്തിനും ഒരു പ്രതീക്ഷയുടെ പുലരി ഉണ്ടാകുമെന്ന് മനുഷ്യപുത്രന് ലോകത്തെ പഠിപ്പിച്ചു. യേശു ഉയര്ത്തെഴുന്നേല്ക്കുന്നത് വരെ, കുരിശ് അപമാനത്തിന്റെയും നിരാശയുടേയും പ്രതീകമായിരുന്നു. എന്നാല് ക്രിസ്തുവിന്റെ പുനരുത്ഥാനത്തോടെ അത് പ്രതീക്ഷയുടെ, പ്രത്യാശയുടെ പ്രതീകമായി. അതേ, ഈ വിശുദ്ധ വാരത്തില് മാനവരാശിക്കും പ്രത്യാശയുണ്ട്, മരണം വിതയ്ക്കുന്ന കോവിഡ് വൈറസിനെ ജയിക്കുമെന്ന പ്രത്യാശ. ഇന്നത്തെ ദുഖം നാളത്തെ സന്തോഷത്തിന് വഴിമാറട്ടെ.