എന്നിട്ടും എന്തേ ...? (കവിത: പുഷ്പ ബേബി തോമസ് )

നമ്മുടെ ഭൂമി ഒന്ന് ,

മുകളിൽ കുട വിടർത്തിയ ആകാശവും ഒന്ന് .

സൂര്യനും ചന്ദ്രനും നക്ഷത്രങ്ങളും ഒന്ന് .

എന്നെയും ,നിന്നെയും തലോടുന്ന കാറ്റും ഒന്നല്ലേ ??

നമ്മുടെ കിനാക്കളും

കനവിൻ നിറങ്ങളും ഒന്ന് .

നീ അറിഞ്ഞ എൻ്റെ മനവും ,

ഞാനറിഞ്ഞ നിൻ്റെ മനവും

ഒന്നു തന്നെ .

നാം നനയുന്ന മഴയും

കൊള്ളുന്ന വെയിലും

കുളിരണിയുന്ന മഞ്ഞും

പ്രണയം വിരിയും നിലാവും

വിരഹം ചുവപ്പിച്ച സന്ധ്യയും

ഇറങ്ങിയ പുഴയും

നമുക്കായി വിരിഞ്ഞ പൂക്കളും

നാം ജീവിക്കുന്ന കാലവും ഒന്ന് ,

എന്നിട്ടും എന്തേ കൂട്ടുകാരാ ...

നാമിങ്ങനെ .....

രണ്ട് നേർരേഖകളായി തുടരുന്നത് ???