അതിരാവിലെ ഉണര്ന്നു
ഇനി മക്കളെ ഉണര്ത്തണം
ഒരു ദിവസത്തിലെ ഏറ്റവും
ശ്രമകരമായ ജോലി!
ഷവറുകള് ആര്ത്തലയ്ക്കുന്നു,
ഓ, ആശ്വാസം, ഉണര്ന്നു എല്ലാവരും !
മൈക്രോവേവില് കാപ്പി റെഡിയാകുന്നു
ഒരു സ്പൂണ് സ്നേഹം ചേര്ത്ത്
അവള് അതു ഭര്ത്താവിനു നീട്ടി.
ഐഫോണില് മുഖം പൂഴ്ത്തി
അവനാ സ്നേഹം മൊത്തിക്കുടിച്ചു.
മക്കളുടെ പ്ലേറ്റില് ടോസ്റ്റും മുട്ടയും
ആപ്പിള് സ്ലൈസും കാത്തു കിടന്നു.
ഇനി തിരക്കാര്ന്ന ദൈനംദിനത്തിലേക്ക്..
െ്രെഡവ് വേയില് സ്നോയില് തെന്നിയ
കാര് വീലുകള്ക്ക് അനുസരണാമന്ത്രം
ഓതിക്കൊടുത്ത്, അവള് മെല്ലെ ഒഴുകിയിറങ്ങി.
ഓഫീസില് പുഞ്ചിരികളുടെ വരവേല്പ്പ് !
ചിലതു ഉള്ളില്തട്ടി, ചിലതു മായം കലര്ത്തി.
ചിരിയുടെ ബിസിനസ്സാകുമ്പോള്
പുഞ്ചിരിച്ചു തന്നെ വേണം തുടങ്ങാന്,
അവള് ഉള്ച്ചിരിയോടെ ഓര്ത്തു.
പല്ലുകള്, പല്ലുകള് സര്വ്വത്ര പരാതികള്!
അറ്റം പൊട്ടിയവ, വിള്ളലുകള് വീണവ,
നിരയിലല്ലെന്നും അഴകു പോരെന്നും
പരിതപിക്കുന്നവ, ആശ്വാസം തേടുന്നവ.
ഉള്ളിലെ നോവുന്ന പള്പ്പിനു പരിഹാരം
റൂട്ട്കനാല് മാത്രമോ എന്നു കേഴുന്നവ!
പല്ലുകളുമായ് ഉടമകള് തിരിച്ചു പോകെ,
പുറത്തു സൂര്യന് മറയുന്നു, ദിനമിരുളുന്നു.
വീണ്ടും സ്നേഹക്കൂട്ടിലേക്ക്
മക്കളുടെ തീരാ ഹോംവര്ക്കിലേക്ക്
ഇന്നത്തെ അത്താഴത്തിലേക്ക്
നാളത്തെ ലഞ്ച് ബോക്സിലേക്ക്
ഒടുവില് നിദ്രയുടെ മോഹതീരത്തേക്ക്.
സ്വപ്നങ്ങളില് പരിഭവങ്ങളും
പുഞ്ചിരികളും വന്നുപോകുന്നു..
സ്നേഹസ്പര്ശങ്ങളും
ചിരിമേളങ്ങളും ഇടകലരുന്നു...
നിദ്രയെന്നറിയാതെ, അവള്
വെറുതെ, ദീര്ഘം നിശ്വസിക്കുന്നു!
(Just for the fun of it. March 6th is National Dentist's Day)