ന്യൂദല്ഹി: ട്രംപിന്റെ വരവിനോടനുബന്ധിച്ച് ചെലവിട്ട തുകയില് കേന്ദ്രത്തിനെ വിമര്ശിച്ച് കോണ്ഗ്രസ് നേതാവ് പ്രിയങ്കാ ഗാന്ധി.
ട്രംപിന്റെ ഇന്ത്യന് സന്ദര്ശനത്തോടനുബന്ധിച്ച് സംഘടിപ്പിക്കുന്ന `നമസ്തേ ട്രംപിന് ' കേന്ദ്രസര്ക്കാറിന്റെ ഏത് മന്ത്രാലയമാണ് 100 കോടി അനുവദിച്ചതെന്ന് വ്യക്തമാക്കണമെന്ന് പ്രിയങ്ക ആവശ്യപ്പെട്ടു.
'' നൂറുകോടിയാണ് ട്രംപിന്റെ വരവ് പ്രമാണിച്ച് ചെലവാക്കിയിട്ടുണ്ട്. ഈ പണം ഒരു കമ്മിറ്റി വഴിയാണ് ചെലവാക്കിയത്. പക്ഷേ കമ്മിറ്റിയിലുള്ള അംഗങ്ങള്ക്ക് പോലുമറിയില്ല അവരാ കമ്മിറ്റിയില് ഉണ്ടെന്ന്.
ഇത്രയും തുക ചെലവഴിച്ചത് ഏത് മന്ത്രാലയമാണെന്ന് അറിയാനുള്ള അവകാശം രാജ്യത്തെ ജനങ്ങള്ക്കില്ലേ? കമ്മിറ്റിയുടെ പേരില് എന്താണ് സര്ക്കാര് ഒളിപ്പിച്ച് പിടിക്കുന്നത്?,'' പ്രിയങ്കാ ഗാന്ധി ചോദിച്ചു.
ട്രംപിന്റെ ഇന്ത്യാ സന്ദര്ശനത്തിനെ എതിര്ത്തുകൊണ്ട് നേരത്തേയും നിരവധിപേര് രംഗത്തെത്തിയിരുന്നു. സി.പി.ഐയും സി.പി.ഐ.എമ്മും ശിവസേനയും ട്രംപിന്റെ വരവിനെതിരെ ശക്തമായ പ്രതിഷേധം അറിയിച്ചിരുന്നു.
ഡൊണാള്ഡ് ട്രംപിനെ സ്വീകരിക്കാനായി മോദി സര്ക്കാര് നടത്തുന്ന വിപുലമായ മുന്നൊരുക്കങ്ങളെ വിമര്ശിച്ച് കോണ്ഗ്രസ് നേതാവും എം.പിയുമായ അധിര് രഞ്ജന് ചൗധരി രംഗത്തെത്തിയിരുന്നു.
70 ലക്ഷം പേര് ചേര്ന്ന് സ്വീകരിക്കാന് ട്രംപ് എന്താ ദൈവമാണോ എന്നായിരുന്നു അധിര് രഞ്ജന് പരിഹസിച്ചത്.