ഒരു ക്രിസ്മസ് കേക്കിന്റെ ഓര്‍മ്മക്കായി -മീനു എലിസബത്ത്

ശുദ്ധമായ മലയാളഭാഷയിൽ വായനക്കാർക്ക് ഇമ്പം പകരത്തക്ക വിധം പഴയതിനെ കൂട്ടി യോജിപ്പിച്ച് പുത്തനായ ആശയങ്ങൾ ചേർത്തെഴുതുവാൻ മീനുവിന് പ്രത്യേകമായ കഴിവുണ്ട്. ഓർമ്മകൾ പുതുക്കി തന്നതിന് നന്ദി. അഭിനന്ദനങ്ങൾ. 

പഴയകാല ക്രിസ്തുമസിനെ ഓർമ്മിപ്പിച്ചപ്പോൾ മീനുവിന്റെ മനസിലുള്ള ചിന്തകൾക്കും അപ്പുറമുള്ള ക്രിസ്തുമസ് രാത്രികളാണ് എന്റെ ഓർമ്മകളിൽ വന്നെത്തുന്നത്!  കോട്ടയം കളരിക്കൽ ബസാറും റസാരിയോസും  ബെസ്റ്റോട്ടലും എന്റെയും ചെറുപ്പകാലത്തുണ്ടായിരുന്നു.  കാഞ്ഞിരപ്പള്ളിയിൽ നിന്നും സ്വരാജ് ബസ്സിൽ കയറി മധുര പലഹാരങ്ങൾ  ബെസ്റ്റോട്ടലിൽ നിന്നും മേടിക്കാൻ  വരുന്നതും ഓർമ്മിക്കുന്നു.  

ക്രിസ്തുമസിന് പ്രധാനമായും കള്ളപ്പവും പന്നിയിറച്ചിയും പനം കള്ളുമായിരുന്നു വിഭവങ്ങൾ. തെങ്ങും കള്ളിന്റെ വില എട്ടണയും പനം കള്ളിന്റെ വില നാലണയും ഓർക്കുന്നു. 'കള്ളപ്പം' ഉണ്ടാക്കാൻ പനം കള്ളും ഉപയോഗിച്ചിരുന്നു. ചെത്തുന്ന പനയിൽനിന്നും ചെത്തുകാരൻ പാളയ്ക്കകത്തുനിന്നു  'മധുരക്കള്ളു'   പകർന്നുതന്നാൽ  സ്ത്രീകൾ സന്തോഷിച്ചിരുന്നു. കുപ്പിസഹിതം അവർ അകത്താക്കുമായിരുന്നു. 

ഒരു മൈൽ അകലെയുള്ള കള്ളുഷാപ്പിൽ നിന്ന് കുപ്പിയിൽ  കള്ളു മേടിച്ചുകൊണ്ടു വരുന്നതും വീട്ടിൽ എത്തുന്നവരെ അന്ന് എട്ടു വയസുകാരനായ ഞാൻ നടക്കുന്ന വഴി  പല സിപ്പുകളിലായി  കള്ളു ഉള്ളിലാക്കുന്നതും ഓർമ്മിക്കുന്നു.  പകുതി കള്ളുമായി വരുന്ന കുപ്പി കണ്ടാൽ  അമ്മച്ചിയിൽ നിന്നും ചെറു വടികൾ കൊണ്ടുള്ള അടിയും കിട്ടുമായിരുന്നു. 

ഞങ്ങൾ സഹോദരങ്ങളും അപ്പനുമൊത്ത് വർണ്ണക്കടലാസുകൾ കൊണ്ട് തെങ്ങോലയിലെ ഈർക്കിലികൾ കൂട്ടി ക്രിസ്തുമസ് നക്ഷതങ്ങൾ ഉണ്ടാക്കിയിരുന്നു. കലാവിരുതോടെ വീടിന്റെ മുമ്പിൽ നക്ഷത്രങ്ങൾ കെട്ടിത്തൂക്കിയിരുന്നു.   പള്ളിയിൽ  ക്രിസ്തുമസ് കാലങ്ങളിൽ നിറമുളള  കടലാസുകൾ കൊണ്ട് തുകർണ്ണം ഉണ്ടാക്കാനും സഹായിക്കണമായിരുന്നു. വൈദ്യുതി അന്നുണ്ടായിരുന്നില്ല. വൈവിദ്ധ്യ  നിറങ്ങൾ അടങ്ങിയ കടലാസുകൂടുകളിൽ മെഴുകുതിരികൾ കത്തിച്ച് വീടിനു ചുറ്റും അലംകൃതങ്ങളാക്കിയിരുന്നതും ഓർമ്മിക്കുന്നു.  

ക്രിസ്തുമസ് ആഘോഷിക്കാൻ അമ്മായിമാരും സമപ്രായക്കാരായ അവരുടെ മക്കളുമുണ്ടാവും. കൂടാതെ അയൽവക്കത്തുള്ള  കൂട്ടുകാരും.  പിന്നെ കുട്ടിയും കോലും കളിയും,  ഗോലി കളി , കുടുകുടു കളി , കിളി ളി, അടി, പിടുത്തം, ഓട്ടം, ചിലപ്പോൾ തെറി വിളി,  പെൺകുട്ടികൾ അക്കു കളി,  എന്നിങ്ങനെയുള്ള  വകുപ്പുകളും   ക്രിസ്തുമസ് ആഘോഷത്തോടൊപ്പമുണ്ടായിരുന്നു.