എന്റെ ഗ്രാമം (കവിത: ഡോ. ഇ.എം. പൂമൊട്ടില്‍)

SAHITHYAM 17-Dec-2019

കാലങ്ങളെത്ര കഴിഞ്ഞുവെന്നാകിലും
കാണുന്നു ഞാനെന്റെ ഓര്‍മ്മയില്‍ നിത്യം
പായുന്ന കാലമതിന്‍ താഢനങ്ങളില്‍
പാടേ തകര്‍ന്നൊരെന്‍ ഗ്രാമീണ ഭംഗി!

പക്ഷികള്‍ക്കിന്നില്ല ചേക്കേറുവാനിടം
വൃക്ഷങ്ങളില്ല, പൂന്തോട്ടങ്ങളില്ല
മുറ്റത്തൊരൂഞ്ഞാലു കെട്ടുവാന്‍ കൊമ്പില്ല,
കുഞ്ഞുങ്ങളാരുമില്ലൂഞ്ഞാലിലാടാന്‍!

കുന്നിന്‍ചെരുവിലെ മേച്ചില്‍പുറങ്ങളില്‍
തുള്ളിക്കളിച്ചു മേയുന്നൊരാ ഗോക്കളും
ശാന്തമായാഴിയെ തേടിയൊഴുകുന്ന
ശാലീനമാം പുഴ തന്നിലെ ഓളവും

ആമ്പല്‍ക്കുളങ്ങളില്‍ കണ്ണാടിനോക്കവേ
ആദിത്യരശ്മികള്‍ ചൊരിയുന്ന ശോഭയും
മന്ദസമീരനില്‍ നൃത്തമാടീടവെ
മന്ദസ്മിതംതൂകിടുന്നൊരാ പൂക്കളും

പൂമരത്തിന്‍ ബഹുചില്ലയില്‍ ചേക്കേറി
പൂങ്കുയില്‍ മീട്ടുന്ന മാധുര്യനാദവും
സന്ധ്യയ്ക്കു വീടിന്റെ ഉമ്മറത്തുള്ളിലായ്
കേള്‍ക്കുന്ന സന്ധ്യനാമജപഗീതവും
ഇന്നെന്റെ ഗ്രാമത്തിലന്യമായ് തീര്‍ന്നുവോ
ഇന്നലെകള്‍ ഇത്രവേഗം മറഞ്ഞുവോ!!

Facebook Comments

Comments.

മനോജ് തോമസ് . അഞ്ചേരി .

2019-12-20 14:45:23

അക്കാലമാണു നാം നമ്മേ പരസ്പരം നഷ്ടപ്പെടുത്തി നിറംകെടുത്തി. അക്കാലം ആണ് ഞാൻ ഉണ്ടായിരുന്നതെന്ന് ഈക്കാലമത്രെ തിരിച്ചറിഞ്ഞു . നഷ്ട്ടപ്പെടുംവരെ നഷ്ട്ടപെടുന്നതിൻ നഷ്ട്ടമെന്താണെന്ന് ഓർക്കില്ല നാം .

( കടപ്പാട് : മുരുകൻ കാട്ടാക്കട ).

എല്ലാം നഷ്‌ടപ്പെടുത്തുന്നതിന്ടടെ ഉത്തരവാദികൾ ഒരു പരിധി വരെ നമ്മൾ ഒക്കെത്തന്നെയാണ് . പൊന്മുട്ട ഇടുന്ന താറാവിനെ കൊല്ലാൻ വളരെ എളുപ്പമാണ് ... .... മനുഷ്യന്ടെ സ്വാർത്ഥ താൽപ്പര്യങ്ങൾക്കുവേണ്ടി പ്രകൃതിയെ ബലി കൊടുത്തപ്പോൾ ഉണ്ടായ അവസ്ഥ , വളരെ മനോഹരമായി കവി ആവിഷ്‌ക്കരിച്ചിരിക്കുന്നു . അഭിന്ദനങ്ങൾ .

നഷ്ട്ടപ്പെടുംവരെ നഷ്ട്ടപെടുന്നതിൻ

നഷ്ട്ടമെന്താണെന്ന് ഓർക്കില്ല നാം . നഷ്‌ടപ്പെട്ടു പോയത് വീണ്ടെടുക്കുവാൻ പറ്റാതെ വരുബോൾ ഉള്ള അവസ്ഥ (വിഷമം) . വളരെ ഭയങ്കരമാണ് .

Jyothylakshmy

2019-12-19 05:52:04

ഒരു പ്രകൃതി സ്നേഹിയുടെ വേദനിയ്ക്കുന്ന മനസ്സ് എടുത്തുകാണിയ്ക്കുന്ന വരികൾ മനോഹരമായിരിയ്ക്കുന്നു

വിദ്യാധരൻ

2019-12-17 23:51:31

പായുന്ന കാലത്തിൻ താഢനമോ

പായും മനുഷ്യന്റെ അതിമോഹങ്ങളോ ?

അത്യാർത്തി പൂണ്ട ജനത്തിനിപ്പോൾ

ധർമ്മാധർമ്മങ്ങളൊന്നും പ്രശ്നമല്ല

ചിരിച്ചുകൊണ്ടവർ കഴുത്തറക്കും