മുംബൈ: രാഷ്ട്രീയ പ്രതിസന്ധി നിലനില്ക്കുന്ന മഹാരാഷ്ട്രയില് രാഷ്ട്രപതി ഭരണത്തിന് ഗവര്ണര് ഭഗത് സിംഗ് കോഷിയാരി ശിപാര്ശ ചെയ്തു. വൈകിട്ട് ഏട്ടര വരെ എന്സിപിക്ക് സര്ക്കാരുണ്ടാക്കാന് സമയം ബാക്കിനില്ക്കെയാണ് ഗവര്ണര് രാഷ്ട്രപതി ഭരണത്തിന് ശുപാര്ശ ചെയ്തിരിക്കുന്നത്.ഭരണഘടനയുടെ അനുച്ഛേദം 356 പ്രകാരമാണ് രാഷ്ട്രപതിഭവനിലേക്ക് ശിപാര്ശ നല്കിയത്. മഹാരാഷ്ട്രയില് ഭരണഘടന പ്രകാരം സര്ക്കാര് രൂപീകരണം നടക്കില്ലെന്ന് ബോധ്യപ്പെട്ടെന്നാണ് ഗവര്ണര് പുറത്തിറക്കിയ വാര്ത്താക്കുറിപ്പില് പറയുന്നത്.
അതിനിടെ മഹാരാഷ്ട്രയില് രാഷ്ട്രപതി ഭരണത്തിന് ശുപാര്ശ ചെയ്യാന് കേന്ദ്ര മന്ത്രിസഭാ യോഗത്തില് ധാരണയായി. പ്രധാനമന്ത്രി നരേന്ദ്രമോദിയുടെ അധ്യക്ഷതയില് ഇന്നു രാവിലെ ചേര്ന്ന അടിയന്തരമന്ത്രിസഭാ യോഗം മഹാരാഷ്ട്രാ വിഷയം ചര്ച്ച ചെയ്തിരുന്നു. പ്രധാനമന്ത്രി ബ്രസീല് സന്ദര്ശനത്തിനു യാത്രതിരിക്കും മുമ്ബായിരുന്നു മന്ത്രിസഭാ യോഗം ചേര്ന്നത്. ബിജെപി എംഎല്എമാരെ എന്സിപി അധ്യക്ഷന് ശരദ് പവാര് ബന്ധപ്പെട്ട സാഹചര്യത്തിലാണ് കേന്ദ്രത്തിന്റെ അടിയന്തര നീക്കമെന്ന് സൂചന.
അതിനിടെ സര്ക്കാര് രൂപീകരിക്കാന് ഗവര്ണര് സാവകാശം നല്കുന്നില്ലെന്ന് ആരോപിച്ച് ശിവസേന സുപ്രീം കോടതിയില് ഹര്ജി നല്കി. സര്ക്കാരുണ്ടാക്കാന് സമയം നിഷേധിച്ചതിനെതിരെയാണ് ഹര്ജി. സര്ക്കാര് രൂപീകരണത്തിന് ബിജെപിക്ക് ഗവര്ണര് 48 മണിക്കൂര് സാവകാശം നല്കിയിരുന്നു. എന്നാല് തങ്ങള്ക്ക് ഗവര്ണര് 24 മണിക്കൂര് സമയം മാത്രമാണ് നല്കിയെന്ന പരാതിയാണ് ശിവസേന ഉയര്ത്തുന്നത്. ശിവസേന നേതാക്കളുടെ അടിയന്തര യോഗം ശിവസേന വിളിച്ചിട്ടുണ്ട്.