(അ)ഭദ്രം (കവിത: രമ പ്രസന്ന പിഷാരടി, ബാംഗ്ലൂര്‍)

SAHITHYAM 05-Nov-2019

ആരവങ്ങള്‍ക്കിടയിലെ നിശ്ശബ്ദ
ഭൂമിയായി ഞാന്‍ മാറുന്നിടയ്ക്കിടെ
കോടമഞ്ഞിന്‍ തണുപ്പിലേയ്ക്കായിരം
പൂവരശ്ശീന്റെ പൂക്കള്‍ കൊഴിയുന്നു

ആര്‍ത്തലച്ചുപോകുന്ന നിലവിളി
ക്കാറ്റിലുണ്ടുലത്തീക്കനല്‍ച്ചിറ്റുകള്‍
നീലമേഘമുടഞ്ഞുപോകുമ്പോഴും
ആല്‍മരച്ചില്ല കൂടൊരുക്കുമ്പോഴും
ആമ്പലിന്‍ പൂവിറുക്കുവാന്‍ പോയൊരു
ബാല്യമുണ്ട് പകച്ചു നിന്നീടുന്നു
പാതിതാഴ്ന്ന പതാകയിലെന്നുടെ
പാഴ്മുളം തണ്ട് പാടാതിരിക്കുന്നു
പോകുവാനേത് ഗ്രാമം ഭയത്തിന്റെ
തേരുരുള്‍ പാഞ്ഞുപോകുന്നു മുന്നിലായ്
കൂരിരുള്‍പടര്‍ന്നേറുന്ന ശാഖയില്‍
പ്രാണനാടുന്നു നിശ്ചലമാകുന്നു
ജീവഗന്ധമൊഴിഞ്ഞ വെണ്‍പ്രാവുകള്‍
കൂടുകള്‍ വിട്ടു യാത്രയായീടുന്നു
രാവുറങ്ങാതിരിക്കുന്ന ദു:സ്വപ്ന
ശാലയേക്കടന്നോടുന്ന കാലമേ!
നില്‍ക്കുക അല്പനേരമിരിക്കുക
നിര്‍ഭയത്തിന്റെ സത്യങ്ങളേറ്റുക
ഭൂപടങ്ങള്‍ വലിച്ചു കീറാത്തൊരു
ഭൂമിയെ തേടി സൂര്യനുണരട്ടെ.