ഹാലോവീന്‍ (കവിത: മാര്‍ഗരറ്റ് ജോസഫ്)

SAHITHYAM 02-Nov-2019

ഒക്‌ടോബര്‍ മുപ്പത്തൊന്നത്രേ,
"ഹാലോവീ'നാഘോഷദിനം;
സായാഹ്നത്തില്‍ വീഥിയിലൂടെ,
പുതുവേഷക്കാര്‍ വരവായി;

മത്തങ്ങാപ്പാത്രങ്ങളുമേന്തി,
കുട്ടിക്കൂട്ടം നിരനിരയായ്,
വീടുകള്‍തോറും കയറുന്നു,
വാതില്‍മണികള്‍ മുഴക്കുന്നു,
കതകുതുറക്കും നേരം മുന്നില്‍,
ഭീതിദരൂപിരികളായമ്പേ!
പെട്ടെന്നവരുടെ സമവാക്യം,
മാറ്റൊലിയായി കാതുകളില്‍,
"ട്രിക് ഓര്‍ ട്രീറ്റ്, 'ട്രിക് ഓര്‍ ട്രീറ്റ്'.

വര്‍ണ്ണപ്പൊതികളില്‍ മാധുര്യം,
വീട്ടുകാരുടെ സമ്മാനം,
ചോക്ലേറ്റുകളായാമോദം,
വീണ്ടും വീണ്ടും ഘോഷങ്ങള്‍;
ആവേശത്തോടീമട്ടില്‍,
വരവും പോക്കും തുടരുന്നു,
ആരവമാര്‍ത്തനമായി,
"ട്രിക് ഓര്‍ ട്രീറ്റ്, 'ട്രിക് ഓര്‍ ട്രീറ്റ്'.

മാനവരാശിക്കാദിമുതല്‍,
കാലദേശാദികളെന്യേ,
വിചിത്രമായ വിശ്വാസങ്ങള്‍,
ആചാരങ്ങളുമതുപോലെ:
പാശ്ചാത്യര്‍ ചിലര്‍ ഭവനത്തില്‍-
മുറ്റത്തെങ്ങുമൊരുക്കുന്നു,
അസ്ഥിപഞ്ജരം, തലയോട്ടി,
മൃഗരൂപങ്ങള്‍, മാറാല,
ഭയദായകമിക്കോലങ്ങള്‍,
മാടിവിളിക്കും കാഴ്ചകളായ്,
ഭൂതപ്രേത പിശാചുക്കള്‍ തന്‍,
വിളയാട്ടത്തിന്‍ വേളയിതോ?

വികലമനസ്സിന്‍ വിഹ്വലത,
അന്ധവിശ്വാസം പാകുന്ന,
ജീവിതവീഥിയിലെന്തെല്ലാം,
വിസ്മയകരമാം ദൃശ്യങ്ങള്‍!