മുംബൈ: ഇപ്പോള് എന്തു ചോദിച്ചാലും ആര്ട്ടിക്കിള് 370 എന്നു മാത്രമാണു ബിജെപിയുടെ ഉത്തരമെന്നു നയ്യകുമാര്. മുംബൈയില് നിയമസഭാ തെരഞ്ഞെടുപ്പ് പ്രചാരണ യോഗത്തില് സംസാരിക്കവെയാണു കനയ്യ സര്ക്കാരിനെതിരേ വിമര്ശനങ്ങള് ഉന്നയിച്ചത്.
തെരഞ്ഞെടുപ്പ് ഓരോ സംസ്ഥാനത്തെയും വിഷയങ്ങള് ചര്ച്ചചെയ്യാനുള്ള അവസരമാണ്. എന്നാല്, ബിജെപിയോട് ഇപ്പോള് എന്തു ചോദിച്ചാലും ആര്ട്ടിക്കിള് 370 എന്നതുമാത്രമാണ് അവരുടെ ഉത്തരം. കര്ഷകര് എന്തുകൊണ്ടാണ് ആത്മഹത്യ ചെയ്യുന്നതെന്നു ചോദിച്ചാല് ആര്ട്ടിക്കിള് 370-ല് മറുപടി വരും. രണ്ടുകോടി തൊഴില് എന്തേ ഉണ്ടാക്കിയില്ല എന്നു ചോദിച്ചാലും അതുതന്നെ ഉത്തരം. പതിനഞ്ചുലക്ഷം എന്തേ അക്കൗണ്ടില് വന്നില്ല എന്ന് ചോദിച്ചാലും ബിജെപിക്ക് ആര്ട്ടിക്കിള് 370 എന്ന ഉത്തരം മാത്രമാണുള്ളതെന്നും കനയ്യ പറഞ്ഞു.
മഹാരാഷ്ട്രയില് ജയിച്ചാല് സവര്ക്കര്ക്ക് ഭാരതരത്ന നല്കാം എന്നാണു ബിജെപിയുടെ വാഗ്ദാനം. ഭരിച്ച കാലമത്രയും ഇഷ്ടമുള്ളവര്ക്കു മാത്രമാണു ബിജെപി ഭാരതരത്ന കൊടുത്തത്. മുന്പു ചെയ്യാതെ ഇപ്പോള് മഹാരാഷ്ട്രയില് പ്രചാരണം നടത്തുന്പോള് സവര്ക്കര്, ഭാരതരത്ന എന്നൊക്കെ പറയുന്നന്നത് എന്തിനാണെന്നും കനയ്യ ചോദിച്ചു. ഭഗത് സിംഗ്, ഗാന്ധിജി, അംബേദ്കര് എന്നൊക്കെ നാഴികയ്ക്ക് നാല്പതുവട്ടം പറയുന്നവര് അവര് കാണിച്ച വഴി പിന്തുടരുകയാണ് ചെയ്യേണ്ടതെന്നും കനയ്യകുമാര് ചൂണ്ടിക്കാട്ടി.
സയണ്-കോളിവാഡാ മണ്ഡലത്തില്നിന്നു മത്സരിക്കുന്ന സിപിഐ സ്ഥാനാര്ഥി വിജയ് ദല്വിക്കുവേണ്ടി വോട്ടഭ്യര്ഥിച്ചാണു കനയ്യകുമാര് മുംബൈയില് എത്തിയത്.