ഒടിയനിലെ സൂപ്പര്ഹിറ്റ് ഗാനമായ 'ഏനൊരുവന്' എന്ന് തുടങ്ങുന്ന പാട്ട് ആലപിച്ച മോഹന്ലാലിനെ തേടി റെഡ് എഫ്.എമ്മിന്റെ മികച്ച സെലിബ്രിറ്റി ഗായകനുള്ള അവാര്ഡ് എത്തിയിരിക്കുകയാണ്. തന്റെ അമ്മയായി ഏറ്റവും കൂടുതല് സിനിമകളില് വേഷമിട്ടിട്ടുള്ള കവിയൂര് പൊന്നമ്മയില് നിന്നുമാണ് മോഹന്ലാല് ഈ അവാര്ഡ് ഏറ്റുവാങ്ങിയത്. ഇതിന്റെ ചിത്രവും അവാര്ഡ് വാങ്ങിയ വിവരവും മോഹന്ലാല് തന്നെയാണ് ആരാധകരെ അറിയിച്ചത്.
ഈ വാര്ത്ത വന്നതോടെ മോഹന്ലാലിനെ അഭിനന്ദിച്ച് രംഗത്തെത്തിയിരിക്കുകയാണ് ചിത്രത്തിന്റെ സംവിധായകനായ ശ്രീകുമാര് മേനോന്. ഈ പാട്ടിന് അവാര്ഡ് ലഭിക്കുമെന്ന് താന് നേരത്തെ തന്നെ മോഹന്ലാലിനോട് പറഞ്ഞതായി അവകാശപ്പെട്ട് അദ്ദേഹത്തെ പ്രശംസിക്കുകയാണ് ശ്രീകുമാര് മേനോന്. ഫേസ്ബുക്ക് പോസ്റ്റ് വഴിയാണ് മേനോന് ലാലിനെ അഭിനന്ദിച്ച് കൊണ്ട് രംഗത്തെത്തിയിരിക്കുന്നത്. ഈ നേട്ടത്തില് മോഹന്ലാലിനെക്കാളും സന്തോഷിക്കുന്നത് താനാണെന്നും മേനോന് പറയുന്നു.
ശ്രീകുമാര് മേനോന്റെ ഫേസ്ബുക്ക് പോസ്റ്റിന്റെ പൂര്ണരൂപം ചുവടെ:
'അഭിനന്ദനങ്ങള് ലാലേട്ടാ...
ഞാനന്നേ പറഞ്ഞതല്ലേ ഈ പാട്ടിന് ലാലേട്ടന് അവാര്ഡ് കിട്ടുമെന്ന്. അതിലാദ്യത്തേത് റെഡ് എഫ്എമ്മിന്റേതായി <3
ഞാന് ലാലേട്ടനെക്കാളും സന്തോഷിക്കുന്നു. വരികളെഴുതിയ പ്രഭാവര്മ്മ സാറിനോടും സംഗീതം നല്കിയ എം.ജയചന്ദ്രനോടുമൊപ്പം സന്തോഷം പങ്കുവെയ്ക്കുന്നു...
ഞാനിപ്പോഴുമോര്ക്കുന്നു, ലാലേട്ടന് ഏറ്റവും ആസ്വദിച്ച് പടിയ പാട്ടാണിത്. ലാലേട്ടന് പാടിയ പാട്ടുകളില് ഏറ്റവും നല്ലത് ഈ ഗാനമെന്ന് ഞാന് വിശ്വസിക്കുന്നു.'