ഐസ്‌ക്രീം പാര്‍ലര്‍ കേസ്; പുനരന്വേഷണം വേണമെന്നാവശ്യപ്പെടാന്‍ എന്ത് തെളിവുണ്ടെന്ന് വിഎസിനോട് കോടതി

കൊച്ചി: ഐസ്‌ക്രീം പാര്‍ലര്‍ കേസില്‍ പുനരന്വേഷണം ആവശ്യപ്പെട്ടുള്ള ഹര്‍ജിയില്‍ വി.എസ് അച്യുതാനന്ദന് ഹൈക്കോടതിയുടെ വിമര്‍ശം. ഐസ്‌ക്രീം പാര്‍ലര്‍കേസ് പീഡനക്കേസ് അട്ടിമറിച്ചതിന് എന്തു തെളിവാണുള്ളതെന്ന് വി.എസ്. അച്യുതാനന്ദനോട് ഹൈക്കോടതി ചോദിച്ചു. ഭരിക്കുന്നത് നിങ്ങളുടെ ഇടതു സര്‍ക്കാരല്ലേ, എന്ത് കൊണ്ട് തുടരന്വേഷണത്തിന് ഉത്തരവിടുന്നില്ലെന്നും കോടതി വി.എസിനോട് ചോദിച്ചു.

തുടരന്വേഷണം അനുവദിക്കാത്ത കീഴ്‌കോടതി ഉത്തരവിനെതിരായ വിഎസിന്റെ ഹര്‍ജി പരിഗണിക്കുമ്ബോഴായിരുന്നു ജസ്റ്റിസ് ബി. സുധീന്ദ്രകുമാറിന്റെ ചോദ്യം. അന്വേഷണം അട്ടിമറിച്ചത് ആരെന്ന് വ്യക്തമാക്കണം. ഇക്കാര്യത്തില്‍ എന്തെങ്കിലും തെളിവുകള്‍ ഹാജരാക്കിയിരുന്നോ എന്നും കോടതി ചോദിച്ചു.

വിഎസ് മുഖ്യമന്ത്രിയായിരുന്ന കാലത്തല്ലേ വിന്‍സന്‍ എം. പോളിന്റെ നേതൃത്വത്തില്‍ അന്വേഷണം നടത്തിയതെന്നും ഇപ്പോള്‍ ഇടത് സര്‍ക്കാരല്ലേ ഭരിക്കുന്നതെന്നും പുതിയതായി അന്വേഷണം നടത്തിക്കൂടെ എന്നും കോടതി ചോദിച്ചു. ഐസ്‌കീം പാര്‍ലര്‍ അട്ടിമറിക്കേസ് തീര്‍പ്പാക്കിയ കീഴ്ക്കോടതി വിധി പുനഃപരിശോധിക്കണമെന്നാവശ്യപ്പെട്ടാണ് വിഎസ് ഹൈക്കോടതിയെ സമീപിച്ചത്.