ഐ.എസ് എന്ന ഭീകരത കേരളത്തെയും ലക്ഷ്യം വെക്കുമ്പോള്‍ മലയാളി സമൂഹം ഒന്നായി ജാഗ്രത പാലിക്കണം.
ജയമോഹന്‍ എം Published on 01 May, 2019
സ്വന്തമായി ഖലിഫേറ്റ് സ്ഥാപിക്കാനുള്ള ലക്ഷ്യവുമായി ഉദയം ചെയ്ത ഇസ്ലാമിക് സ്റ്റേറ്റിന്‍റെ ആശയങ്ങള്‍ ഇങ്ങ് കൊച്ചു കേരളത്തില്‍ വന്ന് മുട്ടിവിളിക്കുന്നു എന്ന യഥാര്‍ഥ്യമാണ് ഇപ്പോള്‍ കേള്‍ക്കുന്നത്. ഐ.എസ് തീവ്രവാദി സംഘത്തിന്‍റെ സ്ലീപ്പര്‍ സെല്ലുകളിലൊരാളെ പാലക്കാട് നിന്നും എന്‍.ഐ.എ അറസ്റ്റ് ചെയ്തിരിക്കുന്നു. ക്രിസത്യന്‍ പള്ളികളിലോ തൃശ്ശൂര്‍ പൂരത്തിനോ ചാവേര്‍ സ്ഫോടനം നടത്താന്‍ പദ്ധതിയിട്ടിരുന്നതായി പിടിയിലായ റിയാസ് അബൂബക്കര്‍ വെളിപ്പെടുത്തിയതായിട്ടാണ് റിപ്പോര്‍ട്ടുകള്‍. ശ്രീലങ്കന്‍ സ്ഫോടന പരമ്പരയുടെ മുഖ്യ സൂത്രധാരനായ നാഷണല്‍ തൗഹീദ് ജമാഅത്തിന്‍റെ നേതാവ് സര്‍ഫ്രാസ് ഹാഷിമുമായി റിയാസിന് അടുത്ത ബന്ധമുണ്ടായിരുന്നു എന്ന് തെളിഞ്ഞതിനെ തുടര്‍ന്നാണ് ഇയാളെ അറസ്റ്റ് ചെയ്തിരുന്നത്. തൗഹീദ് ജമാഅത്തിന്‍റെ നേതാവ് പാലക്കാടും കോഴിക്കോടും പ്രസംഗങ്ങള്‍ നടത്തിയിരുന്നു എന്നുവരെ വെളിപ്പെടുത്തലുണ്ട്. ഇത് മാത്രമല്ല കാസര്‍കോട് നിന്ന് രണ്ടു കുടുംബങ്ങളിലെ പത്ത് പേര്‍ യെമനിലേക്ക് കടന്നതായും ഇന്‍റലിജന്‍സ് ഏജന്‍സികള്‍ സൂചിപ്പിക്കുന്നു. യെമനിലെ ഐ.എസ് കേന്ദ്രങ്ങളിലേക്കാണ് സ്ത്രീകളടക്കമുള്ള ഈ കുടുംബങ്ങള്‍ റിക്രൂട്ട് ചെയ്യപ്പെട്ടത്.
ഇറാഖിലെയും സിറിയയിലെയും ഖലിഫേറ്റ് നഷ്ടപ്പെട്ടതോടെ ഐ.എസ് അല്‍ഖ്വയിദാ മോഡല്‍ ആക്രമണങ്ങളിലേക്കും ഭീകര പ്രവര്‍ത്തനങ്ങളിലേക്കും ശ്രദ്ധ കേന്ദ്രീകരിക്കുന്നതായിട്ടാണ് ഇന്‍റലിജന്‍സ് ഏജന്‍സികള്‍ വ്യക്തമാക്കുന്നത്. ഇതോടെ ലോകത്തിന്‍റെ വിവിധ ഭാഗങ്ങളില്‍ തങ്ങളുടെ സംഘടനയെ ചെറു സംഘങ്ങളായി വ്യാപിപ്പിക്കുക എന്ന തന്ത്രമാണ് ഇപ്പോള്‍ സ്വീകരിച്ചിരിക്കുന്നത്.
താലിബാന്‍ മോഡല്‍ ഇസ്ലാമിക രാജ്യം അഥവാ ഖലിഫേറ്റ് സ്ഥാപിക്കുക എന്നതാണ് ഐ.എസിന്‍റെ ആത്യന്തിക ലക്ഷ്യം. ഇറാഖിലെയും സിറിയയിലും പിടിച്ചെടുത്ത പ്രദേശങ്ങള്‍ ചേര്‍ത്ത് ബ്രിട്ടനോളം വലുപ്പമുള്ള ഒരു സാമ്രാജ്യം അവര്‍ രൂപപ്പെടുത്തിയിരുന്നു. ഇവിടെ ശരിഅത്ത് നിയമപ്രകാരം ഭരണം നടത്തിവന്നിരുന്നു. മനുഷ്യരാശിക്ക് അംഗീകരിക്കാന്‍ കഴിയാത്ത കൊടി പീഡനങ്ങളാണ് ഇവിടെ നടപ്പാക്കപ്പെട്ടിരുന്നത്. അടിമച്ചന്തകളും ലൈംഗീക അടിമക്കച്ചവടവുമടക്കം ഗോത്രകാല രീതികളായിരുന്നു ഇവിടെ നടന്നിരുന്നത്.
ക്രിസ്ത്യാനികള്‍, സുന്നികളല്ലാത്ത മുസ്ലിം വിഭാഗങ്ങള്‍, പാപികള്‍ (സ്വവര്‍ഗ സ്നേഹികള്‍, റിബലുകള്‍, വിഗ്രഹാരാധന നടത്തുന്ന മതക്കാര്‍) എന്നിവരാണ് ഐ.എസിന്‍റെ പ്രഖ്യാപിത ശത്രുക്കള്‍. ഇവരെ ഉന്മലൂനം ചെയ്യുകയും ഹുക്കുമത്തെ ഇലാഹി അഥവാ ദൈവീക ഭരണം കൊണ്ടുവരുകയും ചെയ്യുക എന്നതാണ് പ്രഖ്യാപിത ലക്ഷ്യം.
എന്നാല്‍ ശക്തമായ തിരിച്ചടികളോടെ ഇറാഖിലെയും സിറിയയിലെയും അവസാനത്തെ നഗരങ്ങളും തുരത്തുകളും ഇസ്ലാമിക് സ്റ്റേറ്റിന് നഷ്ടമായി. മേഖലയില്‍ നിന്ന് ഇസ്ലമിക് സ്റ്റേറ്റിന്‍റെ ആധിപത്യം പൂര്‍ണ്ണമായും ഇല്ലാതാക്കി. ഇപ്പോള്‍ ഒളിവില്‍ കഴിയുന്ന ഭീകരര്‍ മാത്രമാണ് ഇസ്ലാമിക് സ്റ്റേറ്റിന് ഈ മേഖലയിലുള്ളത്. എന്നാല്‍ യെമിനിലും സിറിയയിലും, ഇറാഖിലും തുടങ്ങി മിക്ക ഇസ്ലാമിക രാജ്യങ്ങളിലും ഇവര്‍ക്ക് ശക്തമായ സ്വാധീനം ഇപ്പോഴുമുണ്ട്. എന്നാല്‍ പ്രദേശങ്ങള്‍ പിടിച്ചെടുത്ത് ഇസ്ലാമിക ഭരണം നടത്താനുള്ള ശേഷി നഷ്ടപ്പെട്ടതോടെ ഭീകരാക്രമണങ്ങളിലേക്ക് തിരിഞ്ഞിരിക്കുകയാണ് ഐ.എസ്.
ഐ.എസ് അല്‍ഖ്വയിദാ മോഡല്‍ ഘടത്തിലേക്ക് കടന്നതിന്‍റെ ആദ്യചുവടായിട്ട് വേണം ശ്രീലങ്കന്‍ ആക്രമണത്തെ കാണാന്‍. ഇതിന് തുടര്‍ച്ചയായി ലോകത്തിന്‍റെ വിവിധ ഭാഗങ്ങളിലേക്ക് അക്രമങ്ങള്‍ പടര്‍ത്തുകയാവും ഇനി ഐ.എസിന്‍റെ ലക്ഷ്യം. സ്വാഭാവികമായും ഇന്ത്യയും അവരുടെ ടാര്‍ജറ്റ് പോയിന്‍റില്‍ വരുന്ന രാജ്യമാണ്.
ഇതിന്‍റെ ഭാഗമായി കേന്ദ്രഇന്‍റലിജന്‍സ് ഏജന്‍സികള്‍ കേരള സര്‍ക്കാരിന് വ്യക്തമായ റിപ്പോര്‍ട്ട് സമര്‍പ്പിച്ചിരുന്നുവെന്നും എന്നാല്‍ അത് അവഗണിക്കപ്പെട്ടുവെന്നുമുള്ള വാര്‍ത്തയാണ് ഇപ്പോള്‍ പുറത്തു വരുന്നത്. കാസര്‍കോട്ടെ രണ്ട് കുടുംബങ്ങള്‍ യെമിനിലേക്ക് ഐ.എസ് റിക്രൂട്ട്മെന്‍റിന്‍റെ ഭാഗമായി കടന്നുവെന്ന കണ്ടെത്തലിനെ തുടര്‍ന്നാണ് കേന്ദ്ര ഇന്‍റലിജന്‍സ് കേരളത്തിലെ ഐ.എസ് പ്രവര്‍ത്തനങ്ങളെക്കുറിച്ച് കൂടുതല്‍ ജാഗരൂകരായത്. ഐ.എസ് ആശയങ്ങള്‍ സമൂഹമാധ്യമങ്ങളില്‍ തുടങ്ങി പല ഘട്ടങ്ങളായി പ്രചരിപ്പിച്ച് പിന്നീട് നേരിട്ട് രഹസ്യക്ലാസുകളിലേക്ക് വരെ എത്തിക്കുന്ന സംവിധാനമാണ് പ്രവര്‍ത്തിക്കുന്നത്. ഇതിന് സഹായിക്കുന്ന വിധം ഗ്രാമങ്ങളില്‍ പ്രവര്‍ത്തിക്കുന്ന വ്യക്തികള്‍, സംഘടനകള്‍, യുവാക്കളുടെ ഗ്രൂപ്പുകള്‍ എന്നിവരെ കണ്ടെത്തണമെന്ന് എല്ലാ പോലീസ് സ്റ്റേഷനുകള്‍ക്കും നിര്‍ദേശം നല്‍കാനും രഹസ്യനിരീക്ഷണം നടത്താനും സര്‍ക്കാരിനോട് ആവശ്യപ്പെട്ടിരുന്നു. എന്നാല്‍ ഇതൊന്നും വേണ്ടവിധത്തില്‍ പരിഗണിക്കപ്പെട്ടില്ല എന്ന് വേണം മനസിലാക്കാന്‍.
യഥാര്‍ഥ ഇസ്ലാമിക ജീവിതം നയിക്കുന്നതിലേക്ക് എന്ന നിലയില്‍ ആശയപ്രചരണം നടത്തിയാണ് യെമനിലേക്കുള്ള യാത്രയ്ക്ക് വ്യക്തികളെയും കുടുംബങ്ങളെയും പ്രേരിപ്പിക്കുന്നത്. മൗദൂസിസം പോലെയുള്ള തീവ്രആശയങ്ങള്‍ ഉപയോഗിച്ചാണ് ഈ ആശയ പ്രചരണം നടത്തുന്നത്. യഥാര്‍ഥ ഇസ്ലാമിക ജീവിതത്തെക്കുറിച്ചും ശേഷം ലഭിക്കുന്ന സ്വര്‍ഗീയ ജീവിതത്തെക്കുറിച്ചുമുള്ള പ്രചരണങ്ങളില്‍ വശംവദരാകുന്നവരാണ് പിന്നീട് യെമനിലേക്ക് കടക്കുക. പിന്നീട് ഇവര്‍ ഐ.എസ് ഭീകരപ്രവര്‍ത്തനങ്ങളുടെ ഭാഗമായി മാറുന്നു.
ഇപ്പോള്‍ പിടിയിലായ റിയാസ് എന്ന ഐ.എസ് അനുഭാവി നാട്ടില്‍ യാതൊരു വിധ തീവ്രസ്വഭാവത്തിലുള്ള സംഘടനകളിലും പ്രവര്‍ത്തിച്ചിരുന്നില്ല എന്നാണ് നാട്ടുകാര്‍ പറയുന്നത്. കടുത്ത മതവിശ്വാസിയായിരുന്നു റിയാസ്. എന്നാല്‍ നാട്ടുകാരോട് വളരെ മാന്യമായിട്ടാണ് എപ്പോഴും പെരുമാറിയിരുന്നത്. എന്നാല്‍ മൂന്ന് വര്‍ഷമായി കടുത്ത സലഫി ചിന്താഗതിയുടെ വിശ്വാസക്കാരനാണ് റിയാസ് എന്നാണ് എന്‍.ഐ.എ പറയുന്നത്. കാസര്‍കോട് നിന്ന് ഐ.എസില്‍ ചേരാന്‍ യെമനിലേക്ക് കടന്നവരുമായി റിയാസ് നിരന്തരം സമ്പര്‍ക്കം പുലര്‍ത്തിയിരുന്നു. കേരളത്തില്‍ ചാവേര്‍ സ്ഫോടനം നടത്താനുള്ള തന്‍റെ ആഗ്രഹം റിയാസ് തന്നെയാണ് ഐ.എസുമായി പങ്കുവെച്ചത്. ചാവേറായി മരണപ്പെട്ടാല്‍ സ്വര്‍ഗം ലഭിക്കുമെന്ന ഉറച്ച വിശ്വാസമാണ് ഇതിലേക്ക് റിയാസിനെ എത്തിച്ചത്. ഇത്തരം വിശ്വാസങ്ങള്‍ ചെറുപ്പക്കാരില്‍ കോമണ്‍സെന്‍സിനേക്കാള്‍ ഉപരിയായി പ്രവര്‍ത്തിപ്പിക്കാന്‍ ഐ.എസിന് കഴിയുന്നുണ്ട് എന്നതാണ് ഏറ്റവും ഭയക്കേണ്ടത്.
കേരളത്തെ ഏറ്റവും ഭീഷിണിപ്പെടുത്തുന്ന വിഷയമായി ഈ ഐ.എസ് റിക്രൂട്ട്മെന്‍റ് മാറിക്കഴിഞ്ഞുവെന്ന് തീര്‍ച്ച. ഇതിനെ മറികടക്കാനുള്ള ശ്രമങ്ങളാണ് ഇനി സര്‍ക്കാരിന്‍റെയും പൊതുജനങ്ങളുടെയും മാധ്യമങ്ങളുടെയും രാഷ്ട്രീയ പാര്‍ട്ടികളുടെയും ഭാഗത്ത് നിന്നുണ്ടാകേണ്ടത്.
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala
Without organized Religions, Madras Christian college or Velloor Medical College would not have benefitted thousands of us. There is no Atheist University or Medical hospital where Andrayos invest from his rich tower. We are in the age of gene therapy but no therapy for crazy brains that reject God the Omnipotent, Omniscience, Omnipresent.