മോഹന്‍ലാലിനെ നായകനാക്കി, പൃഥ്വിരാജ് ഒരുക്കിയ ലൂസിഫര്‍ ഇപ്പോഴും തീയേറ്ററില്‍ മികച്ച പ്രതികരണവുമായി പ്രദര്‍ശനം തുടരുകയാണ്. 150 കോടിയിലധികം കളക്ഷന്‍ ചിത്രം നേടിയെന്ന് അണിയറപ്രവര്‍ത്തകര്‍ അറിയിച്ചിരുന്നു. ഇപ്പോഴിതാ വിജയാഘോഷങ്ങളുടെ ഭാഗമായി സമ്മാനങ്ങളും പ്രഖ്യാപിച്ചിരിക്കുന്നു. പൃഥ്വിരാജ് സാമൂഹ്യമാധ്യമത്തിലൂടെയാണ്, സമ്മാനങ്ങള്‍ നല്‍കുന്ന കാര്യം അറിയിച്ചത്. സിനിമ കാണുന്നവരില്‍ നിന്ന് നറുക്കെടുപ്പിലൂടെയാണ് വിജയികളെ തെരഞ്ഞെടുക്കുക.

പൃഥ്വിരാജിന്റെ ഫേസ്ബുക്ക് പോസ്റ്റ്

മഹാവിജയത്തിന്റെ മഹാ സമ്മാനങ്ങള്‍!
26-04-2019 മുതല്‍ 16-05-2019 തീയതി വരെ കേരളത്തിലെ മാത്രം ലൂസിഫര്‍ സിനിമ പ്രദര്‍ശിപ്പിക്കുന്ന തീയേറ്ററുകളില്‍ സിനിമ കണ്ടിറങ്ങിയതിനു ശേഷം നിങ്ങളുടെ കയ്യില്‍ ഉള്ള ടിക്കറ്റ് കൌണ്ടര്‍ ഫോയിലിന്റെ മറുവശത്തു നിങ്ങളുടെ പേരും അഡ്രസ്സും ഫോണ്‍ നമ്പറും എഴുതി ഞങ്ങളുടെ ബോക്‌സില്‍ നിക്ഷേപിക്കുക. വിജയികളെ നറുക്കെടുപ്പിലൂടെ തിരഞ്ഞെടുക്കുന്നതായിരിക്കും!

സ്റ്റീഫന്‍ നെടുമ്പള്ളിയെന്ന രാഷ്ട്രീയ പ്രവര്‍ത്തകനായിട്ടാണ് മോഹന്‍ലാല്‍ സിനിമയില്‍ അഭിനയിച്ചത്. മഞ്ജു വാര്യരാണ് നായികയായി എത്തിയത്. വിവേക് ഒബ്‌റോയ് അടക്കം ഒട്ടേറെ താരങ്ങള്‍ ചിത്രത്തിലുണ്ടായിരുന്നു. മോഹന്‍ലാലിന്റെ തന്നെ പുലിമുരുകനാണ് ആദ്യമായിട്ട് 150 കോടിയിലധികം സ്വന്തമാക്കിയ മലയാള ചിത്രം.