ബംഗളുരു: കര്ണാടകയില് ബിജെപി അധ്യക്ഷന് ബി.എസ്.യെദ്യൂരപ്പയ്ക്കെതിരേ സര്ക്കാര് കുരുക്കുമുറുക്കുന്നു. യെദ്യൂരപ്പയ്ക്കെതിരേ പ്രത്യേക അന്വേഷണ സംഘത്തെ നിയോഗിക്കാന് നിയമസഭാ സ്പീക്കര് മുഖ്യമന്ത്രി എച്ച്.ഡി.കുമാരസ്വാമിയോട് ആവശ്യപ്പെട്ടു. കര്ണാടകയില് ജെഡിഎസ് എംഎല്എ കൂറുമാറുന്നതിന് 25 കോടി രൂപ വാഗ്ദാനം ചെയ്യുന്ന യെദ്യൂരപ്പയുടെ ശബ്ദരേഖ പുറത്തുവന്നതിനു പിന്നാലെയാണു നടപടി. യെദ്യൂരപ്പയുടെ ഓഡിയോ ക്ലിപ്പുകള് കൈമാറാന് മുഖ്യമന്ത്രിയോടു സ്പീക്കര് നിര്ദേശിച്ചു. വിഷയത്തില് തിടുക്കത്തില് നടപടിയെടുക്കില്ലെന്ന് സപീക്കര് കെ.ആര്.രമേശ് കുമാര് പറഞ്ഞു. അതേസമയം, പ്രത്യേക അന്വേഷണ സംഘത്തിന്റെ ആവശ്യമില്ലെന്ന് പ്രതിപക്ഷമായ ബിജെപി സഭയില് പറഞ്ഞു.
ജെഡിഎസ് എംഎല്എ കൂറുമാറുന്നതിന് 25 കോടി രൂപ വാഗ്ദാനം ചെയ്യുന്ന ശബ്ദരേഖ തന്റെയെന്നു ബിജെപി സംസ്ഥാന അധ്യക്ഷന് ബി.എസ് യെദ്യൂരപ്പ തുറന്നുസമ്മതിച്ചിരുന്നു. ശബ്ദം തന്റെയെന്നു തെളിയിക്കാനായാല് 24 മണിക്കൂറിനകം രാഷ്ട്രീയം വിടാമെന്ന് നേരത്തേ വെല്ലുവിളിച്ച യെദ്യൂരപ്പ, സ്പീക്കറും സര്ക്കാരും അന്വേഷണം പ്രഖ്യാപിക്കുമെന്ന് ഉറപ്പായതോടെ നിലപാട് മാറ്റുകയായിരുന്നു.ജനതാദള് (എസ്) എംഎല്എ നാഗനഗൗഡ കണ്ഡകൂറിന്റെ മകന് ശരണഗൗഡയുമായി കൂടിക്കാഴ്ച നടത്തിയെന്നും നാഗനഗൗഡയെ കൂറുമാറ്റി ബിജെപിയില് ചേര്ക്കുന്നതിന്റെ സാധ്യതയെ കുറിച്ച് സംസാരിച്ചുവെന്നും യെദ്യൂരപ്പ സമ്മതിച്ചു. തന്നെ കുടുക്കാന് കുമാരസ്വാമി ശരണഗൗഡയെ അയയ്ക്കുകയായിരുന്നു എന്നാണ് നിലവില് യെദ്യൂരപ്പ സ്വീകരിച്ചിരിക്കുന്ന നിലപാട്.
കര്ണാടക ബജറ്റ് അവതരിപ്പിക്കുന്നതിനു തൊട്ടുമുന്പാണ് മുഖ്യമന്ത്രി കുമാരസ്വാമി യെദ്യൂരപ്പയുടെ രണ്ടു ശബ്ദരേഖകള് പുറത്തുവിട്ടത്. സ്പീക്കര് രമേഷ് കുമാറിനെ 50 കോടി രൂപ നല്കി വശത്താക്കിയിട്ടുണ്ടെന്നും സുപ്രീംകോടതിയിലെ കാര്യങ്ങള് പ്രധാനമന്ത്രിയും അമിത് ഷായും നോക്കിക്കൊള്ളുമെന്നും യെദ്യൂരപ്പ പറയുന്നതായി ഓഡിയോയിലുണ്ട്.