കേരളവും കേന്ദ്രവും ഭരിക്കുന്നവര് വിഭിന്ന കക്ഷികളാണെങ്കിലും ജനാധിപത്യവിരുദ്ധതയില് രണ്ടുകക്ഷികളും സമാനമാണ്. അതിനാല് തന്നെ ഒരടിയന്തരാവസ്ഥയുടെ കാലൊച്ചകള് അടുത്തുവരുന്നുണ്ടോ എന്നു കരുതണം. മോഡി ഭരണം തുടങ്ങിയപ്പോള് അദ്വാനി അത് സൂചിപ്പിക്കുകയും ചെയ്തിരുന്നു.എന്നാല് പട പേടിച്ചു പന്തളത്തു ചെന്നപ്പോള് ചുട്ടും കെട്ടി പട എന്ന് പറഞ്ഞപോലെയാണ് കേരളത്തില്.സത്യത്തില് കേരളത്തില് അടിയന്തരാവസ്ഥ തുടങ്ങി.ജനാധിപത്യത്തിന്റെ കാവലാളായി മാധ്യമങ്ങളെയാണ് ഇപ്പോള് ഭരണകൂടത്തിന്റെ ഒത്താശയോടെ ചിലര് നോട്ടമിട്ടിരിക്കുന്നത്.
കേരളത്തില് മാധ്യമപ്രവര്ത്തകര്ക്കു നേരെയുള്ള യുദ്ധം രണ്ടു ദിവസമായി അല്പം തണുത്തുവെങ്കിലും ഇതിനെ ജനാധിപത്യത്തിനു നേരെയുള്ള ഒളിയുദ്ധമായി കരുതേണ്ടിയിരിക്കുന്നു. നാളെ ജനങ്ങളുടെ അവകാശങ്ങള്ക്കു നേരെയാകാം ഭരണകൂടത്തിന്റെയും പൊലിസിന്റെയും അക്രമം. വരാനിരിക്കുന്ന അത്തരമൊരു വിപത്തിനെ സമൂഹത്തെ നിരന്തരം ഓര്മിപ്പിച്ചുകൊണ്ടിരിക്കുന്ന മാധ്യമങ്ങളെ അവസാനിപ്പിക്കാനല്ല ശ്രമങ്ങളെ നമുക്ക് ചെറുക്കേണ്ടതുണ്ട്.
അറിയുവാനുള്ള പൊതുസമൂഹത്തിന്റെ അവകാശങ്ങള് പിച്ചിച്ചീന്തപ്പെടുമ്പോള്, അറിയിക്കാന് ബാധ്യതപ്പെട്ട മാധ്യമപ്രവര്ത്തകര് ലോക്കപ്പുമുറികളില് അടക്കപ്പെടുമ്പോള് ജനാധിപത്യത്തിന്റെ നാലാം തൂണാണ് തകരുന്നത്. മറച്ചുവയ്ക്കാനും ഒളിച്ചുവയ്ക്കാനുമുള്ളവരാണ് അറിയുവാനുള്ള ജനങ്ങളുടെ അവകാശങ്ങളെ അഭിഭാഷക ലഹളകളിലൂടെ, പൊലിസിന്റെ ഭ്രാന്തന് നടപടികളിലൂടെ ഇല്ലാതാക്കിക്കൊണ്ടിരിക്കുന്നത്.
ഇവരൊക്കെയും ഏതോ അദൃശ്യശക്തികളുടെ ചട്ടുകങ്ങളായി മാറുകയാണെന്ന് സംശയിക്കേണ്ടിയിരിക്കുന്നു. കഴിഞ്ഞ രണ്ടാഴ്ചകളിലായി മാധ്യമപ്രവര്ത്തകര്ക്കു നേരെ നടക്കുന്ന ആസൂത്രിത ആക്രമണങ്ങള് ഈ സംശയങ്ങളിലേക്കാണ് വിരല്ചൂണ്ടുന്നത്.
കോഴിക്കോട് ഒന്നാംക്ലാസ് മജിസ്ട്രേറ്റ് കോടതിയില് വാര്ത്ത ശേഖരിക്കാനെത്തിയ
മാധ്യമപ്രവര്ത്തകരെ വെകിളിപിടിച്ച ആളെ അനുസ്മരിപ്പിക്കുംവിധം ആക്രമിച്ച ടൗണ് എസ്.ഐ കാട്ടിക്കൂട്ടിയ സംഭവങ്ങള് നമ്മളും കണ്ടതാണ്.മനപ്പൂര്വം മാധ്യമപ്രവര്ത്തകരെ അവരുടെ കര്ത്തവ്യത്തില് നിന്നും വ്യതിചലിപ്പിക്കുവാന് നടത്തുന്ന ഇത്തരം ശ്രമങ്ങളെ അപലപിക്കേണ്ടിയിരിക്കുന്നു.
ഇന്ന് ഹൈക്കോടതിയുടെയും ഇതരകോടതികളുടെയും പരിസരത്താണ് മാധ്യമവേട്ടയാരംഭിച്ചതെങ്കില് നാളെ അത് കേരളത്തിലൊട്ടാകെ പരന്നേക്കാം. ഇന്ത്യയിലിനി ഒരിക്കലും അടിയന്തരാവസ്ഥ വരില്ലെന്ന് നാമൊക്കെ വിശ്വസിച്ചിരുന്നു. ഇന്ത്യന് ജനത ചതിക്കപ്പെട്ട വര്ഷമാണ് 1975. അന്നാണ് ഇന്ത്യയില് അടിയന്തരാവസ്ഥ പ്രഖ്യാപിച്ചത്. പൊലിസിന്റെ അമിതാധികാരത്തെയും ഭീകരവാഴ്ചയെയും ചോദ്യം ചെയ്യുന്ന മാധ്യമപ്രവര്ത്തകരെ ആദ്യം നിശ്ശബ്ദമാക്കിയാല് പൊതുസമൂഹത്തിന്റെ മുമ്പില് നിന്നും പലതും മറച്ചുവയ്ക്കാമെന്ന് ഇരുളിന്റെ മറവിലുള്ള നിഗൂഢശക്തികള് കരുതുണ്ടാകണം.
ജനാധിപത്യത്തെ തകര്ക്കാന് തക്കം പാര്ത്തിരിക്കുന്ന ദുഷ്ടശക്തികളെ പുറത്തുകൊണ്ടുവരിക എന്നത് തന്നെയാണ് മാധ്യമധര്മം. അതുവഴി മാത്രമേ ജനാധിപത്യത്തിന്റെ ശുദ്ധവായു ജനതയ്ക്ക് ശ്വസിക്കാനാവൂ.