മയാമി: ഫോമാ കണ്വന്ഷനില് ഭക്ഷണവും, സര്വീസും പരിതാപകരമായിപ്പോയതില്
ദുഖമുണ്ടെന്നും ഹോട്ടലിനെതിരേ നിയമനടപടി ആരായുമെന്നും ഫോമാ പ്രസിഡന്റ്
ആനന്ദന് നിരവേല്. നഷ്ടപരിഹാരം ആവശ്യപ്പെട്ട് ഹോട്ടലിനെതിരേ നോട്ടീസ്
നല്കിയിട്ടുണ്ട്.
ഒരു നക്ഷത്ര ഹോട്ടലില് നിന്നും ഇത്തരം നടപടികള് പ്രതീക്ഷിച്ചതല്ല.
റൂമിനും ഭക്ഷണത്തിനുമെല്ലാം നേരത്തെ തന്നെ ക്യാഷ് ആയി തുക നല്കിയതാണ്.
പക്ഷെ പണമടച്ച റൂമുകള് പോലും സമയത്തു കിട്ടിയില്ല.
ബ്രേക്ഫാസ്റ്റിനു 24.49 ഉം, 20 ഡോളറും വീതം ഒരാള്ക്ക് നല്കിയതാണ്. പക്ഷെ
നിരക്കു കുറഞ്ഞ ഹോട്ടലുകളില് സൗജന്യമായി ലഭിക്കുന്ന പ്രഭാത
ഭക്ഷണത്തേക്കാള് മേന്മയൊന്നും അതിനില്ലായിരുന്നു. ബാങ്ക്വറ്റ് ഡിന്നറിന്
ഒരാള്ക്ക് 56 ഡോളര് വീതം നല്കി. പക്ഷെ ഭക്ഷണം മോശമായി. പലര്ക്കും
സമയത്തിനു കിട്ടിയില്ല. വെള്ളം പോലും കിട്ടിയില്ലെന്നു പരാതിയുണ്ടായി.
ചുരുക്കത്തില് വിലപിടിച്ച ഭക്ഷണം ഓര്ഡര് ചെയ്തിട്ട് പരാതികള് മാത്രം
മിച്ചം.
അവിടെവെച്ച് പ്രശ്നങ്ങള് ഉണ്ടാക്കുന്നത് ഗുണകരമല്ലെന്നു കണ്ടാണ് നിശബ്ദത
പാലിച്ചത്. എന്തായാലും ഔപചാരികമായി പരാതി കൊടുത്തു. അതിനു തെളിവുകള് വേണം.
പങ്കെടുത്തവര് തങ്ങളുടെ പരാതി അറിയിച്ചാല് നമ്മുടെ വാദത്തിനു ബലമാകും.
മിക്കവരും അപ്പോഴത്തെ ദേഷ്യപ്രകടനത്തോടെ അതു മറന്നു. പലരും തന്നെ ചീത്ത
പറഞ്ഞു. അതിനു പകരം ഉണ്ടായ വിഷമത അറിയിച്ചാല് അതു തെളിവായി നല്കാനാവും.
ഇപ്പോഴത്തെ സാഹചര്യത്തില് കണ്വന്ഷന് 40,000ല് ഏറെ ഡോളറിന്റെ നഷ്ടം
വരും. പക്ഷെ ആ തുക പ്രസിഡന്റിന്റെ സ്പോണ്സര്ഷിപ്പായി നല്കും. അതോടെ
കണ്വന്ഷന് ലാഭമോ നഷ്ടമോ ഇല്ലാതെ കലാശിക്കും.
അവസാന നിമിഷം പല സ്പോണ്സര്മാരും പിന്വാങ്ങുകയാണുണ്ടായത്. 65,000
ഡോളറെങ്കിലും ഇതുമൂലം കുറവു വന്നു. ബാക്കിയുള്ള സ്പോണ്സര്മാരേയും
പിന്തിരിപ്പിക്കാനും ചിലര് ശ്രമിച്ചു. അതൊക്കെ ദുഖകരം തന്നെ.
കണ്വന്ഷന് ഒരു ഫാമിലി കണ്വന്ഷനാകുമെന്നു കരുതിയിട്ട് നടന്നില്ല.
മറിച്ച് അതൊരു ഇലക്ഷന് കണ്വന്ഷനാകുകയായിരുന്നു. ഇതിലും വിഷമമുണ്ട്.
പ്രസിഡന്റും സെക്രട്ടറിയും ഇലക്ഷനില് പക്ഷംപിടിച്ചു എന്നു പറയുന്നതില്
ഒട്ടും സത്യമില്ല. രണ്ടുകൂട്ടര്ക്കും സഹായം ചെയ്യുകയാണുണ്ടായത്.
ഏതെങ്കിലും ഭാഗത്തിനു വേണ്ടി വോട്ട് പിടിക്കാനോ, വോട്ടേഴ്സ് ലിസ്റ്റ്
കൊണ്ടുപോവുകയോ ഒന്നും ചെയ്തിട്ടില്ല. ബെന്നിയും കൂട്ടരും
ആവശ്യപ്പെട്ടതൊക്കെ ചെയ്തു കൊടുത്തിരുന്നു. ഇലക്ഷന് തലേന്ന് ഹാള്
വിട്ടുകൊടുക്കുകയും ചെയ്തു.
ഭരണഘടന പ്രകാരം ഒക്ടോബര് 219-നാണ് അധികാരം കൈമാറ്റം ചെയ്യേണ്ടത്. അതിനു
സമ്മേളനം പുതിയ ഭരണസമിതി ആഗ്രഹിക്കുന്നതിനടത്ത് നടത്തും. ഫ്ളോറിഡയില്
നടത്താനും താത്പര്യക്കുറവൊന്നുമില്ല.
സ്ഥാനമൊഴിഞ്ഞാല് താന് സ്വസ്ഥമായി എല്ലാറ്റില് നിന്നും മാറി നില്ക്കും.
എന്നാല് ഫോമയോടുള്ള പ്രതിബദ്ധത എക്കാലവും നിലനിര്ത്തും. തനിക്ക്
കിട്ടിയതിനേക്കാള് കൂടുതല് സഹകരണം പുതിയ ഭരണസമിതിക്ക് നല്കും. അവരുടെ
പ്രവര്ത്തനങ്ങളെ ശക്തമായി പിന്തുണയ്ക്കും. സംഘടനാ പ്രവര്ത്തകനെന്ന
നിലയില് എപ്പോഴും ഉറച്ചുനില്ക്കും.
മറ്റു വിവാദങ്ങളിലും ഖേദമുണ്ട്-ആനന്ദന് പറഞ്ഞു.