ചെന്നൈ: ഡിഎംഡികെ സ്ഥാപകനും നിയമസഭ പ്രതിപക്ഷ നേതാവുമായ വിജയകാന്തിനെ തമിഴ്‌നാട് നിയമസഭയില്‍ നിന്നു പത്തുദിവസത്തേക്കു വിലക്കി. ഇന്നലെ സഭയില്‍ മുഖ്യമന്ത്രി ജയലളിതയുമായി  നടത്തിയ വാക്‌പോരും തുടര്‍ന്നുണ്ടായ നാടകീയരംഗങ്ങളും അപഗ്രഥിച്ച പ്രിവിലേജസ് കമ്മിറ്റിയുടേതാണ് അച്ചടക്ക നടപടി. 

വിലക്കയറ്റത്തെ ചൊല്ലിയുള്ള പരാമര്‍ശമാണ് ഇന്നലെ സഭയില്‍ ഡിഎംഡികെ-അണ്ണാഡിഎംകെ വാക്‌പോരിന് ഇടയാക്കിയത്. അണ്ണാഡിഎംകെ അംഗങ്ങള്‍ക്കെതിരെ വിജയകാന്ത് ചില ആംഗ്യവിക്ഷേപങ്ങള്‍ കാണിക്കുകയും ചെയ്തു. ഇതിനെ നിന്ദ്യമെന്ന് മുഖ്യമന്ത്രി ജയലളിത വിശേഷിപ്പിച്ചിരുന്നു.തുടര്‍ന്ന് വിജയകാന്ത് ഉള്‍പ്പെടെയുള്ള ഡിഎംഡികെ അംഗങ്ങളെ സ്പീക്കര്‍ ഡി.ജയകുമാര്‍ പുറത്താക്കി. വിജയകാന്തിന്റെ സഭയിലെ പെരുമാറ്റം സ്പീക്കര്‍ പ്രിവിലേജസ് കമ്മിറ്റിയുടെ പരിഗണനയ്ക്കു വിടുകയായിരുന്നു.