ഈ തലേക്കെട്ട് കണ്ട പേടിക്കണ്ട, ഇത് വായിക്കാതെയുമിരിക്കണ്ട. പറഞ്ഞു
വരുന്നത് എന്റെ കുടുംബകാര്യമല്ല. നമ്മള് വന്ന വഴി മറക്കരുതെന്നു
പറഞ്ഞു പഠിപ്പിച്ച സാക്ഷാല് കേരളത്തിലെ പൊളിറ്റിക്സ് ഭൂതന്മാരുടെ
കാരണവ കുടുംബങ്ങളിലെ ചില കാര്യങ്ങളെക്കുറിച്ചാണ് പറയാന്
പോകുന്നത്. ഇത് പ്രായപൂര്ത്തിയായവര്ക്കു വേണ്ടി മാത്രമുള്ളതാണ്.
കാരണം, വോട്ടുമായി ബന്ധപ്പെട്ട കുറിപ്പാണിത്. വോട്ട്
ചെയ്യണമെങ്കില് പ്രായപൂര്ത്തിയാകണമല്ലോ... ഇനി വോട്ട് ചെയ്യാനായി
ഫ്ളൈറ്റ് പിടിച്ച് കേരളത്തില് ചെന്നിരുന്നെങ്കില് തന്നെ വോട്ട്
ഉണ്ടാകുമായിരുന്നോയെന്നത്
കണ്ടറിയണമായിരുന്നു.
മുന്നോടിയായി പറയട്ടെ: മക്കളെ തങ്ങളുടെ
പാതയിലൂടെ നടത്തിക്കാനാണ് എല്ലാ രക്ഷിതാക്കളും ശ്രമിക്കുന്നത്.
സിനിമാനടന് തന്റെ മകനെ സിനിമാ നടന് ആക്കാന് ശ്രമിക്കുന്നു.
സ്പോര്ട്സ് താരം, ബിസിനസ്സ്മാന് അങ്ങനെയങ്ങനെയങ്ങനെ. അപ്പോള്
പിന്നെ പൊളിറ്റിക്സില് അങ്ങനെ നടന്നാല് ആരെയെങ്കിലും കുറ്റം
പറയാനാകുമോ? പ്രത്യേകിച്ച് കേരള പൊളിറ്റിക്സില്. (അമേരിക്കന്
ഇലക്ഷനില് ജയിക്കാന് കേരളത്തില് നിന്നും ആളെ ഇറക്കിയ ഇവന്റ്
മാനേജ്മെന്റ് കമ്പനിയെക്കുറിച്ച് മോഹന്ലാല് പടമായ
പെരുച്ചാഴിയില് കണ്ടത് ആരും മറക്കണ്ട. ഇത്രയും ലോജിക്കില്ലാത്ത ഒരു പടം
ഇതേവരെ കണ്ടിട്ടില്ലെന്നത് മറ്റൊരു സത്യം.)
പലരുടെയും ധാരണ
പൊളിറ്റിക്സ് എന്നാല്, സാമാന്യമായ പൊതുപ്രവര്ത്തനം എന്നാണ്.
പൊതുപ്രവര്ത്തനം നടത്തുന്നവരുടെ കുടുംബം ആരു നോക്കും? അവര്ക്ക്
എവിടെ നിന്ന് കാശു കിട്ടും.? അവരുടെ വീട് എങ്ങനെ കഴിയും.? മക്കള്
എങ്ങനെ ജീവിക്കും.? അതു കൊണ്ട്, ഇങ്ങനെയുള്ളവര് വഴിപിഴച്ചു പോയവര്
എന്നായിരുന്നു ഒരു കാലത്ത് കാരണവന്മാര് പറഞ്ഞിരുന്നത്. എന്നാല്
ഇപ്പോള് സ്ഥിതി മാറിയിരിക്കുന്നു. പൊളിറ്റിക്സില് ഇറങ്ങിയ
അപ്പന്മാര് മക്കളെ കൂടി എങ്ങനെയെങ്കിലും അതിലേക്ക് തള്ളിവിട്ട്
സ്പൂണ് ഫീഡിങ് നടത്തി മുന് നിരയിലെത്തിക്കാനുള്ള ശ്രമമാണ്. കെ.എം
മാണിയുടെ മകന് ജോസ്.കെ. മാണി മുതല് അതിങ്ങനെ വളര്ന്ന് മുന്
സ്പീക്കറും പരേതനായ ജി. കാര്ത്തികേയന്റെ മകന് ശബരീനാഥ് വരെ ആ
ലിസ്റ്റില് പെടുന്നുണ്ടെന്നാണ് ഈയുള്ളവന് ഇവിടെ അമേരിക്കയില്
ലഭ്യമായ വിവരം. (ജി.കാര്ത്തികേയന് ഈ കുടുംബവാഴ്ചയെ ഏറെ
എതിര്ത്തിരുന്നയാളാണെന്നത് മറ്റൊരു കാര്യം)
കേരളത്തില്
എല്ലാം ശരിയാകുന്ന വിധത്തില് കാര്യങ്ങള് പുരോഗമിച്ചു
കൊണ്ടിരിക്കുമ്പോഴാണ് ഇങ്ങനെയൊരു വാര്ത്ത വായിക്കാനിടയായത്.
കേള്ക്കുമ്പോള് സംഗതി വെറും സിംപിളായി തോന്നുമെങ്കിലും കേരളത്തില്
ഇത്തരമൊരു സ്ഥിതി വിശേഷം കാണുമ്പോള് സ്വാഭാവികമായും പിണറായി
സഖാവ് മുഖ്യമന്ത്രിയോട് ഇവിടെ ന്യൂജേഴ്സിയില് ഇരുന്നു കൊണ്ട്
പറയാനുള്ളത്- ഈയൊരു വിഭാഗത്തില് കൂടി എത്രയും വേഗമൊരു
സര്വ്വകലാശാല തുടങ്ങണമെന്നാണ്.
ഈ തെരഞ്ഞെടുപ്പില്
അപ്പന്മാരുടെ പെരുമയുടെ പേരില് മത്സരക്കാനിറങ്ങിയ മക്കളുടെ
ലിസ്റ്റ് കണ്ടാല് ഇത് ശരിയാണെന്ന് ആര്ക്കും തോന്നിപ്പോകും.
കെ.കരുണാകരന്റെ മകള് പത്മജ വേണുഗോപാല്, ബേബി ജോണിന്റെ മകന് ഷിബു
ബേബി ജോണ്, പി.ആര് കുറുപ്പിന്റെ മകന് കെ.പി. മോഹനന്, എം.പി.
വീരേന്ദ്രകുമാറിന്റെ മകന് എം.വി ശ്രേയാംസ്കുമാര്, എം.വി രാഘവന്
മകന് എം.വി നികേഷ്കുമാര്, ആര്.പ്രകാശത്തിന്റെ മകള് ജമീല പ്രകാശം,
പി.കെ.വിയുടെ മകള് ശാരദ മോഹന്, ആര്യാടന് മുഹമ്മദിന്റെ മകന്
ആര്യാടന് ഷൗക്കത്ത്, കേരള കോണ്ഗ്രസ് സ്ഥാപകന് കെ.എം. ജോര്ജിന്റെ
മകന് ഫ്രാന്സിസ് ജോര്ജ്, തോപ്പില് രവിയുടെ മകന് സൂരജ് രവി, മുന്
എം.എല്.എ കെ.കെ തോമസിന്റെ മകന് സിറിയക് തോമസ്, എന്. രാമകൃഷ്ണന്റെ
മകള് അമൃത രാമകൃഷ്ണന് എന്നിവരാണവരില് പ്രമുഖര്.
ഇവര്ക്കൊക്കെയും ഒരു പൊതു ഗുണമുണ്ട്. എല്ലാവരും പിതാക്കന്മാരുടെ
മാനം കളഞ്ഞ് ഡീസന്റായി തോറ്റു.
ഇനി ജയിച്ചവര് അച്ഛന്മാരുടെ
പേരു കളഞ്ഞില്ല. ഇതില് പ്രധാനം. പുത്രസ്നേഹതത്പരനായ
കെ.കരുണാകരനാണ്. അദ്ദേഹത്തിന്റെ മകള് തോറ്റപ്പോള് മകന്
കെ.മുരളീധരന് ജയിച്ചു. ബാലകൃഷ്ണപിള്ളയുടെ മകന് ഗണേഷ്കുമാര്,
സി.എച്ച് മുഹമ്മദ് കോയയുടെ മകന് എം.കെ. മുനീര്, ടി.എം. ജേക്കബിന്റെ
മകന് അനൂപ് ജേക്കബ്, ജി കാര്ത്തികേയന്റെ മകന് ശബരിനാഥ്, ലീഗ്
നേതാവ് അവുഖാദര് കുട്ടിയുടെ മകന് അബ്ദുറബ്ബ്, സീതിഹാജിയുടെ
മകന് പി.കെ ബഷീര്, പി.കെ നാരായണപണിക്കരുടെ മകന് എന്. ജയരാജ്,
ജോര്ജ് ഈഡന്റെ മകന് ഹൈബി ഈഡന്, മുന്മന്ത്രി വി.കെ. രാജന്റെ മകന് വി.കെ.
സുനില്കുമാര് എന്നിവരാണ് പിതാക്കന്മാരുടെ പേര്
ഉയര്ത്തിപിടിച്ചത്. ഇനി ആരെയെങ്കിലും വിട്ടു പോയിട്ടുണ്ടെങ്കില്
മാപ്പാക്കണം. കേരളത്തിലെ 140 നിയോജകമണ്ഡലങ്ങളില് കാര്യപ്രാപ്തി
കൊണ്ട് സീറ്റ് പിടിച്ചു വാങ്ങിച്ചവരൊന്നുമല്ല ഇവരില് പലരുമെന്ന്
നിങ്ങളെ പോലെ എനിക്കുമറിയാം. ഇവരില് ചിലരൊക്കെ ചക്ക വീണു മുയല്
ചത്തതു പോലെ ജയിച്ചു. ചിലരൊക്കെ തോറ്റു തുന്നം പാടി. അങ്ങനെ
കേരളത്തിന്റെ ഗതിയെന്ത് എന്നോര്ത്ത് (ഇവിടെയായതു കൊണ്ട് ഭാഗ്യം)
അറിയാതെ ദുഃഖാര്ത്തനായി പോകുകയാണ് ഈയുള്ളവനും...
ഇല്ലാത്ത
ചക്രം മുടക്കി, വീട് പണയം വച്ചു വായ്പയെടുത്തു സ്മാര്ട്ട് ഫോണും
വാങ്ങിക്കൊടുത്ത് കേരളത്തിനു പുറത്ത് വിട്ടു പഠിപ്പിച്ച് നാലു ചക്രം
തിരിച്ചു വാങ്ങാമെന്നു പ്രതീക്ഷിക്കുന്ന എത്രയോ അപ്പന്മാരുടെ
കര്മ്മഭൂമിയാണ് കേരളം. അങ്ങനെയുള്ള കേരളത്തില് ഇനി നടക്കാന് പോകുന്നത്
എന്തൊക്കെയാണെന്നു കണ്ടറിയണം.
അമേരിക്കയില് ഇനി തെരഞ്ഞെടുപ്പു
കാലം. ട്രംപിന്റെയും ഹിലരിയുടെയും കാര്യമല്ല പറയുന്നത്. ഫൊക്കാന, ഫോമ
തുടങ്ങിയ സംഘടനകളുടെ പുതിയ ഭാരവാഹികളുടെ തെരഞ്ഞെടുപ്പ് ജൂലൈയില്
നടക്കാനിരിക്കുന്നു. പഴയ മുഖങ്ങളും പുതിയ മുഖങ്ങളുമൊക്കെ രംഗത്തുണ്ട്.
മാന്യമായ ഇടപെടലുകളാണ് ഇതേവരെ കണ്ടത്. വിഴുപ്പലക്കുകള് എപ്പോള്
തുടങ്ങുമെന്ന് പറയാറായിട്ടില്ലെങ്കിലും ചെറിയ തോതിലുള്ള
പടലപ്പിണക്കങ്ങളും കുശുകുശുപ്പുകളും തലപൊക്കി തുടങ്ങിയിട്ടുണ്ട്.
മക്കള് രാഷ്ട്രീയമില്ലെന്നതാണ് ഒരു ആശ്വാസം. ഇവിടെ പിന്നെ അങ്ങനെയാണല്ലോ.
അപ്പന് അപ്പന്റെ വഴി, മകന് മകന്റെ വഴി. അടിച്ച വഴിയെ പോകാത്തവരെ പോയ വഴിക്ക്
അടിക്കുന്നവരാണല്ലോ നമ്മള്. സംഭവാമി യുഗേ യുഗേ..