തിരുവനന്തപുരം: സംസ്ഥാന ഗവര്ണറുടെ പ്രത്യേക ചുമതലയേല്ക്കാനായി കര്ണാടക
ഗവര്ണര് എച്ച്.ആര്. ഭരദ്വാജ് കേരളത്തിലെത്തി. തിരുവനന്തപുരം
വിമാനത്താവളത്തില് അദ്ദേഹത്തിന് മുഖ്യമന്ത്രിയുടെ നേതൃത്വത്തില്
ഔദ്യോഗിക സ്വീകരണം നല്കി. രാവിലെ 10.45ന് എയര് ഇന്ത്യയുടെ വിമാനത്തിലാണ്
എച്ച്.ആര്.ഭരദ്വാജ് എത്തിയത്.
വിമാനത്താവളത്തിന്റെ ടെക്നിക്കല് ഏരിയയില് ഗാര്ഡ് ഓഫ് ഓണര് നല്കിയാണ്
സ്വീകരിച്ചത്. ഉമ്മന്ചാണ്ടിയെ കൂടാതെ സ്പീക്കര് ജി. കാര്ത്തികേയന്,
മന്ത്രിമാരായ വി.എസ്. ശിവകുമാര്, കെ. ബി.ഗണേശ്കുമാര്, തിരുവനന്തപുരം
മേയര് കെ.ചന്ദ്രിക, ചീഫ് സെക്രട്ടറി ഡോ. പി. പ്രഭാകരന്, പൊതുഭരണവകുപ്പ്
സെക്രട്ടറി കെ. ജ്യോതിലാല്, നിയമവകുപ്പ് സെക്രട്ടറി രാമരാജ പ്രേമപ്രസാദ്,
ഡി.ജി.പി. ജേക്കബ് പുന്നൂസ് എന്നിവരും സ്വീകരിക്കാനെത്തി.
കേരള ഗവര്ണര് എം.ഒ.എച്ച്. ഫാറൂഖ് ആരോഗ്യകാരണങ്ങളാല് നീണ്ട അവധിയില്
പ്രവേശിച്ചതിനെ തുടര്ന്നാണ് കര്ണാടക ഗവര്ണര്ക്ക് അധിക ചുമതല നല്കിയത്.
വൈകീട്ട് രാജ്ഭവനില് നടക്കുന്ന ചടങ്ങില് ഹൈക്കോടതി ആക്ടിങ് ചീഫ്
ജസ്റ്റിസ് മഞ്ജുള ചെല്ലൂര് സത്യവാചകം ചൊല്ലിക്കൊടുക്കും.