​കൊച്ചി: നടൻ ടിനി ടോമിനെതിരെയുള്ള അപകീർത്തി പരാതിയിൽ നടി അൻസിബ ഹസൻ കടവന്ത്ര പൊലീസ് സ്റ്റേഷനിലെത്തി വിശദമായ മൊഴി നൽകി. സംഭവത്തിൽ പൊലീസ് കേസ് രജിസ്റ്റർ ചെയ്യാൻ തയ്യാറായില്ലെങ്കിൽ നിയമപോരാട്ടവുമായി കോടതിയെ സമീപിക്കുമെന്ന് അൻസിബ മാധ്യമങ്ങളോട് വ്യക്തമാക്കി. തനിക്കെതിരെ ടിനി ടോം അപകീർത്തിപ്പെടുത്തുന്ന തരത്തിൽ സന്ദേശങ്ങൾ അയച്ചതിന് കൃത്യമായ തെളിവുകൾ കൈവശമുണ്ടെന്നും, താരസംഘടനയായ 'അമ്മ'യുടെ എക്സിക്യൂട്ടീവ് കമ്മിറ്റിയുടെ ഔദ്യോഗിക വാട്സാപ്പ് ഗ്രൂപ്പിലാണ് ഈ സന്ദേശങ്ങൾ വന്നതെന്നും അൻസിബ വെളിപ്പെടുത്തി.

​അപകീർത്തിപ്പെടുത്തലിന്റെ പരിധിയിലാണ് നിലവിൽ ഈ പരാതി നിൽക്കുന്നതെന്നാണ് മൊഴി രേഖപ്പെടുത്തിയ ശേഷം പൊലീസ് വ്യക്തമാക്കിയതെന്ന് നടി പറഞ്ഞു. ടിനി ടോം രാഷ്ട്രീയമായി വലിയ സ്വാധീനമുള്ള വ്യക്തിയാണെന്നും എന്നാൽ സർക്കാരിന്റെ ഭാഗത്തുനിന്നും തനിക്ക് നീതി ലഭിക്കുമെന്ന കാര്യത്തിൽ പരിപൂർണ വിശ്വാസമുണ്ടെന്നും അൻസിബ കൂട്ടിച്ചേർത്തു. സിനിമാ സംഘടനയ്ക്കുള്ളിലെ തർക്കങ്ങൾ പുതിയ നിയമപോരാട്ടങ്ങളിലേക്ക് നീങ്ങുന്നതിന്റെ സൂചനയാണ് നടിയുടെ ഈ നീക്കം.

​അതേസമയം അൻസിബ നൽകിയ മൊഴിയുടെയും ഡിജിറ്റൽ തെളിവുകളുടെയും അടിസ്ഥാനത്തിൽ പ്രാഥമിക പരിശോധനകൾ നടത്തിയ ശേഷമായിരിക്കും പൊലീസ് തുടർനടപടികളിലേക്ക് കടക്കുക. സിനിമാ രംഗത്തെ പ്രമുഖർ ഉൾപ്പെടുന്ന വാട്സാപ്പ് ഗ്രൂപ്പിലെ സന്ദേശങ്ങൾ പുറത്തുവന്ന പശ്ചാത്തലത്തിൽ, വിഷയത്തിൽ കൂടുതൽ താരങ്ങളുടെ മൊഴിയെടുക്കാനും സാധ്യതയുണ്ട്. വരും ദിവസങ്ങളിൽ കേസ് രജിസ്റ്റർ ചെയ്യുന്ന കാര്യത്തിൽ പൊലീസ് അന്തിമ തീരുമാനമെടുക്കും.