ഞാൻ   സ്ഫടികത്തുണ്ട്
പതുപതുത്ത വിരൽ കൊണ്ട്
തുടച്ചു മിനുക്കി ചായം പുരട്ടി
എന്നെ കണ്ണാടിയാക്കുന്നതും കാത്ത് കാത്ത്

 നീ ഇളം നിലാവ്
ഞാൻ രാത്രിയിലെഴുതുന്ന  
കവിതയ്ക്കു കസവു തുന്നുന്നവൻ
പാതിരാവിൽ എന്റെ കവിതയിൽ
മിന്നിത്തിളങ്ങുന്നത് കാത്ത് കാത്ത്

മഞ്ഞു മൂടിയ ജാലക പാളികൾ
പച്ച മാഞ്ഞുപോയ വീട്ടുമുറ്റം
മുറിയ്ക്കുള്ളിൽ നിന്റെ നിശ്വാസം
ചൂട് പകരുന്നത് കാത്ത് കാത്ത്
 
 ഞാൻ ചലനമറ്റ് ചില്ലു മൂടിയ സമുദ്രം
സ്പന്ദിക്കാതെ തേങ്ങുന്നു  
നീ വെളുവെളുത്ത സൂര്യൻ
വരും പുലരിയിൽ
എന്നെ പൊള്ളിക്കാതലിയിക്കുന്നത് കാത്ത് കാത്ത്