മനുഷ്യാ, നീയൊരു പോരാളി,
ഉയിരിന് വഴിയില് സഞ്ചാരി,
മതിയില്ലാതെ മദിക്കുന്ന-
മൃതിയത്രെ നിന് സഹചാരി.
വിധിവിളയാട്ടങ്ങള് വാഴ്വില്,
നിരന്തരം വിലപേശുമ്പോള്,
ലാഭവുമൊപ്പം നഷ്ടവുമായ്,
പ്രതിസന്ധികളില് മുന്നോട്ട്.....
മാരകവ്യാധി, മഹാമാരി,
ആളിപ്പടരുമരങ്ങത്ത്,
കരിന്തിരികത്തിത്തീരുന്നു,
ദൃശ്യങ്ങള് ഭയദായകമായ്;
നാളുകള്, നാളുകള് നീളുന്നു,
വേര്പാടിന് വേദനയോടെ;
വായ്മൂടികളിലൊളിപ്പിച്ച,
പുഞ്ചിരിയമ്പേ ദയനീയം;
മോഹക്കുതിരകള് പായുന്ന,
മായിക വീഥിയിലെപ്പോഴും,
ഭോഗങ്ങള് മൃഗതൃഷ്ണകളായ്,
മാടിവിളിക്കുന്നതിദൂരെ....
ആയുസു മുഴുവന് ഹോമിച്ച്,
നേട്ടങ്ങള്ക്കലയുന്നവരെ,
ശ്വാസക്കുമിളയില് മിന്നുന്ന,
മിന്നാമിനുങ്ങുകള് നാമെല്ലാം;
എന്തുമടിച്ചമര്ത്തീടുവാന്,
വെമ്പും വീരപരാക്രമികള്,
അകലം പാലിക്കുന്നവരായ്,
ശാന്തിക്കായിനിയെവിടേയ്ക്ക്?
മുക്തിക്കവകാശികളാക്കി,
മഹത്തരമാമേതോശക്തി,
സൃഷ്ടികളൊക്കെയവിടേയ്ക്ക്,
അനന്തമാകുമരങ്ങത്ത്....
ജീവിതമേകും യാതനയില്,
ഇടറിവീഴാത്താവരായി,
സ്നേഹവെളിച്ചം തെളിയിച്ച്,
യാനം തുടരാമനുവേലം;
സൗഭാഗ്യത്തിലഹന്തമൂത്ത്,
സ്വന്തം കഴിവുകളെന്നോര്ത്ത്,
സഹജന്മാരെ നിന്ദിച്ചിടാന്,
തന്ത്രങ്ങള് മെനയും മനസ്സേ,
സത്യത്തിന് വഴികാട്ടികളായ്,
സല്പ്രവര്ത്തികളില് മുഴുകാം;
സ്വത്വം നിഹനിക്കാത്തവരായ്,
ജന്മം സാര്ത്ഥകമാക്കുകനാം.