കേരള കോണ്‍​ഗ്രസ് എമ്മിന് ജനപിന്തുണയില്ലെന്ന  തെരഞ്ഞെടുപ്പ് അവലോകന റിപ്പോര്‍ട്ടിൽ  സി പി ഐ നേതൃത്വത്തെ കടന്നാക്രമിച്ച് കേരള കോണ്‍​ഗ്രസ് എം. പത്താം ക്ലാസ് പാസാകാത്തയാള്‍ ട്യൂട്ടോറിയല്‍ കോളജിന്റെ പ്രിന്‍സിപ്പാള്‍ ആകുന്നത് പോലെ, എന്നായിരുന്നു കാനം രാജേന്ദ്രനെ കുറിച്ച്‌ കേരള കോണ്‍​ഗ്രസ് എംന്റെ  പരിഹാസം . കേരള കോണ്‍​ഗ്രസിനെതിരായ സിപിഐ പരാമര്‍ശം ചൂണ്ടിക്കാട്ടി സിപിഎം നേതൃത്വത്തിനും കേരള കോണ്‍​ഗ്രസ് പരാതി നല്‍കിയിട്ടുണ്ട്. 

കേരള കോണ്‍​ഗ്രസിനെ കുറ്റപ്പെടുത്തുന്നത് സിപിഐയിലെ കാനം - ഇസ്മയില്‍ പോര് മറയ്ക്കാനാണെന്നും കേരള കോണ്‍​ഗ്രസ് കുറ്റപ്പെടുത്തി . 

സിപിഐയുടെ ആട്ടുംതുപ്പുമേറ്റ് കിടക്കേണ്ട ആവശ്യമില്ലെന്ന നിലപാടിലാണ് കേരള കോണ്‍​ഗ്രസ് എം നേതൃത്വം. കേരള കോണ്‍​ഗ്രസ് എമ്മിന് ജനപിന്തുണയില്ലെന്ന സിപിഐ തെരഞ്ഞെടുപ്പ് അവലോകന റിപ്പോര്‍ട്ടിൽ കുറിക്ക് കൊള്ളുന്ന മറുപടി നല്‍കി സിപിഐയുടെ വായടപ്പിക്കുന്നതിനൊപ്പം ഇനി ഇത്തരം പരാമര്‍ശങ്ങള്‍ ഉണ്ടാകാതിരിക്കാനാണ് കേരള കോണ്‍​ഗ്രസ് എം മുന്നണി നേതൃത്വത്തിന് പരാതി നല്‍കുന്നത്. തങ്ങളേക്കാള്‍ ശക്തരായ പാര്‍ട്ടിയോടുള്ള അസൂയയാണ് സിപിഐ പ്രകടിപ്പിക്കുന്നത് എന്നാണ് കേരള കോണ്‍​ഗ്രസ് എം വാദം .

തെരഞ്ഞെടുപ്പിലും അതിന് ശേഷവും സിപിഐ യോജിച്ച്‌ പ്രവര്‍ത്തിക്കുന്നില്ലെന്നും എതിര്‍ ചേരിയിലുള്ളവരോടെന്ന പോലെയാണ് സിപിഐ പെരുമാറുന്നതെന്നും  കേരള കോണ്‍​ഗ്രസ് ആരോപിക്കുന്നു.