എയ്ല്സ്ഫോര്ഡ്: ഇംഗ്ലണ്ടിലെ പ്രശസ്ത മരിയന് തീര്ഥാടന കേന്ദ്രമായ എയ്ല്സ്ഫോര്ഡ് പ്രയറിയില് ഗ്രേറ്റ് ബ്രിട്ടന് രൂപതയുടെ നേതൃത്വത്തില് നടത്തിവരാറുള്ള മരിയന് തീര്ഥാടനം ഒക്ടോബര് 2 നു (ശനി) നടക്കും.
രൂപതാ സമൂഹം ഒരുമിച്ചു പരിശുദ്ധ അമ്മയുടെ സംരക്ഷണം പ്രാര്ത്ഥിക്കുകയും ദൈവിക അഭിഷേകം സ്വീകരിക്കുകയും ചെയ്യുന്ന ഭക്തിസാന്ദ്രമായ ഈ തിരുനാളില് സംബന്ധിക്കുവാന് ബ്രിട്ടന്റെ വിവിധ ഭാഗങ്ങളില് നിന്നുമായി നിരവധി വിശ്വാസികളാണ് ഇവിടെയെത്തുന്നത്. രൂപതാധ്യക്ഷന് മാര് ജോസഫ് സ്രാമ്പിക്കല് തീര്ഥാടനത്തിനു നേതൃത്വം നല്കും.
1251 ല് വിശുദ്ധ സൈമണ് സ്റ്റോക്കിനു പരിശുദ്ധ അമ്മ പ്രത്യക്ഷപ്പെട്ട്, തന്റെ സംരക്ഷണത്തിന്റെ അടയാളമായ വെന്തിങ്ങ (ഉത്തരീയം) വിശുദ്ധനു നല്കിയത് എയ്ല്സ്ഫോഡില് വച്ചാണ്. വെന്തിങ്ങ ധരിക്കുന്ന സുറിയാനി ക്രിസ്ത്യാനികളുടെ പാരമ്പര്യം ആരംഭിക്കുന്നത് ഇവിടെ നിന്നാണ്. വിശുദ്ധ സൈമണ് സ്റ്റോക്കിന്റെ ഭൗതികാവശിഷ്ടം സൂക്ഷിക്കപ്പെട്ടിരിക്കുന്നത് എയ്ല്സ്ഫോര്ഡിലെ റെലിക് ചാപ്പലിലാണ്. പരിശുദ്ധ അമ്മയുടെ മാധ്യസ്ഥം യാചിച്ചെത്തുന്ന നാനാജാതി മതസ്ഥരുടെ ആശാകേന്ദ്രംകൂടിയാണ് ഈ പുണ്യഭൂമി.
ഒക്ടോബര് 2നു ഉച്ചക്ക് 12 നു കര്മലമാതാവിന്റെ തിരുസ്വരൂപവും വഹിച്ചുകൊണ്ട് ജപമാലരാമത്തിലൂടെ നടത്തുന്ന ജപമാലയോടുകൂടി തീര്ഥാടന പരിപാടികള് ആരംഭിക്കും. തുടര്ന്നു ഒരു മണിക്ക് രൂപതാധ്യക്ഷന് മാര് ജോസഫ് സ്രാമ്പിക്കലിന്റെ മുഖ്യ കാര്മികത്വത്തില് ആഘോഷമായ തിരുനാള് കുര്ബാന അര്പ്പിക്കും. തുടര്ന്നു വിശുദ്ധരുടെ തിരുസ്വരൂപങ്ങളും വഹിച്ചുകൊണ്ടുള്ള ആഘോഷമായ തിരുനള് പ്രദക്ഷിണം നടക്കും. സമാപനശീര്വാദത്തിനു ശേഷം വൈകുന്നേരം നാലിന് സ്നേഹവിരുന്നും ഉണ്ടായിരിക്കും.
രൂപതയിലെവിവിധ മിഷനുകളില് നിന്നും ഇടവകകളില് നിന്നുമുള്ള വൈദികര്, സന്യാസിനികള്, റീജണല് കമ്മിറ്റി അംഗങ്ങള്, അല്മായര് തുടങ്ങിയവര് തിരുനാളിനു നേതൃത്വം നല്കും.
തിരുനാളിനോടനുബന്ധിച്ച് നേര്ച്ചകാഴ്ചകള് സമര്പ്പിക്കുന്നതിനും കഴുന്ന്, മുടി, അടിമ എന്നിവ വയ്ക്കുന്നതിനും സൗകര്യം ഉണ്ടായിരിക്കും. തിരുനാള് പ്രസുദേന്തിമാരാകാന് ആഗ്രഹമുള്ളവര് തിരുനാള് കമ്മറ്റിയുമായി ബന്ധപ്പെടേണ്ടതാണ്. തീര്ഥാടന ഒരുക്കത്തിന്റെ ഭാഗമായി സെപ്റ്റംബര് 23 (വ്യാഴം) മുതല് എല്ലാ ദിവസവും വൈകിട്ട് 6 മുതല് 7 വരെ ഓണ്ലൈനില് പ്രത്യക പ്രാര്ത്ഥനയും വചന ശുശ്രൂഷയും ക്രമീകരിച്ചതായി രൂപത കേന്ദ്രത്തില് നിന്നും അറിയിച്ചു.
മഹാമാരിയുടെയും പ്രതിസന്ധികളുടെയും ഈ കാലത്ത് തിരുനാളില് സംബന്ധിച്ച് പരിശുദ്ധ അമ്മയുടെ സംരക്ഷണം പ്രത്യേകമായി ലഭിക്കുവാനും ദൈവാനുഗ്രഹം പ്രാപിക്കുവാനും ഏവരെയും രൂപതാധ്യക്ഷന് മാര് ജോസഫ് സ്രാമ്പിക്കല് സ്വാഗതം ചെയ്തു.