കോട്ടയം: കോട്ടയം ജില്ലയില് വിവിധ പോലീസ് സ്റ്റേഷനുകളിലായി നിരവധി ക്രിമിനല് കേസുകളില് പ്രതിയായിരുന്ന അമ്മഞ്ചേരി സിബിയെ ആണ് തൂങ്ങി മരിച്ച നിലയില് കണ്ടെത്തിയത്. കോട്ടയം അതിരമ്ബുഴ അമ്മഞ്ചേരി ഗാന്ധിനഗര് ഹൗസിംഗ് കോളനിയിലെ വാടക വീട്ടിനു പുറകുവശത്താണ് രാവിലെ മൃതദേഹം കണ്ടത്. മാന്നാനം അമലഗിരി ഗ്രേസ് കോട്ടേജില് ജോണിന്റെ മകന് ആണ് അമ്മഞ്ചേരി സിബി എന്നു വിളിക്കുന്ന സിബി ജി. ജോണ്. വാടക വീടിന്റെ അടുക്കള വശത്ത് ഗ്രില്ലിനോടു ചേര്ന്നാണ് മൃതദേഹം കണ്ടെത്തിയത്. കോട്ടയം ഗാന്ധിനഗര് പോലീസ് സംഭവസ്ഥലത്തെത്തി മേല് നടപടികള് സ്വീകരിച്ചു.
അമ്മഞ്ചേരി സിബി തൂങ്ങിമരിച്ചത് ആകാമെന്ന പ്രാഥമികനിഗമനം ആണ് ഗാന്ധിനഗര് പോലീസ് നടത്തുന്നത്. എന്നാല് ആത്മഹത്യയ്ക്ക് കാരണമെന്ത് എന്ന് വ്യക്തമല്ല.സംഭവ സ്ഥലത്ത് ടെറസില് കയറാന് ഉപയോഗിച്ച ഏണിയും ഒഴിഞ്ഞ മദ്യക്കുപ്പിയും വെള്ളക്കുപ്പിയും പോലീസ് കണ്ടെത്തിയിട്ടുണ്ട്. പ്ലാസ്റ്റിക് കയര് കഴുത്തില് കെട്ടിയ ശേഷം താഴേക്ക് ചാടുകയായിരുന്നു എന്നാണ് പൊലീസ് നടത്തുന്ന വിലയിരുത്തല്. ടെറസില് കെട്ടിയ കയര് താഴേക്ക് വലിഞ്ഞു കിടക്കുകയായിരുന്നു. പുതിയ പ്ലാസ്റ്റിക് കയറില് ആണ് തൂങ്ങിയ നിലയില് മൃതദേഹം കണ്ടെത്തിയത്.
കോട്ടയം ജില്ലയില് ഗാന്ധിനഗര് പോലീസ് സ്റ്റേഷന് പരിധിയിലാണ് ഇയാള് ഏറെയും കുറ്റകൃത്യങ്ങള് ചെയ്തിട്ടുള്ളത്. ഇവിടെ മാത്രം നിരവധി കേസുകള് പ്രതിക്കെതിരെ ഉണ്ട്. സമീപ സ്റ്റേഷനുകളില് രജിസ്റ്റര് ചെയ്തിട്ടുള്ള പല കേസുകളിലും അമ്മഞ്ചേരി സിബി പ്രതിയാണ്. കൊലപാതകശ്രമം അടക്കമുള്ള ഗൗരവമേറിയ കുറ്റങ്ങളും ഇയാള് ചെയ്തിട്ടുണ്ട്. പോലീസിനെ ആക്രമിച്ച കേസിലും അമ്മഞ്ചേരി സിബി പ്രതിയാണ്. പോലീസ് വാഹനം തല്ലിത്തകര്ത്ത കേസും ഇയാള്ക്കെതിരെ ഗാന്ധിനഗര് പോലീസ് ചുമത്തിയിട്ടുണ്ട്.