തോല്വിയെക്കുറിച്ച് പഠിക്കാന് ഹൈക്കമാന്ഡ് നിയോഗിച്ച അന്വേഷണ സമിതിക്കു മുമ്പില് പാര്ട്ടിയിലെ സംഘടനാ ദൗര്ബല്ല്യങ്ങല് എണ്ണിഎണ്ണിപ്പറഞ്ഞ രമേശ് ചെന്നിത്തല താന് മികച്ച പ്രവര്ത്തനം നടത്തിയിട്ടും തെരഞ്ഞെടുപ്പില് പരാജയപ്പെടാന് കാരണം പാര്ട്ടിയിലെ സംഘടനാ ദൗര്ബല്ല്യമാണെന്നാണ് പറഞ്ഞു വച്ചത്. ചെന്നിത്തലയുടെ ഈ പ്രതികരണം കൊണ്ടതാക്കട്ടെ നേരെ മുല്ലപ്പള്ളി രാമചന്ദ്രനും. പരാജയം സംഘടനാ ദൗര്ബല്ല്യം കൊണ്ടാണെങ്കില് അതിന്റെ ഉത്തരവാദി കെപിസിസി പ്രസിഡന്റാണെന്ന് സ്വാഭാവികമായും ചര്ച്ചവരും. ചെന്നിത്തല തന്റെ നേട്ടങ്ങള് എണ്ണിപ്പറയുകയും കൂടി ചെയ്തതോടെ പ്രതിപക്ഷം നന്നായി പ്രവര്ത്തിച്ചു എന്നാല് പാര്ട്ടി സംവിധാനം പോരായിരുന്നു എന്നതായിരുന്നു ഉദ്ദേശിച്ചതെന്ന് വ്യക്തം
എന്നാല് അശോക് ചവാന് സമിതിക്കു മുമ്പില് കാര്യങ്ങള് പറഞ്ഞ് 24 മണിക്കൂര് തികഞ്ഞില്ല ഇതാ കിടക്കുന്നു ചെന്നിത്തലയുടെ ഫേസ് ബുക്ക് പോസ്റ്റ്. മുല്ലപ്പള്ളിയെ ആരെങ്കിലും വിമര്ശിച്ചിട്ടുണ്ടെങ്കില് അവര് പശ്ചാത്തപിക്കേണ്ടിവരുമെന്നും. മുല്ലപ്പള്ളിയോളം ആദര്ശ ധീരനായ ഒരു നേതാവിനെ കണ്ടിട്ടില്ലെന്നും. മുല്ലപ്പള്ളിയോട് മാത്രമല്ല അദ്ദേഹത്തിന്റെ കുടുംബത്തോട് പോലും കോണ്ഗ്രസ് പാര്ട്ടി നീതി കാട്ടിയില്ലെന്നുമൊക്കെയായിരുന്നു ഫേസ് ബുക്ക് പോസ്റ്റില് പരാമര്ശിച്ചത്. ഒറ്റ രാത്രികൊണ്ടുണ്ടായ സ്നേഹം പാര്ട്ടി അണികളെ പോലും അത്ഭുതപ്പെടുത്തി.
എന്നാല് ഇതിനുശേഷമാണ് അകത്തളത്തിലെ കഥകള് പുറത്ത് വന്നത്. ചെന്നിത്തല പാര്ട്ടി സംവിധാനത്തെ കുറ്റപ്പെടുത്തിയതില് കടുത്ത അതൃപ്തിയും അമര്ഷവും മുല്ലപ്പള്ളി ചെന്നിത്തലയേയും ഉമ്മന് ചാണ്ടി അടക്കമുള്ള നേതാക്കളേയും വിളിച്ചറിയിച്ചുവെന്നാണ് വിവരം. ഇതേ തുടര്ന്നാണ് ചെന്നിത്തല മുല്ലപ്പള്ളിയെ അനുകൂലിച്ചുകൊണ്ട് ഫേസ്ബുക്ക് പോസ്റ്റിട്ടത്.
എന്തായാലും പാര്ട്ടി സംവിധാനത്തെ ചെന്നിത്തല ഹൈക്കമാന്ഡ് പ്രതിനിധിക്കു മുമ്പില് കുറ്റപ്പെടുത്തിയതോടെ മുല്ലപ്പള്ളി സ്വയമൊഴിയുകയാണെന്ന് ഹൈക്കമാന്ഡിനെ അറിയിച്ചു. ഹൈക്കമാന്ഡ് രാജി ആവശ്യപ്പെട്ടാല് രാഷ്ട്രീയമായി തനിക്കത് തിരിച്ചടിയാകുമെന്ന് മനസ്സിലാക്കിയായിരുന്നു മുല്ലപ്പള്ളി രാമചന്ദ്രന്റെ നീക്കം. എന്തായാലും ചെന്നിത്തലയുടെ നിലപാട് മാറ്റം കേരളരാഷ്ട്രിയത്തില് ചര്ച്ചയായിക്കഴിഞ്ഞു.