ഓക്‌സ്‌ഫോര്‍ഡ് സര്‍വ്വകലാശാലയുടെ സഹകരണത്തോടെ ഇന്ത്യയില്‍ നിര്‍മ്മിക്കുന്ന വാക്‌സിന്റെ വിത്യസ്തപേരുകള്‍ പ്രവാസികളെ ബുദ്ധിമുട്ടിലാഴ്ത്തുന്നു. ഇന്ത്യയില്‍ ഈ വാക്‌സിന്‍ കോവിഷീല്‍ഡ് എന്നാണ്  അറിയപ്പെടുന്നത്. വിദേശരാജ്യങ്ങളിലാകട്ടെ ഇതിന്റെ പേര് അസ്ട്രാസെനക എന്നാണ്. അതു കൊണ്ട് തന്നെ പല വിദേശ രാജ്യങ്ങളും തങ്ങളുടെ രാജ്യത്ത് പ്രവേശിക്കാനായി എടുക്കേണ്ട അംഗീകൃത വാക്‌സിനുകളുടെ ലിസ്റ്റില്‍ അസ്ട്രാസെനക എന്നാണ് രേഖപ്പെടുതതിയിരിക്കുന്നത്. 

ഗള്‍ഫ് രാജ്യങ്ങളായ സൗദി , ഖത്തര്‍ , ഒമാന്‍, കുവൈറ്റ്, ബഹ്‌റൈന്‍, യുഎഇ എന്നിവിടങ്ങളിലും ഇത് അറിയപ്പെടുന്നത് അസ്ട്രാസെനക് എന്നാണ്. ഇവര്‍ പുറത്തിറക്കിയിരിക്കുന്ന പട്ടികയില്‍ കോവിഷീല്‍ഡ് ഇല്ല. അസ്ട്രാസെനക് വാക്‌സിന്‍ രണ്ട് ഡോസും പൂര്‍ത്തിയാക്കിയവര്‍ക്കും അല്ലെങ്കില്‍ ഒരു ഡോസ് എടുത്ത് 14 ദിവസമെങ്കിലും കഴിഞ്ഞവര്‍ക്കും ഈ രാജ്യങ്ങളില്‍ പ്രവേശിക്കാം മാത്രമല്ല ക്വാറന്റൈന്‍ നിബന്ധനകളിലും ഇളവുണ്ട്.

എന്നാല്‍ വാക്‌സിന്‍ ഒന്നു തന്നെയാണെങ്കിലും ഇന്ത്യയില്‍ നിന്നും കോവിഷീല്‍ഡ് വാക്‌സിന്‍ എടുത്തവര്‍ക്ക് ഈ ഇളവുകളുടെ പ്രയോജനം ലഭിക്കുന്നില്ല. ഇത് പ്രവാസികളെ ഏറെ ബുദ്ധിമുട്ടിലാഴ്ത്തുന്നുണ്ട്. പലര്‍ക്കും രണ്ട് ഡോസ് വാക്‌സിന്‍ എടുത്തിട്ടും തിരികെ പോകാന്‍ കഴിയാത്ത അവസ്ഥയാണ്. ഇക്കാര്യത്തില്‍ കേന്ദ്ര സര്‍ക്കാരിന്റെ അടിയന്തിര ഇടപെടല്‍ ഉണ്ടായില്ലെങ്കില്‍ പലരുടെയും തൊഴില്‍ നഷ്ടമാകുന്ന അവസ്ഥയാണ്. 

കേന്ദ്രം ഈ രാജ്യങ്ങളുമായി ബന്ധപ്പെട്ട് കോവിഷീല്‍ഡ് ലിസ്റ്റില്‍ ഉള്‍പ്പെടുത്താന്‍ ആവശ്യപ്പെടണം അതല്ലെങ്കില്‍ കോവിഷീല്‍ഡ് എടുത്തവരുടെ സര്‍ട്ടിഫിക്കറ്റില്‍ അസ്ട്രാസെനക് എന്ന് രേഖപ്പെടുത്തുകയോ ചെയ്യണം. ഇല്ലെങ്കില്‍ കൃത്യമായി വാക്‌സിന്‍ എടുത്തിട്ടും ജോലിക്ക് പ്രവേശിക്കാന്‍ സാധിക്കാതെ ലക്ഷക്കണക്കിന് പ്രവാസികള്‍ പ്രതിസന്ധിയിലാവും.