Image

കദനമഴ (കവിത: ജിസ പ്രമോദ്)

Published on 15 May, 2021
കദനമഴ (കവിത: ജിസ പ്രമോദ്)
മഴ പെയ്യുന്നുണ്ട്
ശക്തമായി
ഇരുണ്ടു മൂടി.

മിന്നൽപക്ഷികൾ
ഭൂമിയെ ചുംബിച്ചു
മടങ്ങുന്നുണ്ടിടയ്ക്ക്.

വീഥികൾ വിജനങ്ങളും
വീടകങ്ങൾ
ശബ്‍ദമുഖരിതവുമാണ്.

മഴയ്‌ക്കൊപ്പം പെയ്യുന്ന
മഹാമാരി
ഒരുമയുടെ അകത്തളങ്ങളെ
വീർപ്പുമുട്ടിക്കുന്നുണ്ട്.

അളവ് കുറഞ്ഞു വരുന്ന
ധാന്യപാത്രങ്ങൾ
ആശങ്ക നിറയ്ക്കുന്നുണ്ട്.

പുഴയിലൂടൊഴുകുന്ന
പ്രേതങ്ങൾ
പോസിറ്റീവ് എനർജിയെ
നിർവീര്യമാക്കുന്നുണ്ട്.

ദൂരെത്തെവിടെയോ
യുദ്ധകാഹളം.
പൊലിഞ്ഞു പോകുന്ന
ജീവനുകൾ
നെഞ്ചിലെ പിടച്ചിൽ
കൂട്ടുന്നുണ്ട്.

നിസഹായത
നിറഞ്ഞ
പേടിച്ചരണ്ട
കുഞ്ഞുമുഖങ്ങൾ
ഉറക്കം കെടുത്തുന്നു.

കടൽകയറിയോരുകൂട്ടം
അഭയത്തിനായ്
നെട്ടോട്ടമൊടുന്നുണ്ട്.

ഒക്കെയുമോർത്തോർത്ത്
മനസ്സിലൊരു
കദനമഴ പെയ്യുന്നുണ്ട്.

പുറത്തിപ്പോഴും
മഴ പെയ്യുന്നുണ്ട്.
ഇരുണ്ടുകുത്തി
ശക്തമായി തന്നെ.


Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക