മലയാള സിനിമയില്‍ വില്ലന്‍ വേഷങ്ങളും, കോമഡി വേഷങ്ങളും, സ്വഭാവ വേഷങ്ങളും മികവുറ്റ രീതിയില്‍ അവതരിപ്പിക്കുന്ന മലയാള സിനിമയിലെ മാറ്റി നിര്‍ത്താനാവാത്ത മികവുറ്റ കലാകാരനാണ് സിദ്ദിഖ്. താന്‍ അഭിനയിക്കാന്‍ തിരഞ്ഞെടുക്കുന്ന സിനിമകള്‍ എന്താണോ അതുതന്നെയാണ് തന്റെ സിനിമ കാഴ്ചപ്പാട് എന്ന് തുറന്ന പറഞ്ഞിട്ടുള്ള സിദ്ദിഖ് ഒരു അഭിമുഖ പരിപാടിയില്‍ വേറിട്ട ഒരു അനുഭവം പങ്കുവയ്ക്കുകയാണ്.

സിനിമാ താരങ്ങളുടെ ഉദ്ഘാടന പരിപാടികള്‍ സോഷ്യല്‍ മീഡിയയില്‍ മിക്കപ്പോഴും വൈറല്‍ ആകാറുണ്ട്. അവരുടെ സാന്നിധ്യം ആ പ്രോഗ്രാമിന് വലിയ താരമൂല്യം സൃഷ്ടിക്കുമ്ബോള്‍ താന്‍ ഉദ്ഘാടനം ചെയ്യാനെത്തുന്ന പരിപാടികളില്‍ മറ്റാരും ചോദിക്കാത്ത ഒരു ചോദ്യം വിളിക്കുന്നവരോട് ചോദിക്കാറുണ്ട് എന്ന് തുറന്നുപറയുകയാണ് സിദ്ദിഖ്.

'എന്നെ ഉദ്ഘാടനത്തിന് ക്ഷണിക്കുമ്ബോള്‍ ഞാന്‍ അവരോട് ചോദിക്കുന്ന ഒരു കാര്യമുണ്ട്. നിങ്ങളുടെ അച്ഛനോ അമ്മയോ ആരെങ്കിലും അവിടെ ഉണ്ടാകുമോ? എന്നേക്കാള്‍ പ്രാധാന്യം അവര്‍ക്ക് നല്‍കണമെന്നും, ഒരു സെലിബ്രിറ്റി എന്ന നിലയില്‍ ഞാന്‍ ആഗ്രഹിക്കുന്ന നന്മയേക്കാള്‍ നിങ്ങളുടെ നന്മ ആഗ്രഹിക്കുന്നത് അവരാണെന്നും അതുകൊണ്ട് അവര്‍ കാലെടുത്തുവെച്ചിട്ടാണ് നിങ്ങളുടെ സംരംഭം ആരംഭിക്കേണ്ടതെന്നും ഞാന്‍ അവരോടു പറയും'. സിദ്ദിഖ് പറഞ്ഞു.