കോവിഡിനെ തുരത്താന്‍ ഗോമൂത്രം കുടിക്കാനുള്ള ആഹ്വാനവുമായി വീണ്ടും ഒരു ബിജെപി എംഎല്‍എ. ഉത്തര്‍പ്രദേശില്‍ നിന്നുള്ള എംഎല്‍എയായ സുരേന്ദ്രസിംഗാണ് ഈ വിചിത്രവാദം ഉന്നയിച്ചിരിക്കുന്നത്. രോഗപ്രതിരോധത്തിന് ഇത് ഏറെ ഉത്തമമാണെന്നാണ് ഇദ്ദേഹത്തിന്റെ പക്ഷം. 

സുരേന്ദ്രസിംഗ് ഗോമൂത്രം കുടിക്കുന്ന ചിത്രവും ഇതോടൊപ്പം കൊടുത്തിട്ടുണ്ട് . വെള്ളത്തില്‍ ചേര്‍ത്ത് കുടിക്കാനാണ് എംഎല്‍എയുടെ ഉപദേശം. ബെല്ലിയ ജില്ലയിലെ ബെരിയയില്‍ നിന്നുള്ള എംഎല്‍എയാണ് ഇദ്ദേഹം. ഹൃദയ സംബന്ധമായ അസുഖങ്ങള്‍ക്കും ഗോമൂത്രം മികച്ച ഔഷധമാണെന്നും ഇദ്ദേഹം പറയുന്നു. 

പലരും 18 മണിക്കൂര്‍ ജോലി ചെയ്യുന്നതിന്റെ രഹസ്യം ഗോമൂത്രമാണെന്നും സുരേന്ദ്രസിംഗ് പറയുന്നുണ്ട് . മുമ്പും പല ബിജെപി നേതാക്കളും ഇത്തരം വാദങ്ങളുമായി രംഗത്തുവന്നിട്ടുണ്ട്. എന്തായാലും സോഷ്യല്‍ മീഡിയയില്‍ ഇദ്ദേഹത്തിനെതിരെ ട്രോള്‍ മഴയാണ്.