ന്യൂയോര്ക്ക്: ഫോമയുടെ മുന് ജനറല് സെക്രട്ടറിയും, നിലവിലെ നാഷണല് കമ്മിറ്റി മെമ്പറുമായ ന്യൂയോര്ക്കില് (മെട്രോ റീജിയന്) നിന്നുമുള്ള ജോസ് എബ്രഹാം 2022-2024 കാലഘട്ടത്തിലെ ഫോമാ പ്രസിഡണ്ട് സ്ഥാനത്തേക്ക് മത്സരിക്കുന്നു. സ്റ്റാറ്റന് ഐലന്റ് മലയാളി അസോസിയേഷന് മുന് പ്രസിഡണ്ടും സെക്രട്ടറിയും ആയിരുന്നു ഇദ്ദേഹം.
ഫോമായുടെ ചരിത്രത്തിലെ ആദ്യത്തെ മെഗാ പ്രോജക്ട് ആയ RCC project നടത്തിയത് 2014 -16 കാലഘട്ടത്തില് ആനന്ദന് നിരവേല് ഷാജി എഡ്വേര്ഡ് ജോയ് ആന്റണി എന്നിവര് നയിച്ച കാലത്താണ്. ഈ പ്രൊജക്ടിന് ചുക്കാന് പിടിച്ചത് project കോ-ഓര്ഡിനേറ്ററായി പ്രവര്ത്തിച്ച ജോസ് എബ്രഹാം ആയിരുന്നു. 2018-20 കാലങ്ങളില് സെക്രട്ടറിയായിരുന്ന സമയത്താണ് പ്രസിഡണ്ട് ഫിലിപ്പ് ചാമത്തിലിന്റെ ആശയമായിരുന്ന ഫോമാ വില്ലേജ് പ്രൊജക്റ്റിന്റെ മുന്നിരയില് നിന്നു പ്രവര്ത്തിച്ചു. 2018 20 കാലയളവില് വില്ലേജ് പ്രോജക്റ്റിന് കൂടാതെ കേരളത്തില് നിരവധി ചാരിറ്റി പ്രവര്ത്തനങ്ങള് നടത്താനും, അമേരിക്കന് മലയാളികള്ക്ക് ഉതകുന്ന രീതിയിലുള്ള നിരവധി കാര്യങ്ങള് നടത്തുവാനും ഈ കാലയളവില് സാധിച്ചു. അതില് എടുത്തു പറയേണ്ട ഒരു സംഭാവനയാണ് ആണ് അമേരിക്കന് മലയാളികള്ക്ക് വളരെ പ്രയോജനം നല്കുന്ന എമിഗ്രേഷന് ഫോറം എന്ന് ഒരു ആശയത്തിന് രൂപം കൊടുക്കുവാന് കഴിഞ്ഞത്. അമേരിക്കയില് എമിഗ്രേഷന് വിഷയങ്ങളില് നയപരമായ രീതിയില് നിയമനിര്മാണങ്ങള്ക്ക് രൂപം കൊടുക്കുവാന് ഒരു കൂട്ടായ ശബ്ദമായി പ്രവര്ത്തിക്കുന്ന ടീം എന്ന ലക്ഷ്യം മുന്നിര്ത്തിയാണ് ഈ ഫോമായുടെ ഫോറത്തിന് രൂപംകൊടുത്തത്. നിരവധി പ്രവര്ത്തനങ്ങള്ക്ക് മുന്നിരയില് നിന്ന് നേതൃത്വം കൊടുക്കാന് ഇതിലൂടെ സാധിച്ചു അമേരിക്കയില് മറ്റൊരു ഇന്ത്യന് സംഘടനകളും പ്രവര്ത്തിക്കാത്തതും ഇതുവരെ മുന്നോട്ടു വയ്ക്കാത്തതുമായ ഒരു ആശയമായിരുന്നു ഈ കാലയളവില് മുന്നോട്ടുവച്ചത്.
കഴിഞ്ഞ 12 ല് പരം വര്ഷക്കാലമായി പ്രവര്ത്തിക്കുന്ന ഫോമയുടെ ലോഗോയും പേരും യുഎസ് ട്രേഡ്മാര്ക്ക് ഓര്ഗനൈസേഷനില് രജിസ്ട്രേഷന് സാധിച്ചത് ഈ കാലയളവിലായിരുന്നു. ആധുനിക സാങ്കേതിക വിദ്യയുടെ സഹായത്താല് ഫോമയുടെ പ്രവര്ത്തനങ്ങള് ഡിജിറ്റല് രീതിയില് അവതരിപ്പിക്കാന് കഴിഞ്ഞതും ഈ സമയത്തായിരുന്നു. കോവിഡ് മഹാമാരിയുടെ അതിപ്രസരം രൂക്ഷമായിരുന്ന സമയത്തും ജനറല് ബോഡിയുും ഇലക്ഷനും യഥാസമയം നടത്തി ഭരണ കൈമാറ്റം നടത്താനും സാധിച്ചതിന്റെ ചുക്കാന് പിടിച്ചതും ജോസ് എബ്രഹാം ആയിരുന്നു. നിലവിലെ പ്രസിഡണ്ടു അനിയന് ജോര്ജും കമ്മിറ്റിയും വളരെ ഭംഗിയായി ഫോമയുടെ പ്രവര്ത്തനങ്ങള് മുന്നോട്ടു കൊണ്ടുപോകുന്നു. തങ്ങളുടെ പരിമിതിയില് നിന്നുകൊണ്ട് കുറെയധികം കാര്യങ്ങള് ചെയ്യാന് ശ്രമിക്കുന്നു ചില കാര്യങ്ങള് നടപ്പിലാക്കാന് സാധിക്കുന്നു.
അമേരിക്കന് മലയാളികളുടെ നാഷണല് സംഘടനയെ മുന്നില് നിന്ന് നയിക്കുക എന്ന കാര്യം വളരെയധികം ഉത്തരവാദിത്തത്തോടെ കൈകാര്യം ചെയ്യേണ്ട ഒരു പദവിയാണ്. ഫോമയുടെ പ്രസിഡന്റ് എന്ന പദവിയില് ഉപരി, സംഘടനയുടെ ആഭ്യന്തരവും, ബാഹ്യവും ആയ എല്ലാ കാര്യങ്ങളുടെയും അഭിപ്രായം അറിയിക്കുക, തീരുമാനങ്ങള് കൈക്കൊള്ളുക, അത് നടപ്പില് വരുത്തുവാന് വേണ്ടി കൂട്ടായി പരിശ്രമിക്കുക, മുതലായ കാര്യങ്ങള് പ്രസിഡന്റിന്റെ അധീനതയില് വരുന്ന ചുമതലകള് ആണ്. ഫോമയുടെയുടെ പ്രവര്ത്തന കാര്യങ്ങളില് എല്ലാ കമ്മിറ്റികള്ക്കും അവരുടേതായ ഉത്തരവാദിത്വമുള്ള പ്രവര്ത്തന മേഖലകള് വിവക്ഷിച്ചിട്ടുണ്ട്. പ്രസിഡന്റിനേയും കമ്മറ്റിക്കാരെയും മറികടന്നുകൊണ്ട്, ചില തല്പരകഷികളുടെ ബാഹ്യമായ ഇടപെടലുകളും, സമ്മര്ദങ്ങളും, ഫോമായുടെ ദൈനംദിന പ്രവര്ത്തനങ്ങളെ വളരെ ദോഷമായ രീതിയില് ബാധിക്കുന്നതായി ചിലര് ശ്രദ്ധയില് പെടുത്തിയിട്ടുണ്ടന്ന് ജോസ് എബ്രഹാം അറിയിച്ചു.
ഫോമയുടെ നിരവധി റീജിയനുകളില് നിന്നും, മുതിര്ന്ന പ്രവര്ത്തകരില് നിന്നും, മുന് ഭാരവാഹികളില് നിന്നുള്ള അസുലഭമായ പിന്തുണയും പ്രേരണയും കൊണ്ടാണ് ഫോമായുടെ പ്രസിഡന്റ് സ്ഥാനാര്ത്ഥിയാകുവാനുള്ള ഈ തീരുമാനത്തിലേക്ക് എത്തിച്ചേര്ന്നത് എന്നാണ് അദ്ദേഹം അറിയിച്ചത്. എല്ലാവരുമായി കൂടിയാലോചിച്ച്, ഫോമായുടെ ഭാവി പരിപാടികളുടെ പദ്ധതികള് അധികം വൈകാതെ പ്രഖ്യാപിക്കും. ദീര്ഘ വീക്ഷണവും, സംഘടനാ ചാരുതയും കൈമുതലായുള്ള ജോസ് അബ്രഹാമിനെ പോലെയുള്ള സംഘടനാ നേതാക്കള് ഫോമായുടെ അമരത്തിലേക്ക് എത്തുന്നത് ഫോമായുടെ യശ്ശസ്സ് ഇനിയും ഉയരുവാന് ഉതുകുമെന്ന് ഫോമാ പ്രവര്ത്തകര് അഭിപ്രായപ്പെട്ടു.