മിഷിഗൺ:- മിഷിഗൺ ഡെമോക്രാറ്റിക്ക് ഗവർണർ ഗ്രിച്ചൻ വിറ്റ്മറെ തട്ടിക്കൊണ്ടു പോകുന്നതിനുള്ള ശ്രമം തകർത്തതായും ഇതിലുൾപ്പെട്ട 13 പേരെ പിടികൂടിയതായും ഫെഡറൽ സ്റ്റേറ്റ് അധികൃതർ ഒക്ടോബർ 9 വ്യാഴാഴ്ച അറിയിച്ചു.
അമേരിക്കൻ ഭരണഘടന അട്ടിമറിക്കുന്നതിനും നിരവധി സംസ്ഥാന സർക്കാരുകളെ അസ്ഥിരപ്പെടുത്തുന്നതിനും ആഭ്യന്തര ഭീകരത വളർത്തുന്നതിനും ശ്രമിച്ചവരാണ് പോലീസ് പിടിയിലായത്.
കോവിഡ് നിയന്ത്രണങ്ങളെത്തുടർന്ന് മിഷിഗൺ ഗവർണറും സംസ്ഥാന ഗവൺമെന്റും യു.എസ്. ഭരണഘടന ലംഘനം നടത്തുന്നുമെന്നതാണ് ഗവർണറെ തട്ടിക്കൊണ്ടുപോകുന്നതിനുള്ള തന്ത്രങ്ങൾ മെനയുന്നതിന് പ്രതികളെ പ്രേരിപ്പിച്ചത്.
ഗൂഢാലോചന നടത്തിയെന്ന കുറ്റം ആരോപിച്ച് ആറുപേരും മിലിഷ്യ ഗ്രൂപ്പിലെ 7 പേരുമാണ് അറസ്റ്റിലായതെന്ന് മിഷിഗൺ അറ്റോർണി ജനറൽ ഡാനാനെസ്സൽ വാർത്താ സമ്മേളനത്തിൽ അറിയിച്ചു. മിഷിഗൺ ക്യാപ്പിറ്റോൾ ബിൽഡിംഗ് ആക്രമിക്കുന്നതിനും പ്രതികൾ പദ്ധതി തയാറാക്കിയിരുന്നതായും നെസ്സൽ പറഞ്ഞു.
തിരഞ്ഞെടുപ്പിന് ദിനങ്ങൾ അവശേഷിക്കെ ഇത്തരം പ്രവർത്തനങ്ങൾ രാഷ്ട്രീയ ശ്രദ്ധ പിടിച്ചു പറ്റുന്നതാണ്. ഗൂഢാലോചന തകർത്തതിൽ ഗവർണർ ഗ്രിച്ചൻ ലൊ എൻഫോഴ്സ്മെന്റിനു നന്ദി രേഖപ്പെടുത്തി.