ഹരിപ്പാട് : ഉത്സവം കഴിഞ്ഞ് മടങ്ങുന്നതിനിടെ ഇടഞ്ഞ ആനയുടെ കുത്തേറ്റ് രണ്ടാം പാപ്പാന് മരിച്ചു. കൊല്ലം പൂതക്കുളം സ്വദേശി കലേഷ്(45) ആണു മരിച്ചത്. ഇന്നലെ രാത്രി പത്തരയോടെ ഹരിപ്പാട് സുബ്രഹ്മണ്യ ക്ഷേത്രത്തിനു സമീപമുള്ള റോഡിലായിരുന്നു ആനയുടെ ആക്രമണം. കുത്തേറ്റ കലേഷിനെ ?ആലപ്പുഴ മെഡിക്കല് കോളജ് ആശുപത്രിയിലെത്തിച്ചെങ്കിലും പതിനൊന്നരയോടെ മരിച്ചു. അപ്പു എന്ന ആനയാണ് ഇടഞ്ഞത്. പുലര്ച്ചെ 2.20ന് മടക്കുവെടി വച്ചു കീഴ്പ്പെടുത്തിയാണ് ആനയെ തളച്ചത്.
കൊല്ലത്തെ ആനയെ ഹരിപ്പാട് സ്വദേശി പാട്ടത്തിനെടുത്തതാണ്. പള്ളിപ്പാട് ക്ഷേത്രത്തില് ഉത്സവത്തിന് കൊണ്ടുപോയി തിരികെ വരുമ്പോള് വണ്ടിയുടെ ഹോണ് ശബ്ദം കേട്ടതാണ് ആന ഇടയാന് കാരണമായതെന്നു പറയുന്നു. രണ്ടാം പാപ്പാനെ കുത്തിയ ശേഷം ഒരു മണിക്കൂറോളം ആന അനങ്ങാതെ നിന്നെങ്കിലും ഒന്നാം പാപ്പാന് കൊല്ലം സ്വദേശി സഞ്ജുവിന് ആനപ്പുറത്തുനിന്ന് ഇറങ്ങാന് കഴിഞ്ഞില്ല. അതിനുശേഷം ആന ക്ഷേത്രത്തിന് മുന്നിലെ റോഡിലൂടെ ഓടാന് തുടങ്ങി. ക്ഷേത്രാങ്കണത്തിലെ ആല്മരത്തിനടിയിലൂടെ വന്നപ്പോള് നാട്ടുകാര് വടം കെട്ടി പാപ്പാനെ രക്ഷപ്പെടുത്താന് ശ്രമിച്ചു. വടം വലിച്ചു പൊട്ടിച്ച ആന സമീപത്തെ വൈദ്യുതത്തൂണും ലൈനും തകര്ത്തതോടെ പ്രദേശത്താകെ ഇരുട്ടായി. ആനയെ തളയ്ക്കാന് കൂടുതല് പാപ്പാന്മാര് വന്നെങ്കിലും ഒന്നും ചെയ്യാനായില്ല.
അഗ്നിരക്ഷാസേന, ഹരിപ്പാട് ആക്സിഡന്റ് റെസ്ക്യൂ ടീം എന്നിവരുടെ നേതൃത്വത്തില് സുരക്ഷാ സംവിധാനങ്ങള് ഒരുക്കി. റോഡിലെ ഗതാഗതം പൂര്ണമായും വഴിതിരിച്ചുവിട്ടു. ഹരിപ്പാട് സിഐ ബിജു വി.നായരുടെ നേതൃത്വത്തില് പൊലീസ് കാവല് ഏര്പ്പെടുത്തി. ആന നില്ക്കുന്നതിന്റെ ഒരു കിലോമീറ്റര് അകലെ ആളുകളെ തടഞ്ഞു. പുലര്ച്ചെ ഒരു മണിയോടെ ആന സമീപ പുരയിടത്തില് നിലയുറപ്പിച്ചു.
കലക്ടര് മയക്കുവെടി വയ്ക്കാനുള്ള ഉത്തരവ് നല്കിയതോടെ കോട്ടയത്തുനിന്നു ഡോ. ബിജുവിന്റെ നേതൃത്വത്തില് വനം വകുപ്പിലെ എലിഫന്റ് സ്ക്വാഡ് അര്ധരാത്രി സ്ഥലത്തെത്തി. പുലര്ച്ചെ മയക്കുവെടി വച്ച് ആനയെ തളച്ചതോടെയാണ് സഞ്ജു എന്ന പാപ്പാനെ താഴെയിറക്കാനായത്. രാത്രി 10.30 മുതല് പുലര്ച്ചെ 2.20 വരെ ആനപ്പുറത്തിരുന്ന സഞ്ജു ക്ഷീണിതനായിരുന്നു. ഇയാളെ മെഡിക്കല് കോളജ് ആശുപത്രിയിലേക്കു കൊണ്ടുപോയി.