ഫിറോസാബാദ്: യു പിയില് ട്രക്കിനു പിറകില് ബസ് പാഞ്ഞുകയറി 14 പേര് മരിച്ചു. നിരവധി പേര്ക്ക് ഗുരുതരമായി പരിക്കേറ്റു. പരിക്കേറ്റവരെ ഇത്താവ സഫായിയിലെ ആശുപത്രിയില് പ്രവേശിപ്പിച്ചു. 35ഓളം പേര്ക്ക് ഗുരുതരമായി പരിക്കേറ്റതായി റിപ്പോര്ട്ടുകള് സൂചിപ്പിക്കുന്നു.ഉത്തര്പ്രദേശിലെ ഫിറോസാബാദില് ആഗ്ര-ലക്നൗ എക്സ്പ്രസ് ഹൈവേയിലാണ് അപകടമുണ്ടായത്. അപകടസമയത്ത് 50 ഓളം യാത്രക്കാര് ബസ്സില് ഉണ്ടായിരുന്നതായാണ് വിവരം.
സാധനങ്ങളുമായി പോകുകയായിരുന്ന ട്രക്കിനു പുറകിലായി ബസ് ഇടിച്ചു കയറുകയായിരുന്നുവെന്ന് ദൃക്സാക്ഷികള് പറയുന്നു.
അപകടത്തില് ബസിന്റെ മുന്ഭാഗം പൂര്ണമായി തകര്ന്നു. ഡ്രൈവര് ഉറങ്ങിയപ്പോയെന്നും തുടര്ന്ന് നിയന്ത്രണം നഷ്ടപ്പെടുകയും ചെയ്തതാണ് അപകടത്തിന് കാരണമെന്നാണ് അറിയുന്നത്.
ഫിറോസാബാദിലെ നഗ്ല ഖാങ്കര് പൊലീസ് സ്റ്റേഷന് പരിധിയില് ബുധനാഴ്ച രാത്രി പത്തുമണിയോടെയാണ് ദുരന്തം അരങ്ങേറിയത്.
ഡെല്ഹിയില് നിന്നു ബിഹാറിലെ മൊടിപാരിയിലേക്കു പോകുകയായിരുന്ന ഡബിള് ഡക്കര് സ്ലീപര് ബസ് കണ്ടെയ്നര് ട്രക്കിനു പിന്നില് ചെന്ന് ഇടിക്കുകയായിരുന്നു. മരണസംഖ്യ ഇനിയും ഉയരാന് സാധ്യതയുണ്ടെന്ന് അധികൃതര് അറിയിച്ചു.