നാസയുടെ ഡൈവേഴ്സിറ്റി, ഇക്വിറ്റി ആൻഡ് ഇൻക്ലൂഷൻ (ഡി ഇ ഐ) മേധാവി സ്ഥാനത്തു നിന്ന് ഇന്ത്യൻ വംശജയായ നീല രാജേന്ദ്രയെ നീക്കം ചെയ്തു. എല്ലാ ഫെഡറൽ ഏജൻസികളിലും തുല്യത ഉറപ്പാക്കാനുള്ള ഈ വകുപ്പിന്റെ പ്രവർത്തനം നിർത്താനുള്ള പ്രസിഡന്റ് ട്രംപിന്റെ ഉത്തരവ് അനുസരിച്ചാണിത്.

വര്ഷങ്ങളോളം നാസയിൽ പ്രവർത്തിച്ച അവർ ഡി ഇ ഐ മേധാവി എന്ന നിലയിൽ വനിതകൾക്കും ന്യൂനപക്ഷങ്ങൾക്കും കൂടുതൽ പ്രാതിനിധ്യം ഉറപ്പാക്കാൻ ശ്രമം നടത്തിയിരുന്നു. ആഴ്ചകളോളം നാസ തസ്തികയുടെ പേര് മാറ്റി രാജേന്ദ്രയെ നിലനിർത്താനുള്ള ശ്രമങ്ങൾ നടത്തി. മാർച്ചിൽ നാസ ജെറ്റ് പ്രൊപ്പൽഷൻ ലാബ് അവരെ പുതുതായി സൃഷ്ടിച്ച Office of Team Excellence and Employee Success മേധാവിയായി നിയമിച്ചു.

എന്നാൽ അവരുടെ ചുമതലകൾ ഏറെക്കുറെ പഴയതു തന്നെ ആയിരുന്നു. ഈ മാസം ഡി ഇ ഐ പരിപാടികൾ നിർത്തലാക്കാനുള്ള ഭരണകൂടത്തിന്റെ ശ്രമം വീണ്ടും ശക്തമായപ്പോൾ രാജേന്ദ്രയെ പുറത്താക്കി.

അക്കാര്യം സ്ഥിരീകരിച്ചു ജെറ്റ് പ്രൊപ്പൽഷൻ ലാബ് മേധാവി ലോറി ലേഷിൻ ജീവനക്കാർക്ക് ഇമെയിൽ അയച്ചു.

ഡി ഇ ഐ വിഭജനം അഗാധമാക്കുന്നുവെന്നും പൊതുമുതൽ ദുരുപയോഗം ചെയ്യുന്നുവെന്നും വിവേചനം നടപ്പാക്കി എന്നുമാണ് ട്രംപിന്റെ എക്സിക്യൂട്ടീവ് ഓർഡറിൽ ആരോപിച്ചിരുന്നത്.

NASA sacks Indian-origin DEI chief