താരങ്ങൾ തിളങ്ങി നിറഞ്ഞ ന്യൂ ഷെപ്പേർഡ് റോക്കറ്റ് തിങ്കളാഴ്ച്ച രാവിലെ ബ്ലൂ ഒറിജിൻ വിക്ഷേപിച്ചു. മൂന്ന് വനിതാ ക്രൂ അംഗങ്ങൾ ഉൾപ്പെട്ട വനിതാ സംഘത്തിൽ ഗായിക കേറ്റി പെറി, ആമസോൺ-ബ്ലൂ ഒറിജിൻ ഉടമ ജെഫ് ബെസോസിന്റെ പ്രതിശ്രുത വധു ലോറൻ സാഞ്ചസ്, സിബിഎസ് മോർണിംഗ് കോ-ഹോസ്റ്റ് ഗെയ്ൽ കിംഗ് എന്നിവരാണ് യാത്രികർ.

ടെക്സസിൽ നിന്നായിരുന്നു വിക്ഷേപണം. ബഹിരാകാശത്തു 11 മിനിറ്റ് കഴിഞ്ഞ ശേഷം സ്‌പേസ് ടൂറിസ്റ്റുകൾ മടങ്ങും.

ഭൂമിക്കു 62 മൈൽ മുകളിൽ ആയിരിക്കും വനിതകൾ മാത്രം ഉൾപ്പെട്ട റോക്കറ്റ് സഞ്ചരിക്കുക. ബഹിരാകാശത്തെ വേർതിരിക്കുന്ന കാർമാൻ ലൈനിനു തൊട്ടു മുകളിൽ. ശൂന്യത കാണുകയും ഭാരരഹിത അവസ്ഥ അനുഭവിക്കയും ചെയ്യാം.

തിരിച്ചു വരുമ്പോൾ ടെക്സസ് മരുഭൂമിയിൽ പാരഷൂട്ടുകളിൽ ഇറങ്ങും.

വിക്ഷേപണത്തിനു സാക്ഷ്യം വഹിക്കാൻ ഓപ്ര വിൻഫ്രി, ക്രിസ് ജെന്നർ, ഖോൾ കർദാഷിയാൻ എന്നിവർ എത്തിയിരുന്നു.

ജെഫ് ബെസോസും എത്തി. മംഗളം ആശംസിക്കാനും സാഞ്ചെസിനു ചുംബനം നൽകാനും.

1963നു ശേഷം ഇതാദ്യമാണ് ഒരു സമ്പൂർണ വനിതാ ബഹിരാകാശ യാത്ര. സോവിയറ്റ് വനിത വലെന്റിന തെരഷ്കോവ ആണ് 1963ൽ ഒറ്റയ്ക്കു പറന്നത്.

Blue Origin all-female flight blasts off