തിരുവനന്തപുരം: മാണിക്കെതിരെയുള്ള കൈക്കൂലി ആരോപണം തള്ളിക്കൊണ്ടും ടി.എന്‍ പ്രതാപനെ രൂക്ഷമായി വിമര്‍ശിച്ചും മുഖ്യമന്ത്രി ഉമ്മന്‍ചാണ്ടി. മാണിക്കെതിരെയുള്ള ആരോപണത്തില്‍ ഒരു സത്യാവസ്ഥയുമില്ലെന്ന് മുഖ്യമന്ത്രി തിരുവനന്തപുരത്ത് പറഞ്ഞു. ഇരുമ്പുമറക്കുള്ളില്‍ പ്രവര്‍ത്തിക്കുന്ന ആളല്ല മാണി. വിഷയത്തില്‍ തന്നെ കണ്ടു എന്നാണ് ബിജു രമേശ് പറഞ്ഞത്. എപ്പോള്‍ എവിടെ വെച്ച് കണ്ടു എന്ന് ആരോപിക്കുന്നയാള്‍ വ്യക്തമാക്കണം.

എപ്പോഴും ജനങ്ങള്‍ക്കൊപ്പമുള്ളയാളാണ് താന്‍. ആരെങ്കിലും എന്തെങ്കിലും പറയുന്നതിന് പ്രതികരിക്കേണ്ട ആവശ്യമില്ല. ആരുടെയെങ്കിലും പ്രസ്താവനയില്‍ മറുപടി പറയേണ്ടിവരുന്നത് നിര്‍ഭാഗ്യകരമാണ്. മാണിക്കെതിരായ ആരോപണത്തില്‍ ഒരു അന്വേഷണവുമില്ല. കാര്യങ്ങള്‍ വ്യക്തമായി അറിയാവുന്ന ആളാണ് താനെന്നും മുഖ്യമന്ത്രി വാര്‍ത്താലേഖകരോട് പറഞ്ഞു.

ആരോപണം വന്നപ്പോഴേക്കും മാണി വിശദീകരിക്കണം എന്ന് പറയാന്‍ ടി.എന്‍ പ്രതാപന്‍ ആരാണ്. പ്രതാപനെ നിയന്ത്രിക്കാന്‍ തനിക്ക് അധികാരമുണ്ടെന്നും മുഖ്യമന്ത്രി പറഞ്ഞു. പാര്‍ലമെന്‍ററി പാര്‍ട്ടി നേതാവാണ് താന്‍. പി.സി ജോര്‍ജിന്‍െറ ആരോപണം കാര്യമാക്കുന്നില്ല. പറയുന്ന കാര്യം ജോര്‍ജ് പിന്നീട് മാറ്റിപ്പറയുമെന്നും മുഖ്യമന്ത്രി പറഞ്ഞു.