കുമളി: കുമളിയില് കടുവാത്തോല് വില്ക്കാന്
ശ്രമിക്കുന്നതിനിടയില് അഞ്ചംഗ സംഘം വനംവകുപ്പിന്റെ പിടിയിലായി. തമിഴ്നാട്ടില്
നിന്ന് കൊണ്ടുവന്നതാണ് കടുവാത്തോല്. തമിഴ്നാട് സ്വദേശികളാണ് പിടിയിലായത്.
ഇവര് അനധികൃതമായി ശേഖരിച്ച കടുവാത്തോല് വില്ക്കുന്നതിനായി മുണ്ടക്കയം
ഭാഗത്തേക്ക് കാറില് വരികയായിരുന്നു.
വണ്ടിപ്പെരിയാര് 59-ാം മൈല്
ഭാഗത്ത് രാത്രികാല പരിശോധന നടത്തുന്നതിനിടെയാണ് വള്ളക്കടവ് ഫോറസ്റ്റ്
റെയ്ഞ്ച് ഓഫീസര് സി അജയന്റെ നേതൃത്വത്തിലുള്ള സംഘം ഇവരെ പിടികൂടിയത്.
നാരായണന്, ചക്കരൈ, മുരുകന്, കരുപ്പസ്വാമി, രത്തിനവേല് എന്നിവരാണ്
പിടിയിലായവര്.
പീരുമേട് കോടതിയില് ഹാജരാക്കിയ ഇവരെ ഈ മാസം 30 വരെ
റിമാന്റ് ചെയ്തു.