ഇത് എന്തൊരു കഷ്ടമാണ്- അല്ല നികൃഷ്ടമാണ്.
പല സിനിമകളിലും
ശ്ലീലതയുടെ അതിര്വരമ്പുകള് ലംഘിച്ച് അശ്ലീലത പറഞ്ഞ്
ഓടിമറയുന്നവരെയും മാന്യന്മാരെ ഒളിഞ്ഞിരുന്നു കല്ലെറിയുന്നവരെയും
കണ്ടിട്ടുണ്ട്. പക്ഷേ കാണാമറയത്തിരുന്ന് ഊരും പേരുമില്ലാതെ
ആക്ഷേപങ്ങളും ആഭാസങ്ങളും അസഭ്യങ്ങളും പടച്ച് സമൂഹത്തില്
ബഹുമാനിതരായവരെ അപമാനിക്കാന് ശ്രമിക്കുന്നത് എത്ര
നികൃഷ്ടമാണ്. നികൃഷ്ട ജീവികള്ക്കേ ഇത്തരത്തില് പെരുമാറാന്
സാധിക്കൂ. ഭീരുത്വത്തെക്കാള് മനസ്സില് അപാരമായ വിഷവും പേറി
നടക്കുന്നവരാണ് ഊമക്കത്തുകള് വിക്ഷേപിക്കുന്നതില്
മുമ്പന്മാര്. താനല്ലാത്ത എല്ലാത്തിനോടും പുച്ഛവും അസൂയയും
പുലര്ത്തുന്നവര്. അല്ലെങ്കില് അതുവരെ ഒപ്പം ചിരിച്ചുല്ലസിച്ച്
തോളില് കൈയിട്ട് നടന്നവനെതിരെ ഇങ്ങനെ ഒരു ഇരുട്ടടി പ്രയോഗം
നടത്തുന്നതെങ്ങനെ.
ഒരു സമൂഹത്തില് ജീവിക്കുമ്പോള്
പാലിക്കേണ്ടതായ ചില സാമാന്യ മര്യാദകളൊക്കെയുണ്ട്. പലതും എഴുതി
വച്ചിട്ടുണ്ടാകില്ല. നിയമാവലികളും കാണില്ല. പീനല് കോഡുകളിലെ
വകുപ്പുകളിലും കാണാനാവില്ല. വാമൊഴിയായും വരമൊഴിയുമൊക്കെയായി
തലമുറകളില് നിന്നും തലമുറകളിലേക്ക് പകര്ത്തപ്പെടുന്നതാണവ.
ഇതൊക്കെ അറിയണമെങ്കില് നല്ല കുടുംബത്തില് ജനിക്കണം, നല്ല
പിതാക്കന്മാരുടെ സന്തതികളായി ജനിക്കണം. ഇപ്പോള് ഇങ്ങനെയൊക്കെ
പറയാന് എന്താണ് കാരണമെന്നല്ലേ..
അമേരിക്കന് മലയാളി
സമൂഹത്തിലെ സമുന്നതരായ വ്യക്തികളെ വ്യക്തിഹത്യ ചെയ്തു
അപമാനിക്കുന്ന രീതിയിലുള്ള ഒരു ഊമക്കത്ത് ഈയാഴ്ച മെയിലില് കിട്ടി
എന്നതു തന്നെ. ഇത് ആദ്യമല്ല. ഇത്തരമൊന്നു ലഭിക്കുന്നത്. ഇതിനു
മുന്പും പലതവണ ഇതിനു സമാനമായവ ലഭിച്ചിട്ടുണ്ട്. ഇതിനു
പിതൃശൂന്യത എന്നേ പറയാനാവൂ.
തെറിക്കത്ത് എഴുതുന്ന
കാര്യത്തില് മലയാളികള്തന്നെ ലോകത്തിലെ നമ്പര് വണ്.
സംശയമുണ്ടെങ്കില് തീവണ്ടികളിലെ മൂത്രപ്പുരകളുടെ ചുവരില്
എഴുതിവെച്ചിരിക്കുന്ന വിശ്വസാഹിത്യം നോക്കൂ. ആരും കാണില്ലെന്ന്
ഉറപ്പുള്ള മൂത്രപ്പുരയില് മാന്യതയുടെ സിപ് ഊരി ഇങ്ങനെ നഗ്നത
വെളിവാക്കുന്നവരില് അങ്ങേയറ്റത്തെ മാന്യന്മാരും
വിദ്യാസമ്പന്നരും ഉണ്ടെന്നാണ് മനഃശാസ്ത്രകാരന്മാര് പറയുന്നത്.
ഈ തെറിവീരന്മാരുടെ പരാക്രമത്തിന് കാരണമായി അവര്ക്ക് പലതും
പറയാനുമുണ്ട്. നേര്ക്കു നേരെ നിന്ന് കാര്യങ്ങള് പറയാന്
ധൈര്യമില്ലാത്തവന്റെ തന്ത്രമാണ് ഊമക്കത്തുകള് എന്ന് ഭൂരിഭാഗം
മനഃശാസ്ത്രകാരന്മാരും പറയുന്നു. ധൈര്യമുണ്ടെങ്കില് നേരിട്ടു
പറയില്ലേ; അതില്ലാഞ്ഞിട്ടല്ലേ ഈ ഒളിവെടി.
ഇതില്
കുട്ടികളില് നേരും നെറിയും പറഞ്ഞുകൊടുക്കുന്ന അധ്യാപകരും
രോഗികള്ക്ക് പ്രതി ശമനം കൊടുക്കുന്ന ഡോക്ടര്മാരും നെറികേടുകള്
തലനാരിഴ കീറി പുറത്തിടുന്ന പത്രക്കാരും പോലിസുകാരും
അഭിഭാഷകരും എല്ലാവരും ബഹുമാനിക്കുന്ന സാഹിത്യ സാംസ്കാരിക
നായകന്മാര് വരെയുണ്ട്. "പാപത്തില് എന്റെ മാതാവ് എന്നെ ഗര്ഭം ധരിച്ചു.'
എന്ന് ദാവീദ് രാജാവ് പ്രാര്ത്ഥിക്കുന്നത് ഓര്ത്തു കൊണ്ടു തന്നെ പറയട്ടെ,
അസൂയയില് നിന്നാവണം ഊമക്കത്തുകള് ജനിക്കുന്നത്. കൂടെ ജോലി
ചെയ്യുന്നവന് അത് നല്ല വെടിപ്പായി ചെയ്യുകയും അഭിനന്ദനങ്ങള്
ഏറ്റുവാങ്ങുകയും ചെയ്യുമ്പോള് ചിലര്ക്ക് കലിപ്പിളകും.
വൈകുന്നേരം വരെ തോളില് കൈയിട്ട് നടന്ന അവന്റെ പേരില് രാത്രി
ഉറക്കിളച്ചിരുന്ന് ഊമക്കത്തെഴുതും. എന്നിട്ട് വെളുപ്പിനെ
ദൂരെയുള്ള (ഈ കേസ് പ്രകാരം ന്യൂയോര്ക്ക്) ഒരു പോസ്റ്റോഫീസില് പോയി ഒരു
അഭ്യുദയകാംക്ഷിയായി ഡേറ്റാ ബാങ്കിലെ സകലവര്ക്കും കൈയിലുള്ള ഇല്ലാത്ത പണം
മുടക്കി നുണയും കുത്തുംവെച്ച് കത്ത് പോസ്റ് ചെയ്യും. നോക്കണേ ഒരു
ശുഷ്കാന്തി. നാട്ടിലെ സുന്ദരിയായ പെണ്ണിനെ പ്രേമിച്ച് നടക്കാതെ
പോകുമ്പോള് അവള്ക്ക് വരുന്നകല്യാണാലോചനകള് മുടക്കുന്നവര്
പഴയ സിനിമകളിലെ സ്ഥിരം കഥാപാത്രങ്ങളില് ഒന്നായിരുന്നു.
പഴയകാലത്തെ ഇത്തരം കല്യാണം മുടക്കലുകള് ഇപ്പോള് അത്ര
വ്യാപകമല്ല. പകരം മൊബൈല് ഫോണിന്റെ കാലത്തെസാധ്യതകള് അവര്
ഉപയോഗപ്പെടുത്തുന്നു. എന്നാല്, കല്യാണം മുടക്കികള് പോലും
സാങ്കേതിക പുരോഗതിനേടിയിട്ടും ഇക്കാര്യത്തില് ശിശുസഹജമായ ഭാവം
വിടാത്തവര് ഉയര്ന്ന വിദ്യാ സമ്പന്നരാണ്. ഒരേ സ്ഥാപനത്തില്ജോലി
ചെയ്യുന്നവര്. ഒരേ സ്ഥാനത്തിരിക്കുന്നവര് ഒരേ പള്ളിയില്
പോകുന്നവര് അങ്ങനെയങ്ങനെ....
ശത്രു പ്രബലനായിരിക്കുമ്പോള്
ഗറില്ലാ ആക്രമണരീതി സ്വീകരിക്കുന്നത് പഴയൊരു യുദ്ധതന്ത്രമാണ്.
ലോകത്തെവിടെയും ശക്തനെതിരേയുള്ള ദുര്ബലന്റെ ആയുധം. നാട്ടിലെ
അഴിമതിക്കെതിരെ ഉയര്ന്ന തലത്തില് വ്യാജമായ പേരില് ചിലര്
കത്തുകള് പരാതിയായി അയക്കാറുണ്ട്. അത് ഒരു യുദ്ധമുറയായി
വേണമെങ്കില് കാണാം. നേര്ക്കുനേരെ ഏറ്റുമുട്ടിയാല് വന്നു
കയറാവുന്ന ദുരിതത്തെക്കുറിച്ചുള്ള വീണ്ടുവിചാരം ഒരു കത്തില്
മറഞ്ഞിരിക്കാന് ഇക്കൂട്ടരെ പ്രേരിപ്പിച്ചേക്കാം. ലാഭേച്ഛ,
പ്രതികാരം, മനോരോഗം, അസൂയ, ഇഷ്ടക്കേട് ഇവയാണ് ഊമക്കത്തുകളുടെ
മൂലകാരണം അതു കൊണ്ടു തന്നെ ഊമക്കത്തുകള്ക്ക് അധിക പ്രാധാന്യം
കൊടുക്കരുതെന്നും മനഃശാസ്ത്രജ്ഞര് പറയുന്നു. ഏറ്റവും ലളിതമായി
പ്രതികരിച്ചാല് സംസ്ക്കാരം വിടാതെ പറയട്ടെ ഊമക്കത്തുകള്
പിതൃശൂന്യതയുടെ ലക്ഷണമാണ്.
നിങ്ങള്ക്ക് ഒരു ഊമക്കത്ത്
ലഭിക്കുകയാണെങ്കില് അത് അവഗണിക്കുക എന്നതാണ് ആദ്യം ചെയ്യേണ്ടത്.
നിങ്ങളുടെ അഭ്യുദയകാംക്ഷി ആയിരിക്കില്ല ഇതിനു പിന്നിലെന്നു പെട്ടെന്നു തന്നെ
ഊഹിക്കണം. നിങ്ങളെ വേദനിപ്പിക്കുക, ആ വേദന അടുത്തു നിന്നു കണ്ട്
ആസ്വദിക്കുക എന്നിവയാണ് ഇവരുടെ വിനോദം. ഇത്തരം ഊമക്കത്തുകളോടു യാതൊരു
തരത്തിലും പെട്ടെന്ന് പ്രതികരിക്കരുത്. സ്വന്തം വീട്ടില് പോലും,
അനാവശ്യമായ പബഌസിറ്റി കൊടുക്കരുത്. മുന്വിധി കൂടാതെ
ആരോപണങ്ങളെക്കുറിച്ച് പരോക്ഷമായി മാത്രം അന്വേഷിക്കണം. തന്നെ ഒരു
തരത്തിലും ബാധിക്കുന്നതല്ലെന്ന നിലയില് തന്നെ ഇത് അവഗണിക്കുക. അത്
തന്നെയാണ് ഈ ഊളന്മരെ- അല്ല ഊമന്മാരെ നേരിടാനുള്ള മാര്ഗ്ഗം. ഇവരുടെ മുഖപടം
അഴിഞ്ഞു വീഴുക തന്നെ ചെയ്യും. ഇന്നല്ലെങ്കില് നാളെ. കാത്തിരിക്കാം, ഈ
ഞരമ്പുരോഗികളുടെ ആവരണം അനാവരണം ചെയ്യുന്നതു വരെ.. അല്ലാതെ
മാന്യന്മാര്ക്ക് മറ്റു മാര്ഗ്ഗങ്ങളില്ലല്ലോ..
-ജോര്ജ് തുമ്പയില്